బాక్సాఫీస్: కన్నడలో తెలుగు డబ్బింగ్‌ హవా.. టాప్ లిస్ట్ ఇదే!

తెలుగు సినిమాలు కన్నడలో డబ్బింగ్‌గా విడుదలై కొత్త రికార్డులు సృష్టిస్తున్నాయి. ఇప్పటి వరకు అక్కడ కొన్ని సినిమాలు డబ్బింగ్‌ అనువాదంతోనే భారీ వసూళ్లను అందుకున్నాయి. అయితే, ఈ ట్రెండ్‌ ఇప్పుడు విస్తృతంగా పెరుగుతూ, కొత్త క్లబ్‌లను ఏర్పరిచేలా చేస్తోంది. తాజాగా విడుదలైన పుష్ప 2: ది రూల్ ఈ రికార్డులను మరో మెట్టుకి తీసుకెళ్లింది.

పుష్ప 2 కన్నడలో దాదాపు 9 కోట్ల గ్రాస్‌ అందుకొని, ఆ భాషలో అత్యధిక వసూళ్లు సాధించిన డబ్బింగ్‌ సినిమా అయ్యింది. ఇప్పటికే గ్లోబల్‌గా రూ.1800 కోట్ల గ్రాస్‌ను దాటి భారీ విజయాన్ని నమోదు చేసిన ఈ సినిమా, కన్నడలో తన సత్తా చాటింది. పుష్ప 2 సాంగ్స్‌, యాక్షన్ సీన్స్ అందర్నీ ఆకట్టుకుంటూ ఉన్నాయి. అల్లు అర్జున్‌ నటన, సుకుమార్‌ దర్శకత్వ ప్రతిభతో ఈ సినిమా పాన్‌ ఇండియా స్థాయిని మరింత బలపరిచింది.

ఇంతకుముందు కన్నడలో జైలర్, కల్కి 2898 ఏడీ, సలార్ వంటి సినిమాలు కూడా కొత్త క్లబ్‌లను అందుకున్నాయి. జైలర్ 5 కోట్ల క్లబ్‌కి చేరగా, కల్కి 2898 ఏడీ 7 కోట్ల వసూళ్లతో మెరిసింది. మరోవైపు, సలార్ 6 కోట్లను దాటింది. ఈ సినిమాలు పాన్‌ ఇండియా ప్రేక్షకులను ఆకట్టుకోవడంలో విజయవంతమవగా, కన్నడ ప్రేక్షకుల మనసులు కూడా గెలుచుకున్నాయి.

ఇంతకు ముందే సైరా నరసింహారెడ్డి, రంగస్థలం సినిమాలు కన్నడలో విజయవంతమయ్యాయి. సైరా రెండు కోట్ల క్లబ్‌ను అందుకున్న తొలి సినిమా కాగా, మూడు కోట్ల మార్క్‌ దాటి, దాని స్థాయిని చాటుకుంది. అలానే, రంగస్థలం ఒక కోటి క్లబ్‌కి చేరిన తొలి తెలుగు డబ్బింగ్‌ సినిమా. ఈ ట్రెండ్‌ కన్నడలో తెలుగు సినిమాలకున్న డిమాండ్‌ను మరోసారి రుజువు చేసింది. తెలుగు సినిమాల హవా కన్నడ భాషలో పెరగడం వెనుక ప్రధాన కారణం కథ, నటన, అలాగే టెక్నికల్‌ ప్రామాణికత. ముఖ్యంగా, పుష్ప 2 వంటి సినిమాలు ఈ ట్రెండ్‌ని మరో మెట్టుకి తీసుకెళ్లాయి.

కన్నడలో డబ్బింగ్‌ వసూళ్ల క్లబ్‌ లిస్టు:

1. 25 లక్షలు - కమాండో (అజిత్ వివేగం)

2. 50 లక్షలు - రంగస్థలం

3. 1 కోటి - రంగస్థలం

4. 2 కోట్లు - సైరా

5. 3 కోట్లు - సైరా

6. 4 కోట్లు - జైలర్

7. 5 కోట్లు - జైలర్

8. 6 కోట్లు - సలార్

9. 7 కోట్లు - కల్కి 2898 ఏడీ

10. 8 కోట్లు - పుష్ప 2: ది రూల్

11. 9 కోట్లు - పుష్ప 2: ది రూల్