స్టార్‌ హీరో 'ఇడ్లీ కొట్టు' ఓపెన్‌ ఎప్పుడంటే..!

కోలీవుడ్‌ స్టార్‌ హీరో ధనుష్ ఈ మధ్య కాలంలో టాలీవుడ్‌లోనూ తెగ సందడి చేస్తున్నాడు. సర్‌ సినిమా తర్వాత టాలీవుడ్‌లో ధనుష్ సినిమాల కోసం ఆసక్తిగా చూసే వారి సంఖ్య భారీగా పెరిగింది. అందుకే శేఖర్ కమ్ముల దర్శకత్వంలో ఆయన నటిస్తున్న 'కుబేరా' సినిమా ఎప్పుడెప్పుడు వస్తుందా అంటూ తమిళ ప్రేక్షకుల కంటే తెలుగు ప్రేక్షకులు ఆసక్తిగా ఎదురు చూస్తున్నారు. కుబేరా సినిమాతో పాటు ధనుష్ నటిస్తున్న సినిమా 'ఇడ్లీ కడై'. ఈ సినిమాను స్వీయ దర్శకత్వంలో ధనుష్ రూపొందిస్తున్నాడు. ఈ సినిమా నుంచి సాలీడ్‌ అప్‌డేట్‌ వచ్చింది. చిత్ర యూనిట్‌ సభ్యులు విడుదల తేదీ పై క్లారిటీ ఇచ్చారు.

'ఇడ్లీ కడై' సినిమాలో ధనుష్ ముఖ్య పాత్రలో నటిస్తూ ఉండగా నిత్యా మీనన్ హీరోయిన్‌గా నటిస్తోంది. డాన్ పిక్చర్స్‌, వండర్‌ బార్‌ ఫిల్మ్స్ బ్యానర్‌లపై ఆకాష్‌ భాస్కరన్‌ ఈ సినిమాను నిర్మిస్తున్నారు. ప్రకాష్ రాజ్‌ తో పాటు షాలినీ పాండే కీలక పాత్రల్లో కనిపించబోతున్నారు. ఈ సినిమాను సమ్మర్‌ కానుకగా వచ్చే ఏడాది ఏప్రిల్‌ 10న ప్రేక్షకుల ముందుకు రాబోతుంది అంటూ అధికారికంగా ప్రకటన చేయడంతో అభిమానులు ఆనందం వ్యక్తం చేస్తున్నారు. ఇప్పటి వరకు ధనుష్ నుంచి వచ్చిన ప్రతి సినిమా మంచి విజయాన్ని సొంతం చేసుకుంది.

ధనుష్ గత చిత్రం రాయన్‌ సినిమా భారీ విజయాన్ని సొంతం చేసుకున్న విషయం తెల్సిందే. అందుకే ఈ సినిమా సైతం మంచి విజయాన్ని సొంతం చేసుకుంటుంది అనే నమ్మకం వ్యక్తం అవుతోంది. సోషల్ మీడియాలోనూ ఇడ్లీ కడై సినిమాకు మంచి రెస్పాన్స్‌ దక్కింది. ఇడ్లీ కడై ను తెలుగు లో ఇడ్లీ కొట్టుగా విడుదల చేయబోతున్నారు. తెలుగులోనూ భారీ ఎత్తున విడుదల చేయబోతున్న నేపథ్యంలో కుబేరా స్థాయి అంచనాలు ఉన్నాయి. ధనుష్ సినిమా అనగానే ఒక వర్గం ప్రేక్షకుల్లో అంచనాలు భారీగా ఉంటాయి. వారి అంచనాలకు తగ్గట్టు ఈ సినిమా ఉంటుంది.

కుబేరా సినిమాలో టాలీవుడ్‌ సీనియర్ స్టార్‌ హీరో కింగ్‌ నాగార్జున ముఖ్య పాత్రలో నటిస్తున్న నేపథ్యంలో అంచనాలు భారీగా ఉన్నాయి. శేఖర్‌ కమ్ముల దర్శకత్వంలో రూపొందుతున్న ఈ సినిమాకు సంబంధించిన షూటింగ్‌ కార్యక్రమాలు ముగింపు దశకు చేరుకున్నాయి. ఇటీవల విడుదల అయిన పోస్టర్‌ అందరి దృష్టిని ఆకర్షించింది. ఈ సినిమాలో ధనుష్ కి జోడీగా రష్మిక మందన్న నటిస్తోంది. శేఖర్‌ కమ్ముల ఇప్పటి వరకు చేసిన సినిమాలతో పోల్చితే ఈ సినిమా చాలా విభిన్నంగా ఉంటుందని తెలుస్తోంది. కుబేరా, ఇడ్లీ కొట్టు సినిమాలు కచ్చితంగా ధనుష్‌ ఫ్యాన్స్ కి ఫుల్‌ కిక్ ఇవ్వడం ఖాయం.