సూపర్ స్టార్‌ సూపర్‌ హిట్‌ సీక్వెల్‌ సూపర్ అప్డేట్‌ !

సూపర్ స్టార్‌ రజినీకాంత్‌ చాలా ఏళ్ల తర్వాత జైలర్ సినిమాతో భారీ బ్లాక్ బస్టర్ విజయాన్ని సొంతం చేసుకున్నాడు. వయసుకు తగ్గ పాత్ర పోషించడంతో పాటు, రజినీకాంత్‌ మార్క్‌ చూపించేందుకు వీలు ఉన్న స్క్రిప్ట్‌ దొరకడంతో జైలర్ సినిమా ఏకంగా ఇండస్ట్రీ హిట్ గా నిలిచిన విషయం తెల్సిందే.

పాన్ ఇండియా బాక్సాఫీస్ వద్ద జైలర్ సినిమా ఏకంగా రూ.650 కోట్ల వసూళ్లు నమోదు చేసింది. అప్పటి నుంచే ఫ్యాన్స్ మరియు ప్రేక్షకులు జైలర్ కి సీక్వెల్‌ కావాలయ్యా... అంటూ డిమాండ్‌ చేస్తూ వచ్చారు. ఇప్పటికే దర్శకుడు నెల్సన్‌ దిలీప్ జైలర్‌ 2 ఉందని ప్రకటించాడు.

జైలర్‌ 2 గురించి అయితే దర్శకుడు ప్రకటించాడు కానీ ఇప్పటి వరకు ఎలాంటి అప్డేట్ ఇవ్వక పోవడంతో అసలు సినిమా ఉందా లేదా అనే అనుమానాలు వ్యక్తం అయ్యాయి. జైలర్‌ 2 సినిమాకు సంబంధించిన ప్రీ ప్రొడక్షన్ వర్క్‌ జరుగుతుందని కమెడియన్‌ యోగి బాబు తెలియజేశాడు.

జైలర్‌ 2 కోసం దర్శకుడు నెల్సన్ దిలీప్‌ ప్రస్తుతం కామెడీ ట్రాక్ ను రాస్తున్నాడని, మంచి కామెడీ తో సినిమా వస్తుందనే నమ్మకంను కమెడియన్‌ యోగి బాబు ఒక ఇంటర్వ్యూలో నమ్మకం వ్యక్తం చేశాడు. జైలర్ సినిమాలో యోగి బాబు కామెడీ కి మంచి మార్కులు దక్కిన విషయం తెల్సిందే.

జైలర్‌ 2 సినిమాను ఇదే ఏడాది షూటింగ్‌ ప్రారంభించే అవకాశాలు ఉన్నాయి. దర్శకుడు నెల్సన్ దిలీప్‌ ఏ సినిమా అయినా చాలా స్పీడ్‌ గా పూర్తి చేస్తాడు. కనుక జైలర్‌ 2 సినిమాను కూడా ఎక్కువ సమయం తీసుకోకుండా స్పీడ్ గా పూర్తి చేసి వచ్చే ఏడాది దసరా లేదా దీపావళి సందర్భంగా విడుదల అయ్యే అవకాశాలు ఉన్నాయని తమిళ మీడియాలో కథనాలు వస్తున్నాయి.