విడుతలై పార్ట్ 2: ఇద్ద‌రు జాతీయ అవార్డు గ్ర‌హీత‌ల ప‌నిత‌నం

ఇద్ద‌రు జాతీయ అవార్డ్ గ్ర‌హీత‌లు క‌లిసి ఒక ప్ర‌యోగం చేస్తున్నారంటే దానిపై ఎలాంటి అంచ‌నాలు ఉంటాయో ఊహించ‌గ‌లం. ఇప్పుడు అలాంటి అంచ‌నాలతో థియేట‌ర్ల‌లోకి వ‌స్తోంది 'విడుత‌లై 2'. వేట్రి మార‌న్ తెరకెక్కించిన 'విడుత‌లై' సంచ‌ల‌న విజ‌యం సాధించ‌డమే గాక అవార్డులు రివార్డులు కొల్ల‌గొట్టింది. ఏడాదిలోగానే ఈ సినిమాకి సీక్వెల్ వ‌స్తోంది. త‌మిళ చిత్ర‌సీమ‌లో భారీ అంచ‌నాల‌తో విడుద‌ల‌వుతున్న ఈ సినిమా ట్రైల‌ర్ విడుద‌లైంది. విజయ్ సేతుపతి ప్రధాన పాత్రలో నటించిన ఈ చిత్రంలో హాస్యనటుడు సూరి పోలీసాఫీస‌ర్ గా కీల‌క‌పాత్రను పోషించాడు.

'విడుతలై 2' మొదటి భాగం ముగింపు నుంచి మొద‌ల‌వుతుంది. ఈ రెండో భాగంలో పెరుమాళ్ వాతియార్ (సేతుపతి) గతాన్ని మరింత వివరణాత్మ‌కంగా తెర‌పై ఆవిష్క‌రిస్తున్నారు. తిరుగుబాటుదారుడు- పోలీసు కుమారేశన్ (సూరి) మ‌ధ్య వార్ నేప‌థ్యంలో ఈ సినిమా క‌థాంశం ఆద్యంతం ర‌క్తి క‌ట్టించ‌డం ఖాయంగా క‌నిపిస్తోంది. అడ‌వుల్లో కొడ‌వ‌ల్ల వేట ఓవైపు.. తిరుగుబాటు దారుడిని వెతుకుతూ పోలీసుల వేట మ‌రోవైపు ట్రైల‌ర్ ఆద్యంతం ఎంతో స‌హ‌జ‌మైన వాతావ‌ర‌ణంలో మ్యాడ్ నెస్ పుట్టిస్తోంది. జొన్న చేలో క్రూర‌మైన‌ వేట.. తుపాకుల బాట చూస్తుంటే ఇది సీట్ ఎడ్జ్ థ్రిల్ల‌ర్ అని అర్థ‌మ‌వుతోంది. మొద‌టి భాగంలో లాగ‌నే రెండవ భాగంలోను సంస్థాగత హింస, కుల‌మ‌తాలు, అణచివే వంటి చాలా సెన్సిటివ్ టాపిక్స్ ని ఇందులో చూపిస్తున్నారు. మక్కల్ పడై (తమిళంలో పీపుల్స్ ఆర్మీ)కి నాయకుడిగా సేతుప‌తి న‌ట‌న ఇందులో ర‌క్తి క‌ట్టిస్తోంది. పెరుమాళ్ వాతియార్ (సేతుప‌తి) తిరుగుబాటు, విముక్తి పోరాటం ఎలా సాగింద‌న్న‌ది తెర‌పైనే చూడాలి.

విడుతలై పార్ట్ 2 ట్రైలర్‌పై నెటిజన్ల స్పందన అద్బుతం. ఈ డార్క్ థీమ్డ్ ట్రైలర్ అభిమానులను ఆకట్టుకుంది. వేట్రిమార‌న్ ట్రైల‌ర్ గూస్‌బంప్స్ తెస్తోంది..అని స్పందించ‌గా.. #విదుతలైపార్ట్2 (క్రాకర్ ఎమోజి) కోసం వేచి ఉండలేను అని ఒక‌రు వ్యాఖ్యానించారు. ఇది బ్లాక్ బ‌స్ట‌ర్ సినిమా అంటూ చాలామంది జోష్ ని ప్ర‌ద‌ర్శించారు.

జ‌ర్న‌లిస్ట్ కం ర‌చ‌యిత బి. జయమోహన్ చిన్న కథ 'తునైవన్ విదుతలై' ఆధారంగా పార్ట్ 2ని తెర‌కెక్కించారు. స్క్రిప్టును వెట్రిమారన్ - జయమోహన్ కలిసి రచించారు. వెట్రిమారన్ ఒక భాగం చిత్రాన్ని రెండు భాగాల ఫ్రాంచైజీగా మార్చారు. గతేడాది తొలి భాగం థియేటర్లలో విడుద‌లైంది. అద్భుతమైన రివ్యూలను అందుకోవడంతో పాటు బాక్సాఫీస్ వద్ద రూ.40 కోట్లు రాబట్టింది. ఆర్‌ రామర్‌ ఎడిటర్ కాగా, ఆర్‌ వేల్‌రాజ్‌ సినిమాటోగ్రాఫర్‌, ఇళయరాజా సంగీతం సమకూర్చారు.

విడుతలై పార్ట్ 2 డిసెంబర్ 20న థియేటర్లలో విడుదల కానుంది. ఇందులో సూరి, మంజు వారియర్, రాజీవ్ మీనన్ , ద‌ర్శ‌క‌ నటులు గౌత‌మ్ మీన‌న్, అనురాగ్ కశ్యప్ నటించారు. ఈ చిత్రం బారీ హాలీవుడ్ యానిమేటెడ్ అడ్వెంచర్ పిక్చర్ 'ముఫాసా: ది లయన్ కింగ్'.. వరుణ్ ధావన్ నటించిన బాలీవుడ్ యాక్షన్ మూవీ బేబీ జాన్ తమిళ వెర్ష‌న్ల‌తో పోటీపడ‌నుంది.