'గేమ్ ఛేంజర్'తో ఆమెకు జాతీయ అవార్డు : తమన్‌
ఇప్పుడు గేమ్ ఛేంజర్ సినిమాతో రామ్‌ చరణ్ బిగ్గెస్ట్ బ్లాక్ బస్టర్‌ని అందుకోబోతున్నాడు అంటూ యూనిట్‌ సభ్యులు బలంగా ప్రచారం చేస్తున్నారు.
సంక్రాంతికి రాబోతున్న సినిమాల్లో 'గేమ్ ఛేంజర్' పై అందరి దృష్టి ఉంది. రామ్‌ చరణ్ హీరోగా శంకర్ దర్శకత్వంలో దిల్‌ రాజు నిర్మాణంలో భారీ బడ్జెట్‌తో రూపొందిన ఈ సినిమా 2024 సంక్రాంతికి రావాల్సి ఉండగా కొన్ని కారణాల వల్ల చాలా ఆలస్యం అయ్యి 2025 సంక్రాంతికి రాబోతుంది. రామ్‌ చరణ్ సోలో హీరోగా నాలుగు ఏళ్ల క్రితం వినయ విధేయ రామ సినిమాతో ప్రేక్షకుల ముందుకు వచ్చాడు. ఆ సినిమా మంచి విజయాన్ని సొంతం చేసుకోలేక పోయింది. కానీ ఎన్టీఆర్‌తో కలిసి నటించిన ఆర్‌ఆర్‌ఆర్‌ బిగ్గెస్ట్ బ్లాక్ బస్టర్‌గా నిలిచింది. ఆచార్య సినిమాలో ముఖ్య పాత్రలో నటించినా ఆ సినిమా బాక్సాఫీస్ వద్ద బొక్క బోర్లా పడింది.
ఇప్పుడు గేమ్ ఛేంజర్ సినిమాతో రామ్‌ చరణ్ బిగ్గెస్ట్ బ్లాక్ బస్టర్‌ని అందుకోబోతున్నాడు అంటూ యూనిట్‌ సభ్యులు బలంగా ప్రచారం చేస్తున్నారు. శంకర్ వింటేజ్ సినిమాల తరహాలో ఈ సినిమా మంచి సోషల్ మెసేజ్‌తో పాటు, ఒక మంచి కమర్షియల్‌ సినిమా మాదిరిగా ఉంటుంది అంటూ మేకర్స్ హామీ ఇస్తున్నారు. తాజాగా సంగీత దర్శకుడు తమన్‌ ప్రచారంలో భాగంగా మాట్లాడుతూ ఆసక్తికర వ్యాఖ్యలు చేశారు. ఈ సినిమా ఛాన్స్ వచ్చిన సమయంలో షాక్ అయ్యాను. శంకర్ గారి సినిమాకు సంగీతాన్ని ఇవ్వగలనా అని భయపడ్డాను. చాలా జాగ్రత్తగా సినిమా కోసం వర్క్‌ చేశాను. 2022 చివర్లోనే సినిమా పూర్తి కావాల్సి ఉన్నా కొన్ని కారణాల వల్ల ఆలస్యం అయ్యింది.
సినిమా కోసం చాలా కష్టపడి రెడీ చేసిన జరగండి పాట లీక్ అయిన సమయంలో నిద్ర పట్టలేదు. ప్రాధమిక వర్షన్‌ బయటకు వచ్చిందని తెలిసిన వెంటనే ఏం చేయాలో పాలుపోలేదు. దిల్‌ రాజు, శంకర్ గారు నాకు మద్దతుగా నిలిచారు. ఆ సమయంలో వెంటనే జరగండి పాటను విడుదల చేశాం. అప్పుడు పాటను విడుదల చేసినా ఇంకా ఫ్రెష్‌గానే పాట ఉన్నందుకు చాలా సంతోషంగా ఉందని తమన్‌ అన్నాడు. ఇక ఈ సినిమాలో చరణ్ గారి పాత్ర గురించి ప్రముఖంగా స్పందించాడు. రెండు పాత్రల్లోనూ అద్భుతంగా నటించాడు. ఆయన నుంచి ఫ్యాన్స్‌ ఏం ఆశిస్తున్నారో అదే ఈ సినిమాలో చూస్తారంటూ తమన్‌ మెగా ఫ్యాన్స్‌కి హామీ ఇచ్చాడు.
ఇక ఈ సినిమాలో కీలక పాత్రలో నటించబోతున్న అంజలి నటనకు జాతీయ అవార్డ్‌ ఖాయం అంటూ తమన్‌ ధీమా వ్యక్తం చేశారు. కచ్చితంగా ఆమె నటన అందరికీ నచ్చుతుంది. అంతే కాకుండా ఆమెకు కచ్చితంగా అవార్డులు వస్తాయని ఆయన నమ్మకంగా ఉన్నారు. సినిమా రీ రికార్డింగ్‌ సమయంలో చూసిన తాను సర్‌ప్రైజ్ అయ్యాను అన్నాడు. అంజలి నటన విషయంలో ప్రతి ఒక్కరి నుంచి పాజిటివ్ స్పందన వస్తుందని అన్నారు. సినిమా సంక్రాంతికి ప్రేక్షకులకు మంచి వినోదాన్ని అందిస్తుంది అంటూ హామీ ఇచ్చాడు. ఈ సినిమాలో రామ్‌ చరణ్ కి జోడీగా కియారా అద్వానీ నటించగా కీలక పాత్రల్లో తమిళ ప్రముఖ దర్శక, నటుడు ఎస్ జే సూర్య నటించారు. గేమ్ ఛేంజర్‌తో పాటు సంక్రాంతికి బాలకృష్ణ డాకు మహారాజ్‌, వెంకటేష్ సంక్రాంతికి వస్తున్నాం సినిమాలు రాబోతున్న విషయం తెల్సిందే.