రూ.1000 కోట్లు.. మన హీరో కంటే ముందే కొడతారా?

బాక్సాఫీస్ వద్ద రూ.1000 కోట్లకు పైగా వసూళ్లు.. ఇప్పటి వరకు ఆ రికార్డు సాధించిన ఇండియన్ మూవీస్ ఏడే ఏడు. అమీర్ ఖాన్ దంగల్ మూవీ రూ.2 వేల కోట్లకుపైగా కలెక్షన్లు రాబట్టి టాప్ గ్రాసర్ ఇండియన్ సినిమాగా నిలిచిన విషయం తెలిసిందే. ఆ తర్వాత స్థానాల్లో బాహుబలి-2, ఆర్ఆర్ఆర్, కేజీఎఫ్-2, పఠాన్, జవాన్ చిత్రాలు ఉన్నాయి. రీసెంట్ గా ప్రభాస్, నాగ్ అశ్విన్ కాంబోలో వచ్చిన కల్కి 2898 ఏడీ మూవీ కూడా రూ.1000 కోట్ల క్లబ్ లో చేరింది.

అయితే ఐకాన్ స్టార్ అల్లు అర్జున్ పుష్ప-2 సినిమా కూడా త్వరలో రూ.1000 కోట్ల క్లబ్ లోకి చేరుతుందని కొద్ది రోజులుగా వార్తలు వస్తున్నాయి. రికార్డు స్థాయిలో ఓపెనింగ్స్ సాధిస్తుందని, అనేక రికార్డులు బద్దలవుతాయని అంచనా వేస్తున్నారు. ఎన్నడూ జరిగిన రీతిలో ప్రీ రిలీజ్ బిజినెస్ జరుగుతుందని, భారీ స్థాయిలో విడుదల అవుతుందని టాక్ వినిపిస్తోంది. దీంతో పుష్ప సీక్వల్ రూ.1000 కోట్లకు పైగా కలెక్షన్స్ రాబట్టడం పక్కా అని అంతా చెబుతున్నారు.

ఇప్పుడు సోషల్ మీడియాలో మరో వార్త చక్కర్లు కొడుతోంది. 2024లో పుష్ప-2 కన్నా ముందు రూ.వెయ్యి కోట్ల మార్క్ ను మరో రెండు చిత్రాలు అందుకునే అవకాశం ఉందని వార్తలు వస్తున్నాయి. బాలీవుడ్ బ్లాక్ బస్టర్ హిట్ మూవీస్ కు సీక్వెల్స్ గా వస్తున్న సింగమ్ ఎగైన్, భూల్ భూలయ్యా-3 రూ.1000 కోట్లకు పైగా వసూళ్లు రాబట్టే ఛాన్స్ ఉందని అంచనా వేస్తున్నారు ట్రేడ్ పండితులు. బాక్సాఫీస్ వద్ద భారీ ఓపెనింగ్స్ సాధిస్తాయని చెబుతున్నారు.

ప్రస్తుతం ఈ రెండు సినిమాలపై ఆడియన్స్ లో ఓ రేంజ్ అంచనాలు ఉన్నాయి. మేకర్స్ భారీ హైప్ క్రియేట్ చేస్తున్నారు. ట్రైలర్ అండ్ ప్రమోషనల్ కంటెంట్ తో అంచనాలు పెంచుతున్నారు. కచ్చితంగా మూవీ చూడాలనిపించేంతగా ఇంపాక్ట్ చూపిస్తున్నారు. అందరి దృష్టి తమ వైపు తిప్పుకుంటున్నారు. దీంతో సినీ ప్రియులు అంతా ఆ చిత్రాల కోసం వెయిట్ చేస్తున్నారు. మౌత్ టాక్ బాగుంటే ఆ సినిమాలు రెండు రూ.1000 కోట్లు సాధించడం చాలా ఈజీ అని ట్రేడ్ వర్గాలు చెబుతున్నాయి.

అయితే రూ.1000 కోట్ల క్లబ్ లో బాలీవుడ్ ఇండస్ట్రీకి చెందిన దంగల్ కొన్నాళ్ల క్రితం చేరింది. ఆ తర్వాత షారుక్ రెండు చిత్రాలు జవాన్, పఠాన్.. రూ.వెయ్యి కోట్లకు పైగా వసూలు చేసి అబ్బురపరిచాయి. అనంతరం వివిధ హిందీ సినిమాలు రిలీజ్ అయినా.. అనుకున్నంత స్థాయిలో కలెక్షన్స్ రాబట్టలేదు. ఇప్పుడు సింగమ్ ఎగైన్, భూల్ భూలయ్యా-3 ప్రాజెక్టులు మాత్రం రూ.1000 కోట్ల ఫీట్ ను అందుకుంటాయని అంటున్నారు. మరి ఏం జరుగుతుందో తెలియాలంటే వేచి చూడాలి.