లాడెన్‌పై SPY ఆప‌రేష‌న్.. గ‌గుర్పొడిచే 'స్పై OPS'

గూఢ‌చ‌ర్యం నేప‌థ్యంలో సినిమాలు వెబ్ సిరీస్ లు గొప్ప ఆద‌ర‌ణ ద‌క్కించుకుంటున్న సంగ‌తి తెలిసిందే. ఇటీవ‌లే కింగ్ ఖాన్ షారూఖ్ న‌టించిన 'ప‌ఠాన్' గూఢ‌చ‌ర్యం నేప‌థ్యంలో భారీ యాక్ష‌న్ కంటెంట్ తో అల‌రించింది. గూఢ‌చ‌ర్యం నేప‌థ్యంలో ప‌లు సౌత్ సినిమాల‌కు గొప్ప ఆద‌ర‌ణ ద‌క్కింది. రాజ్ అండ్ డీకే తెర‌కెక్కించిన ఫ్యామిలీమ్యాన్ వెబ్ సిరీస్ రెండు సీజ‌న్ లు గొప్ప విజువ‌ల్ కంటెంట్ తో ప్ర‌పంచ‌వ్యాప్తంగా జ‌నాద‌ర‌ణ‌ను ద‌క్కించుకుంది. కాశ్మీర్ తీవ్ర‌వాదం స్పై ఆప‌రేష‌న్ నేప‌థ్యంలో ఈ సిరీస్ ర‌క్తి క‌ట్టించింది. ఆ త‌ర్వాత స్పెష‌ల్ ఓపీఎస్ వెబ్ సిరీస్ అమెజాన్ ప్రైమ్ లో గొప్ప ఆద‌ర‌ణ ద‌క్కించుకుంది.

అయితే ఇప్పుడు ప్ర‌పంచంలోని అగ్ర గూఢచారులు వారు ప‌ని చేసిన సంస్థ‌ల‌ సేవల ఆధారంగా ట్రూ-క్రైమ్ సిరీస్ 'స్పై OPS' తెర‌కెక్కింది. ఇది త్వ‌ర‌లోనే నెట్ ఫ్లిక్స్ లో స్ట్రీమింగుకి రెడీ అవుతోంది. నెట్ ఫ్లిక్స్ రూపొందించిన ఒరిజిన‌ల్ క్రైమ్ సిరీస్ ఇది. తాజాగా ట్రైల‌ర్ విడుద‌లైంది. ట్రైల‌ర్ ఆద్యంతం గూఢ‌చారుల సీక్రెట్ ఆప‌రేష‌న్ ఎలా సాగుతుందో ప్ర‌ముఖ గూఢ‌చారులు ఇంట‌ర్వ్యూల్లో వివ‌రిస్తున్నారు. భారీ మిషన్‌లను నిర్వహించిన ఇంటెలిజెన్స్ అధికారులతో ఇంటర్వ్యూలు ఆక‌ట్టుకుంటున్నాయి.

వీరంతా స్పై ఆప‌రేష‌న్ తీరు తెన్నుల‌ను వివ‌రించ‌డం ట్రైల‌ర్ లో క‌నిపిస్తోంది. స్పై ఆప్స్ ట్రూ-క్రైమ్ సిరీస్ ప్ర‌పంచంలో అత్యంత ప్రమాదకరమైన రహస్య గూఢచర్య కార్యకలాపాల తెరవెనుక క‌థ‌ల‌ను తెర‌పైకి తేనుంద‌ని చెప్పాలి. గూఢచర్యం, స్పైక్రాఫ్ట్, ప్రచ్ఛన్న యుద్ధ ప్రచారాలు, రహస్య ఏజెంట్ కార్య‌క‌లాపాల‌ ప్రపంచంపై అంతర్గత సమాచారాన్ని ఈ సిరీస్‌లో అందిస్తున్నారు.

స్పై ఆప్స్ - CIAతో పాటుగా MI6, మ‌సాద్, DIA స‌హా ప్ర‌పంచంలోని అన్ని ప్రధాన గూఢచార సంస్థల నుండి స్పై ఏజెంట్లపై రూపొందించిన సిరీస్. BIG మీడియా ఈ డాక్యు సిరీస్ ని నిర్మించింది. 8 సెప్టెంబర్ 2023న, Netflix ఈ ఒరిజిన‌ల్ క్రైమ్ సిరీస్‌ను లాంచ్ చేస్తోంది. సిరీస్ ట్రైలర్ ఆద్యంతం ర‌క్తి క‌ట్టిస్తోంది.

ప్ర‌పంచంలోని టాప్ ఇంటెలిజెన్స్ సర్వీస్‌ల ఫైల్‌ల నుండి అద్భుతమైన కథనాలు స్పై ఓపీఎస్ లో ర‌క్తి క‌ట్టించ‌నున్నాయి. స్పైక్రాఫ్ట్ - CIA తాలూకా ఇటీవలి విజయాలు ఓటీటీ తెర‌పై ర‌క్తి క‌ట్టించ‌నున్నాయి.

అలాగే ఇందులో అల్ ఖైదా అధినాయ‌కుడు దివంగ‌త‌ బిన్ లాడెన్ పై అసాధార‌ణ‌ రహస్య మిషన్‌లకు ప్రాణం పోసేందుకు గూఢ‌చార సంస్థ‌లు ఏం చేశాయ‌న్న‌ది ఈ డాక్యు సిరీస్ లో చూపించ‌నున్నారు. ప్రతి ఎపిసోడ్ గూఢ‌చారి మిష‌న్ తో పాటు.. మిష‌న్ కి నాయకత్వం వహించిన గూఢచారులు, వారి వెనుక ఉన్న ఏజెన్సీలు వాటి ప్రాధాన్య‌త‌ను కూడా ఈ సిరీస్ లో వీక్షించ‌వ‌చ్చు.

ట్రైల‌ర్ వీక్షించాక‌.. మిషన్ ఇంపాజిబుల్ ఫ్రాంచైజీ త‌ర‌హాలో స్పై ఆప్స్ కంటెంట్ ఎంతో ఉత్కంఠ‌గా ఉంద‌ని ఒక అభిమాని వ్యాఖ్యానించ‌డం ఆస‌క్తిక‌రం. ఇలాంటి స్పై ఆప‌రేష‌న్స్ వెన‌క ఏం జ‌రుగుతుందో తెలుసుకోవ‌డం ఉత్కంఠ‌గా ఉంటుంద‌ని ప‌లువురు అభిమానులు వ్యాఖ్యానించారు. ''మ‌నం ఉల్లాస‌క‌ర‌మైన‌ మూడ్‌లో ఉన్నప్పుడు మంచి గూఢచారి సిరీస్ లేదా స్పై సినిమా ప‌ని చేసిన‌ట్టు ఇంకేదీ ప‌ని చేయ‌దు. గూఢచారి ప్రాజెక్ట్‌లు అంటే కథలో ఊపిరి బిగ‌బ‌ట్టే మలుపులు ..సుదీర్ఘ‌ డ్రామా .. క్రూరమైన వేట‌తో ఆద్యంతం గ‌గుర్పాటుకు గురి చేస్తుంది. గూఢచారి చలనచిత్రాలు ఎలాంటి మ్యాజిక్ ని అయినా రీక్రియేట్ చేయ‌గ‌ల‌వు'' అంటూ మ‌రో అభిమాని వ్యాఖ్యానించారు.