మస్క్‌ బ్లాక్‌ చేసినా 'ఎక్స్‌' వద్దంటా..!

గత నెల ప్రేక్షకుల ముందుకు వచ్చిన అమరన్‌ సినిమాతో శివ కార్తికేయన్‌ సంచలన విజయాన్ని సొంతం చేసుకున్నారు. ఈ ఏడాది మేటి సినిమాల జాబితాలో నిలవడం మాత్రమే కాకుండా తమిళ సినిమా ఇండస్ట్రీలో అతి పెద్ద సినిమాల జాబితాలోనూ నిలిచింది. రూ.100 కోట్లు సాధిస్తే గొప్ప విషయం అనుకున్న అమరన్‌ సినిమా ఏకంగా రూ.300 కోట్ల వసూళ్లకు చేరువ అయింది. లాంగ్ రన్‌లో ఆ మార్క్‌ చేరుకోవడం పెద్ద కష్టం కాకపోవచ్చు అనే అభిప్రాయంను చాలా మంది వ్యక్తం చేస్తున్నారు. అమరన్‌ సినిమా విజయంతో శివ కార్తికేయన్ ఒక్కసారిగా కోలీవుడ్‌లో టాప్‌ స్టార్‌ హీరోల జాబితాలో చేరి పోయాడు.

ఇటీవల ఒక చిట్‌చాట్‌లో అమరన్ సినిమా విజయంపై సంతోషం వ్యక్తం చేశారు. అంతే కాకుండా అమరన్‌ సినిమా కోసం పడ్డ కష్టం గురించి ప్రేక్షకులతో షేర్‌ చేసుకున్నారు. అమరన్‌ సినిమా కంటే ముందు వచ్చిన కొన్ని సినిమాలు ఫ్లాప్ కావడంతో అందుకు కారణం ఏమై ఉంటుంది అనే విషయాలను తెలుసుకునేందుకు సోషల్‌ మీడియాను ఆశ్రయించేవాడిని. కానీ దాని వల్ల ఏం ప్రయోజనం ఉండదు అని తర్వాత అర్థం అయింది. సోషల్‌ మీడియాలో సినిమా నెగటివ్‌ పాయింట్స్ తెలుసుకునేందుకు ప్రయత్నిస్తే మరింత మనలో నెగిటివిటీ పెరుగుతుంది అంటూ శివ కార్తికేయన్‌ చెప్పుకొచ్చాడు. సోషల్‌ మీడియా ద్వారా జనాల పల్స్ తెలుసుకోవడం సాధ్యం కాదని ఆయన అన్నారు.

తనను ఎలాన్‌ మస్క్‌ ఎక్స్ నుంచి బ్లాక్‌ చేసినా పర్వాలేదు కానీ తాను మాత్రం ఏ ఒక్కరు ట్విట్టర్‌ను వాడొద్దనే చెబుతాను అంటూ శివ కార్తికేయన్‌ సరదాగా చెప్పుకొచ్చాడు. తాను చాలా అరుదుగా మాత్రమే సోషల్‌ మీడియా ద్వారా పోస్ట్‌లు చేస్తూ ఉంటాను అన్నాడు. తాను సినిమాల గురించి ఎక్కువగా సోషల్‌ మీడియా ద్వారా తెలుసుకోను అని, జనాల నుంచి ఫీడ్‌ బ్యాక్‌ తీసుకుంటాను అన్నాడు. అలా నేరుగా జనాల నుంచి ఫీడ్‌ బ్యాక్ తీసుకోవడం వల్ల ఎక్కువ నిజాయితీ ఫలితాలు వస్తాయి అన్నట్లుగా చెప్పుకొచ్చాడు. అలా చేయడం ద్వారా సోషల్‌ మీడియా నుంచి వచ్చే నెగిటివిటీని సైతం తప్పించుకోవచ్చు అనే అభిప్రాయం వ్యక్తం చేశారు.

టీవీ యాంకర్‌గా కెరీర్‌ను ఆరంభించి ఎక్కడి నుంచో ఎక్కడికో వెళ్లిన శివ కార్తికేయన్‌ ఇప్పుడు కోలీవుడ్‌ బాక్సాఫీస్‌ని మాత్రమే కాకుండా పాన్‌ ఇండియా బాక్సాఫీస్‌ని ఏలుతున్నాడు. ఈయన నటించిన సినిమాలు, ఇక మీదట నటించబోతున్న సినిమాలు పాన్ ఇండియా స్థాయిలో ప్రేక్షకులను అలరించేందుకు రెడీ అవుతున్నాయి. అమరన్‌ సినిమాలో మేజర్ పాత్రకు జీవం పోసిన తీరకు అంతా ఫిదా అవుతున్నాయి. సాయి పల్లవి హీరోయిన్‌గా నటించిన అమరన్‌ సినిమా బాక్సాఫీస్ వద్ద నాలుగు వారాలు అయినా సందడి చేస్తూనే ఉంది. దాంతో శివ కార్తికేయన్‌ తదుపరి సినిమాపై పాన్‌ ఇండియా స్థాయిలో ఆసక్తి, అంచనాలు భారీగా ఉన్నాయి.