గుట్కా పాన్ మ‌సాలా ప్ర‌క‌ట‌న చేస్తావా ఛీఛీ..న‌టికి చీవాట్లు..

సూపర్ స్టార్లు షారూఖ్ ఖాన్, అజయ్ దేవగన్, అక్షయ్ కుమార్‌లతో కలిసి గుట్కా (నమలడం పొగాకు) ప్రచార ప్రకటనలో కనిపించిన తర్వాత తనకు ఎదురైన క‌ఠిన‌మైన ప‌రిస్థితుల‌ గురించి నటి సౌందర్య శర్మ ప్రస్తావించారు. ప్ర‌జ‌ల్ని త‌ప్పుదోవ ప‌ట్టించే గుట్కా ప్రకటన వివాదానికి దారితీసింది. ప్ర‌జారోగ్యం ప్ర‌మాదంలో ప‌డే ప‌రిస్థితి ని తెచ్చే ఉత్పత్తిని ప్రచారం చేయాలనే ఆమె నిర్ణయంపై ప్రశ్నలను లేవనెత్తింది. అయితే ఒక నటిగా తాను చేసిన‌ పనిని తప్పుగా అర్థం చేసుకోకూడదని సౌంద‌ర్య‌ వ్యాఖ్యానించింది. పైగా తాను చేసిన‌దేదీ త‌ప్పు కానే కాద‌ని స‌మ‌ర్థించుకుంది.

సౌందర్య ఇండియా టుడే డిజిటల్‌తో మాట్లాడుతూ.. ఇలాంటి ప్ర‌క‌ట‌న‌లు ఎలా చేయ‌గ‌ల‌రు? అని ప్ర‌శ్నించారు. అయితే న‌టిగా నాకు ఎటువంటి పరిమితులు లేవు. మంచి విషయం ఏమిటంటే నేను వైద్య(మెడిసిన్) నేపథ్యం నుండి వచ్చాను కాబట్టి నాకు ఎటువంటి నిషేధాలు లేవు. నేను ఇది చేయను అది చేయను అని అనవచ్చు. కానీ నాకు ఇలాంటి ప్ర‌క‌ట‌నను చేయ‌డం ఓకే. నటిగా చేస్తున్నాను. కాబట్టి గుట్కా పాన్ మసాలా ప్రకటన చేయ‌డానికి నాకు అభ్యంత‌రం దేనికి? అవకాశం ఇస్తే దాన్ని చేయాలనే కోరిక ఉన్న వ్యక్తిగా నేను నో చెప్పను. ఒక దంతవైద్యునిగా లేదా వ్యక్తిగా నా అభిప్రాయాలకు.. న‌టిగా నా అభిప్రాయాలు చాలా భిన్నంగా ఉంటాయి. నేను చేసే ప్రతిదానితో నేను ఏకీభవించకపోవచ్చు. కానీ ఒక నటిగా ఇది నాకు అవసరం. కాబట్టి చేసాను..నేను కొంచెం పిచ్చిదానిని...చేయ‌లేను అన‌లేను! అని తెలిపింది.

ట్రోలర్ల‌ను ఉద్దేశించి సౌందర్య ఇలా పేర్కొంది. ప్రజలు నన్ను ట్రోల్ చేసారు.. కానీ నా జీవితం ముగిసిపోయిందని భావించేంత‌గా కాదు. నేను నిర్మాణాత్మక విమర్శలను తీసుకోగలను కానీ ఈ ప్ర‌క‌ట‌న‌ను నాకు నేను చేసిన ఎంపిక. ఎందుకు నటీనటులు మాత్రమే బాధ్యత వహించాలి.. మేక‌ర్స్ కి సంబంధం లేదా? అని ప్ర‌శ్నించింది.

దంతవైద్యుని నేపథ్యం నుండి వచ్చిన నేను ఈ ఉత్పత్తులను ఉపయోగించిన రోగులను చూశాను. నా వృత్తిపరంగా వారికి ఇది స‌రికాద‌ని సలహా ఇచ్చాను. కానీ నటిగా నేను దానిని అవకాశంగా సంప్రదించాను. అలాగే షారూఖ్ ఖాన్, అజయ్ దేవగన్, అక్షయ్ కుమార్‌లతో స్క్రీన్ స్పేస్ షేర్ చేసుకోవడం చాలా పెద్ద ఆఫ‌ర్. ఈ అవకాశం రావడం చాలా పెద్ద విషయం. నేను ప్ర‌క‌ట‌న‌లో భాగమై వారితో స్క్రీన్ స్పేస్‌ను షేర్ చేసుకోవడం చాలా ఆనందంగా ఉంది.. అని తెలిపింది.

కెరీర్ మ్యాట‌ర్ కి వ‌స్తే... సౌందర్య ప్రస్తుతం అక్షయ్ కుమార్, అభిషేక్ బచ్చన్, రితీష్ దేశ్‌ముఖ్, నర్గీస్ ఫక్రీ, జాక్వెలీన్ ఫెర్నాండెజ్, సోనమ్ బజ్వాతో పాటు `హౌస్‌ఫుల్ 5` షూటింగ్‌లో బిజీగా ఉన్నారు.