ఎవరున్నా లేకున్నా.. నువ్వుండాలి సుక్కు!

టాలీవుడ్ ఐకాన్ స్టార్ అల్లు అర్జున్, జీనియస్ డైరెక్టర్ సుకుమార్ కాంబోలో పుష్ప-2 తెరకెక్కుతున్న విషయం తెలిసిందే. కొన్నేళ్లుగా జరుపుకుంటున్న ఆ సినిమా షూటింగ్ ఇప్పుడు చివరి దశకు చేరుకుంది. ప్రస్తుతం మేకర్స్.. స్పెషల్ సాంగ్ ను షూట్ చేస్తున్నారు. కిస్సిక్ సాంగ్ లో డ్యాన్సింగ్ క్వీన్ శ్రీలీల కనిపించనున్నట్లు ఇప్పటికే అనౌన్స్ చేశారు. మరో రెండు మూడు రోజుల్లో ఐటెం సాంగ్ షూట్ పూర్త్తవ్వనున్నట్లు తెలుస్తోంది. ఆ తర్వాత మేకర్స్.. స్పెషల్ సాంగ్ ప్రోమోను రిలీజ్ చేయనున్నట్లు టాక్ వినిపిస్తోంది.

అయితే పుష్ప-2 రిలీజ్ కు నెల రోజుల కన్నా తక్కువ సమయమే ఉంది. ఇంకా షూటింగ్ పూర్తవ్వలేదు. సెన్సార్ కు ఫైనల్ కాపీ ఇవ్వాల్సి ఉంది. దీంతో సుకుమార్ శరవేగంగా అన్ని పనులు పూర్తి చేస్తున్నట్లు తెలుస్తోంది. నవంబర్ 20వ తేదీ లోపు ఫైనల్ కాపీ రెడీ చేస్తానని నిర్మాతలకు సుకుమార్ మాట ఇచ్చినట్లు సమాచారం. నవంబర్ 25 లోపు సెన్సార్ క్లియరెన్స్ కోసం దరఖాస్తు చేసుకునేలా ప్లాన్ చేస్తున్నారట మేకర్స్. ప్రస్తుతం ఎడిటింగ్ పై సుకుమార్ కంప్లీట్ ఫోకస్ చేసినట్లు టాక్ వినిపిస్తోంది.

సెకండాఫ్ ఎడిటింగ్ ను పూర్తి చేయాల్సి ఉందని వినికిడి. అయితే మూవీ రన్ టైమ్.. మూడుంబావు గంట‌ల దాకా వస్తుందని టాక్ వినిపిస్తోంది. మొత్తానికి సుక్కూ ఇప్పుడు ఫుల్ బిజీగా ఉన్నారన్నమాట. పది రోజుల్లో పనులన్నీ పూర్తి చేయనున్నారు. అదే సమయంలో రిలీజ్ డేట్ దగ్గరపడుతున్న వేళ పుష్ప సీక్వెల్ మేకర్స్ ప్రమోషన్స్ లో స్పీడ్ పెంచారు. దేశవ్యాప్తంగా పలు నగరాల్లో ఈవెంట్స్ ను ఏర్పాటు చేస్తున్నట్లు ఇప్పటికే అనౌన్స్ చేశారు.

అందులో భాగంగా బిహార్ లోని పట్నాలో ట్రైలర్ రిలీజ్ ఈవెంట్ ను నవంబర్ 17వ తేదీన నిర్వహించనున్నారు. ట్రైలర్ రిలీజ్ ఈవెంట్ కు స్టార్ క్యాస్టింగ్ అంతా అటెండ్ అవ్వనున్నట్లు తెలుస్తోంది. కానీ డైరెక్టర్ సుకుమార్ మాత్రం ఆ వేడుకకు హాజరవ్వడం లేదని టాక్ వినిపిస్తోంది. ప్రస్తుతం చేతి నిండా వర్క్స్ ఉండగా.. అక్కడికి వెళ్తే పని పెండింగ్ ఉండిపోతుందని భావించి ఈవెంట్ కు దూరంగా ఉండనున్నారట. దీంతో ఇప్పుడు ఈ విషయం వైరల్ గా మారగా.. నెటిజన్లు స్పందిస్తున్నారు.

సుకుమార్ ఇప్పటికీ బిజీగా ఉంటే.. ప్రమోషన్స్ సంగతేంటి అని క్వశ్చన్ చేస్తున్నారు. క్యాస్టింగ్ ఎంత సందడి చేసినా.. వారికి మించి సుకుమార్ ప్రమోషన్స్ ను భారీగా చేపట్టాలని చెబుతున్నారు. వరుస ఇంటర్వ్యూలు ఇవ్వాలని అంటున్నారు. అది నిజమనే చెప్పాలి. ఎందుకంటే ఒక సినిమా గురించి దర్శకుడికి తెలిసినంత ఎవరికీ తెలియదు. దానికి తోడు సుకుమార్.. ప్రమోషన్స్ లో తన సినిమా గురించి తెలివి గా ఎక్స్ ప్లెయిన్ చేస్తూ ఉంటారు.

కాబట్టి ఆయన విడుదలకు ముందు వరుసగా ప్రమోషన్స్ లో పాల్గొనాల్సిన అవసరం ఎంతైనా ఉంది. ఇప్పటికే మూవీపై భారీ అంచనాలు నెలకొనగా.. క్యూరియాసిటీ ఇంకా పెరగాలంటే ఓ రేంజ్ లో ప్రమోట్ చేయాల్సిందే. పుష్ప-1 టైమ్ లో తెలుగులో ఒకటో రెండో ఇంటర్వూలు మాత్రమే ఇచ్చారు సుక్కూ. ఈసారి అలా కాకుండా.. సీక్వెల్ భారీ అంచనాల మధ్య రిలీజ్ అవుతుందని కనుక.. పెద్ద ఎత్తున ఇంటర్వ్యూలు ఇవ్వాలి. అదే సమయంలో రిలీజ్ కు ముందు జరగనున్న బిగ్గెస్ట్ ప్రమోషనల్ (ట్రైలర్ రిలీజ్) ఈవెంట్ కు సుకుమార్ అటెండ్ అవ్వాలి. మరి ప్రమోషన్స్ విషయంలో సుక్కూ ఎలాంటి నిర్ణయం తీసుకుంటారో వేచి చూడాలి.