తరుణ్ భాస్కర్.. ఈసారి శాంతి శాంతి అంటూ..

దర్శకుడు తరుణ్ భాస్కర్ నటుడిగా కూడా ఒక్కో మెట్టు ఎక్కుతూ తనకంటూ బ్రాండ్ ఇమేజ్ క్రియేట్ చేసుకునే ప్రయత్నం చేస్తున్నాడు. 'మహానటి' సినిమాతో తరుణ్ భాస్కర్ మొదటి సారి స్క్రీన్ లో కనిపించారు. తరువాత 'ఫలక్ నుమా దాస్' సినిమాలో కీలక పాత్ర చేశారు. 'మీకు మాత్రమే చెప్తా' సినిమాలో లీడ్ రోల్ చేశారు. తరువాత 'సీతారామం' మూవీలో మంచి ప్రాధాన్యత ఉన్న పాత్రలో కనిపించాడు. 'దూత' వెబ్ సిరీస్ లో కూడా నెగిటివ్ రోల్ లో మెప్పించాడు.

గత ఏడాది స్వీయ దర్శకత్వంలో 'కీడాకోలా' మూవీలో తరుణ్ భాస్కర్ హీరోగా నటించాడు. ఇలా నటుడిగా ఒక్కో మెట్టు ఎక్కుతున్న తరుణ్ భాస్కర్ ఇప్పుడు మలయాళీ హిట్ మూవీ 'జయ జయ జయహే' రీమేక్ లో లీడ్ రోల్ చేస్తున్నాడు. ఏఆర్ సజీవ్ ఈ సినిమాతో దర్శకుడిగా పరిచయం అవుతున్నాడు. తరుణ్ భాస్కర్ పుట్టిన రోజు సందర్భంగా ఈ సినిమా టైటిల్ తో పాటు ఫస్ట్ లుక్ పోస్టర్ ని రిలీజ్ చేశారు. 'ఓం శాంతి శాంతి శాంతి' అనే టైటిల్ పెట్టారు.

ఈ సినిమాలో అంబటి ఓంకార్ నాయుడు అనే క్యారెక్టర్ లో తరుణ్ భాస్కర్ కనిపిస్తున్నాడు. రీమేక్ కథ అయిన కూడా ఈ మూవీని పూర్తిగా గ్రామీణ నేపథ్యంలో చూపించబోతున్నారు. అలాగే తెలంగాణ నేటివిటీకి సరిపోయే విధంగా కొన్ని కీలకమైన మార్పులు చేసినట్లు తెలుస్తోంది. ఈ సినిమాకి తరుణ్ భాస్కర్ డైలాగ్స్ రాశారంట. తెలంగాణ మాండలికం మీద తరుణ్ భాస్కర్ కి మంచి గ్రిప్ ఉంటుంది.

అందుకే ఓం శాంతి శాంతి శాంతి మూవీకి ఆయనే డైలాగ్స్ రాసినట్లు సమాచారం. ఇక తరుణ్ భాస్కర్ కి జోడీగా ఈ చిత్రంలో ఈషా రెబ్బ నటిస్తోంది. 'జయ జయ జయహే' సినిమా చూసిన ఎవరికైనా హీరోయిన్ పాత్ర ఎంత స్ట్రాంగ్ గా ఉంటుందనేది క్లారిటీ ఉంటుంది. ఈషారెబ్బకి ఈ మూవీ మంచి బ్రేక్ ఇచ్చే అవకాశం ఉందని అనుకుంటున్నారు. ఎస్ ఒరిజినల్స్ బ్యానర్ పై సృజన్ ఎరబోలు ఈ సినిమాని నిర్మిస్తున్నారు.

అవుట్ అండ్ అవుట్ ఎంటర్టైనర్ గా ఈ మూవీ ఉండబోతోందని తెలుస్తోంది. ఫస్ట్ లుక్ పోస్టర్ లో తరుణ్ భాస్కర్ లుంగీ కట్టుకొని నోట్లో సిగరెట్ పెట్టుకొని, గల్లచొక్కాతో కనిపిస్తున్నాడు. మేల్ ఆటిట్యూడ్ ని రెప్లికేట్ అయ్యేవిధంగా ఈ లుక్ ఉంది. ఈ సినిమా నటుడిగా తరుణ్ భాస్కర్ కి ఎలాంటి బ్రేక్ ఇస్తుందనేది వేచి చూడాలి.