వరుణ్ తేజ్ 'మట్కా'.. ట్రైలర్ ఎలా ఉందంటే?

మెగా ప్రిన్స్ వరుణ్ తేజ్ నటిస్తున్న లేటెస్ట్ మూవీ ''మట్కా''. 'పలాస' ఫేమ్ కరుణ కుమార్‌ దర్శకత్వం వహిస్తున్న ఈ పాన్ ఇండియా సినిమాలో మీనాక్షి చౌదరి, నోరా ఫతేహి హీరోయిన్లుగా నటిస్తున్నారు. నవంబర్ 14న థియేటర్లలోకి రాబోతున్న ఈ సినిమాకు సంబంధించిన ప్రచార కార్యక్రమాలు జోరుగా సాగుతున్నాయి. ఇప్పటికే వివిధ సందర్భాల్లో విడుదలైన పోస్టర్లు, గ్లింప్స్, టీజర్, పాటలకు మంచి రెస్పాన్స్ వచ్చింది. ప్రమోషన్స్ లో భాగంగా తాజాగా మెగాస్టార్ చిరంజీవి ఈ మూవీ ట్రైలర్ ను రిలీజ్ చేసి చిత్ర బృందానికి తన బెస్ట్ విషెస్ అందజేశారు.

''సర్కస్ లో బపూన్స్ ని చూసి జనం అంతా నవ్వుతారు.. చప్పట్లు కొడతారు. కానీ ఒక చిన్న కర్ర పట్టుకొని పులుల్ని సింహాల్ని ఆడించేవాడు ఒకడుంటాడు.. అలాంటోడే వీడు.. రింగ్ మాస్టర్'' అంటూ వరుణ్ తేజ్ పాత్రను పరిచయం చేయడంతో 'మట్కా' ట్రైలర్ ప్రారంభమవుతుంది. ఇది 1958 - 1982 మధ్య కాలంలో సెట్ చేయబడిన పీరియాడిక్ యాక్షన్ మూవీ అనే తెలుస్తోంది. కూలీగా జీవనం సాగించే వాసు అనే ఒక సాధారణ యువకుడు, వ్యవస్థలను శాసించే మట్కా కింగ్ గా ఎలా ఎదిగాడు? అనే ఆసక్తికరమైన లైన్ తో ఈ సినిమా రూపొందినట్లు ట్రైలర్ తో అర్థమవుతోంది.

ఇందులో వరుణ్ తేజ్ మునుపెన్నడూ చూడని సరికొత్త లుక్‌లో కనిపించాడు. 24 ఏళ్ల స్పాన్ కలిగిన ఈ స్టోరీలో, తన పాత్రకు తగ్గట్టుగా నాలుగు విభిన్నమైన లుక్స్, గెటప్స్ లో కనిపించి ఆకట్టుకున్నాడు. ముఖ్యంగా వయసు మీద పడిన వ్యక్తిగా అతని లుక్, డైలాగ్ డెలివరీ కొత్తగా అనిపిస్తాయి. ఇక వరుణ్ ప్రేయసిగా, ఆ తర్వాత భార్యగా మీనాక్షి చౌదరి కనిపించింది. నవీన్ చంద్ర, సలోని, కన్నడ కిషోర్, రవీంద్ర విజయ్, పి. రవిశంకర్‌, అజయ్ ఘోష్, మైమ్ గోపి తదితరులు ఇతర కీలక పాత్రలు పోషించారు.

డైరెక్టర్ కరుణ కుమార్ మరోసారి బలమైన కథను చెప్పబోతున్నట్లు 'మట్కా' ట్రైలర్ తోనే హింట్ ఇచ్చారు. ఇందులో 'డబ్బు నీకు వ్యసనమైంది.. వ్యసనంలో పతనం ఉంటుంది', 'మనం ఆశను అమ్ముతాం.. నమ్మకాన్ని కొంటాం', 'వేలు తీసుకొని వదిలేయడానికి నేను ద్రోణాచార్యుడిని కాదు.. వాసుని.. మట్కా కింగ్ ని', 'నీలాంటి మంచోళ్ళ వల్ల టైంకి వర్షాలు పడుతున్నాయి.. పంటలు పండుతున్నాయి.. కానీ నాలాంటి చెడ్డోళ్ళ వల్ల ఓ పదిమంది కడుపులు నిండుతున్నాయి.. నేచర్ బ్యాలన్స్' అంటూ చెప్పే డైలాగ్స్ ఆడియన్స్ ను అలరిస్తాయి. విజువల్స్ మట్కా బ్యాక్ డ్రాప్ కి తగ్గట్టుగా వింటేజ్ ఫీల్ ని కలిగిస్తాయి. బ్యాగ్రౌండ్ స్కోర్ ప్రధాన ఆకర్షణగా నిలిచింది. ప్రొడక్షన్ వాల్యూస్ రిచ్ గా ఉన్నాయి.

''మట్కా'' చిత్రాన్ని వైర ఎంటర్‌టైన్‌మెంట్స్, SRT ఎంటర్‌టైన్‌మెంట్స్‌పై డాక్టర్ విజయేందర్ రెడ్డి తీగల, రజనీ తాళ్లూరి సంయుక్తంగా నిర్మిస్తున్నారు. ఇది వరుణ్ తేజ్ కెరీర్ లోనే భారీ బడ్జెట్ మూవీ. ఖర్చుకు ఏమాత్రం వెనకాడకుండా తీశారు. జివి ప్రకాష్ కుమార్ సంగీతం సమకూర్చారు. కిషోర్ కుమార్ సినిమాటోగ్రఫీ అందించగా.. కార్తీక శ్రీనివాస్ ఎడిటింగ్ వర్క్ చేసారు. ఈ చిత్రాన్ని తెలుగు, తమిళ, కన్నడ, మలయాళ, హిందీ భాషల్లో ప్రపంచ వ్యాప్తంగా ఈ నెల 14న గ్రాండ్ గా విడుదల చేయనున్నారు. ఈ సినిమా మెగా హీరోకి ఎలాంటి విజయాన్ని అందిస్తుందో చూడాలి.