మెకానిక్ రాకీ భయపడ్డాడా?

టాలీవుడ్‌లో మళ్లీ కొత్త వీకెండ్‌లో సినిమాల జాతరకు రంగం సిద్ధమవుతోంది. ఈ శుక్రవారం ఏకంగా ఆరు సినిమాలు రిలీజ్ కాబోతున్నాయి. అందులో మూడు కొంత బజ్ క్రియేట్ చేశాయి. ఆ మూడింట్లో ఎక్కువ అంచనాలున్నది ‘మెకానిక్ రాకీ’ మీదే. జీబ్రా, దేవకీ నందన వాసుదేవ కూడా కొంతమేర ప్రేక్షకుల దృష్టిని ఆకర్షిస్తున్నాయి.

విశ్వక్సేన్ సినిమా అంటే సోషల్ మీడియాలో మంచి హైపే వస్తుంది. తన సినిమా గురించి ఏదో ఒకటి సెన్సేషనల్‌గా మాట్లాడి ప్రేక్షకుల దృష్టిని ఆకర్షిస్తుంటాడు విశ్వక్. ‘మెకానిక్ రాకీ’ గురించి ముందు జనాలకు పెద్దగా తెలియలేదు కానీ.. ట్రైలర్ లాంచ్ టైంలో విశ్వక్ సినిమా గురించి చాలా కాన్ఫిడెంట్‌గా మాట్లాడి బజ్ క్రియేట్ చేశాడు.సినిమా 22న రిలీజ్ అవుతుండగా.. ముందు రోజే పెయిడ్ ప్రిమియర్స్ వేస్తున్నామని.. ఆ రోజు సినిమా చూసి ఎవరైనా బాలేదంటే తర్వాతి రోజు థియేటర్లకు వెళ్లొద్దని చెప్పాడు.

విశ్వక్ కాన్ఫిడెన్స్ చూస్తే సినిమాలో బలమైన కంటెంట్ ఉంటుందనే అనుకున్నారు. విశ్వక్ ఫ్యాన్స్‌తో పాటు సామాన్య ప్రేక్షకులు కూడా పెయిడ్ ప్రిమియర్స్ కోసం ఎదురు చూశారు. సినిమా మీద బలమైన నమ్మకం ఉన్నపుడు ముందు రోజు పెయిడ్ ప్రిమియర్స్ వేయడం ఇప్పుడు ట్రెండుగా మారింది. ఇది కొన్ని సినిమాలకు కలిసొచ్చింది. అలాగే బాలేని సినిమాలకు అది మైనస్ అయింది కూడా. ఐతే ‘మెకానిక్ రాకీ’కి పెయిడ్ ప్రిమియర్స్ పడతాయని కొన్ని వారాల ముందే ధీమాగా ప్రకటించిన విశ్వక్.. ఇప్పుడు ఆ మాటను నిలబెట్టుకోవట్లేదా అని సందేహం కలుగుతోంది.

ఈ సినిమాకు ఆల్రెడీ బుకింగ్స్ మొదలు కాగా.. ముందు రోజు పెయిడ్ ప్రిమియర్స్ ఏమీ కనిపించడం లేదు. దీంతో విశ్వక్ భయపడ్డాడా.. చిత్ర బృందం పెయిడ్ ప్రిమియర్స్ వద్దనుకుందా అనే సందేహాలు కలుగుతున్నాయి. ఐతే ఇప్పటికి షోలు ఓపెన్ కాకపోయినా.. రేపో ఎల్లుండో అయినా వాటికి ప్లానింగ్ జరిగిందంటే టీం ధీమాగా ఉన్నట్లే.