విశ్వక్ సేన్ ప్రెస్ పార్టీ.. మీడియాకి గోల్డ్ కాయిన్స్!

గామి, గ్యాంగ్స్ ఆఫ్ గోదావరి చిత్రాల తర్వాత మాస్ కా దాస్ విశ్వక్ సేన్ హీరోగా నటిస్తున్న సినిమా "మెకానిక్ రాకీ". మాస్ యాక్షన్ ఎంటర్టైనర్ గా రూపుదిద్దుకుంటున్న ఈ చిత్రం.. శుక్రవారం ప్రేక్షకుల ముందుకు రానుంది. ఈ నేపథ్యంలో విశ్వక్ అండ్ టీమ్ గత కొన్ని రోజులుగా అగ్రెసివ్ గా ప్రమోషన్స్ చేస్తున్నారు. ఆదివారం వరంగల్ లో గ్రాండ్ గా ప్రీరిలీజ్ ఈవెంట్ నిర్వహించారు. ఈ క్రమంలో మీడియా మిత్రులకు బంగారు నాణేలు బహుమతిగా ఇవ్వాలని అనుకుంటున్నానని విశ్వక్ ఈ మధ్యనే తెలిపారు.

ఇటీవల ఓ ఇంటర్వ్యూలో పాల్గొన్న విశ్వక్ సేన్.. రెగ్యులర్ మీడియా ఇంటరాక్షన్ లా కాకుండా, జర్నలిస్టులందరూ కలిసి కూర్చొని మాట్లాడుకునేలా ప్రెస్ పార్టీ ఏర్పాటు చేయనున్నట్లు వెల్లడించారు. ఇది రొటీన్ కు భిన్నంగా జరిగే గోల్డెన్ ప్రెస్ పార్టీ అని, తాను కూడా ఈ పార్టీలో జాయిన్ అవుతానని చెప్పారు. ఇందులో భాగంగా తనని మంచి ప్రశ్న అడిగిన వారికి గోల్డ్ కాయిన్స్ గిఫ్టుగా ఇస్తానని తెలిపారు.

"రిలీజ్ కి ముందు మీడియాకి పార్టీ అరేంజ్ చేస్తున్నాను. ప్రెస్ మీట్ కాకుండా ప్రెస్ పార్టీ ఏర్పాటు చేస్తున్నా. నేనూ మీతో పాటు చివరి వరకూ ఉంటాను. జనరల్ గా జరిగే మీడియా Q&A సెషన్ మాదిరిగా కాకుండా.. అందరూ ఒక క్లబ్ లో రౌండ్ టేబుల్ లో కూర్చొని మాట్లాడుకున్నట్లు ప్రెస్ పార్టీ నిర్వహిస్తాం. ఇది గోల్డెన్ ప్రెస్ పార్టీ. మంచి ప్రశ్న అడిగిన వారికి గోల్డ్ కాయిన్స్ ఇస్తా. పది మందికి ఇద్దాం అనుకుంటున్నా. ప్రశ్నలు-సమాధానాలు అయిపోయిన తర్వాత పార్టీ చేసుకుందాం" అని విశ్వక్ సేన్ అన్నారు.

ఇదే ఇంటర్వ్యూలో తాను తాగే మందు బ్రాండ్ గురించి విశ్వక్ సేన్ వెల్లడించారు. రాన్ జకాపా అనే లిక్కర్ బ్రాండ్ తాగుతానని, దాన్ని చెరుకుతో తయారు చేస్తారని, ఉదయాన్నే హ్యాంగోవర్ ఉండదని తెలిపారు. అయితే ఆ బ్రాండ్ ఇక్కడ దొరకదని, బయటి నుంచి తెప్పించుకోవాలని చెప్పారు. దొరకని బ్రాండ్ అలవాటు చేసుకోవడం ప్లస్ అని, అది లేనప్పుడు నోరుమూసుకుని కూర్చోవచ్చని అన్నారు. అయినా ఇప్పుడు డ్రింక్ చేయడం బాగా తగ్గిపోయిందని, నెలకో 20 రోజులకో ఒకసారి తీసుకుంటున్నానని తెలిపారు. న్యూ ఇయర్ కి కొత్తగా ప్రయత్నిస్తున్నానని, కొట్టాలనుకున్న సినిమాలకి రకరకాల డిమాండ్స్ ఉన్నాయని, దానికి తగ్గట్లుగా నోటికి తాళం పడుతుందని విశ్వక్ సేన్ చెప్పుకొచ్చారు.

ఇక 'మెకానిక్ రాకీ' సినిమా విషయానికొస్తే.. ఇప్పటికే రిలీజైన ప్రమోషనల్ కంటెంట్ ఆకట్టుకుంది. క్లాస్ మెచ్చిన మాస్ మెకానిక్ కథను చూపించబోతున్నట్లు తెలుస్తోంది. ఇందులో విశ్వక్ సేన్ సరసన మీనాక్షి చౌదరి, శ్రద్ధా శ్రీనాథ్ హీరోయిన్లుగా నటించారు. సునీల్ విలన్ పాత్ర పోషించారు. రామ్ తాళ్లూరి సమర్పణలో ఎస్‌ఆర్‌టి ఎంటర్టైన్‌మెంట్ బ్యానర్‌ పై రజనీ తాళ్లూరి ఈ చిత్రాన్ని నిర్మిస్తున్నారు. జేక్స్ బెజోయ్ మ్యూజిక్ అందిస్తున్నారు. ఈ సినిమా నవంబర్ 22న ప్రపంచ వ్యాప్తంగా విడుదల కానుంది. వచ్చే ఏడాది వాలెంటైన్స్ డేకి విశ్వక్ 'లైలా' అనే సినిమాతో రాబోతున్నారు.