సుమంత్ మిస్ చేసుకున్న గొప్ప అవ‌కాశమ‌ది!
అక్కినేని కుటుంబం నుంచి తెరంగేట్రం చేసిన సుమంత సినీ జ‌ర్నీ గురించి చెప్పాల్సిన ప‌నిలేదు
అక్కినేని కుటుంబం నుంచి తెరంగేట్రం చేసిన సుమంత సినీ జ‌ర్నీ గురించి చెప్పాల్సిన ప‌నిలేదు. 'ప్రేమ‌క‌థ' చిత్రంతో హీరోగా ప‌రిచ‌య‌మైన సుమంత్ తొలి సినిమాతోనే యూనిక్ న‌టుడ‌ని నిరూపించాడు. అటుపై 'స‌త్యం', 'గౌరీ' లాంటి మాస్ సినిమాలతోనూ ప్రేక్ష‌కుల‌కు ద‌గ్గ‌ర‌య్యాడు. ఆ త‌ర్వాత మరికొన్ని చిత్రాలు చేసాడు. కానీ న‌టుడిగా మాత్రం బిజీ కాలేకపోయాడు.
మ‌రి ఈ గ్యాప్ ఎందుకు వ‌స్తున్న‌ట్లు? అంటే త‌న‌కు న‌చ్చిన క‌థ‌లు రాక‌పోవ‌డంతోనే సినిమాలు చేయ‌లేద‌ని చెబుతుంటాడు. క‌థ బాగా న‌చ్చితే త‌ప్ప ఒప్పుకోన‌ని అంటాడు. అయితే ఓ సంద‌ర్భంలో హిట్ సినిమా వ‌దులుకోవాల్సి వ‌చ్చింద‌న్న సంగ‌తి తాజాగా పంచుకున్నాడు. త‌రుణ్ హీరోగా న‌టించిన నువ్వేకావాలి సినిమా అప్ప‌ట్లో ఎంత పెద్ద హిట్ అయిందో తెలిసిందే. త‌రుణ్ కెరీర్ నే మార్చే సిన హిట్ ఇది.
ఈ విజ‌యం త‌ర్వాత న‌టుడిగా త‌రుణ్ బిజీ అయ్యాడు. అప్ప‌ట్లో వార‌సులు కూడా పోటీగా లేక‌పోవ‌డంతో త‌రుణ్ ఎన‌లేని క్రేజ్ తో ఓ వెలుగు వెలిగాడు. అయితే ఈసినిమాలో అవ‌కాశం తొలుత సుమంత్ కే వ‌చ్చిందని తెలిపాడు. 'నా కెరీర్ అప్పుడే మొద‌లు పెట్టా. స్ర‌వంతి ర‌వి కిషోర్ గారు 'నువ్వే కావాలి' లో న‌టించాలి అని అడిగారు. కానీ నాకు డేట్స్ కుద‌ర‌క‌పోవ‌డం వ‌ల్ల చేయ‌లేక‌పోయా.
ఆ స‌మ‌యంలో 'యువ‌కుడు', 'పెళ్లి సంబంధం' సినిమాల‌తో బిజీగా ఉన్నాను. ఆ కార‌ణంగానే నువ్వే కావాలి వ‌దులుకోవాల్సి వ‌చ్చింది. నా కెరీర్ లో అవ‌కాశం వచ్చినా చేయ‌లేక‌పోయిన సినిమా అది' అని అన్నారు. త‌రుణ్ , రిచా జంట‌గా విజ‌య్ భాస్క‌ర్ ద‌ర్శ‌క‌త్వం వ‌హించిన సినిమా అప్ప‌ట్లో సంచ‌ల‌న విజ‌యం సాధించింది. మ్యూజికల్ గానూ సినిమా పెద్ద హిట్ అయింది. ఈ చిత్రానికి కోటీ సంగీతం అందించారు. ఉషా కిర‌ణ్ మూవీస్ నిర్మించింది.