యువ‌రాజ్ సింగ్ బ‌యోపిక్‌లో ర‌ణ‌బీర్?

2007- T20 ప్రపంచ కప్‌లో ఒకే ఓవర్‌లో ఆరు సిక్సర్లు కొట్టిన ఏకైక భారతీయ క్రికెటర్‌గా రికార్డులు సృష్టించిన‌ ఎడమచేతి వాటం ఆల్ రౌండర్, మాజీ భారత క్రికెటర్ యువరాజ్ సింగ్ మైదానంలో, మైదానం వెలుపల పోరాట యోధుడు. యువీ అని ప్రేమగా పిలుచుకునే యువ‌ క్రికెటర్ శనివారం మధ్యాహ్నం కోల్‌కతాలో మీడియాతో మాట్లాడుతూ ఒక‌వేళ బ‌యోపిక్ చేస్తే, రణబీర్ కపూర్ తన బయోపిక్ చేయాలనే కోరికను వ్యక్తం చేశాడు.

ర‌ణ‌బీర్ తప్ప వేరొక‌రు స‌రితూగ‌ర‌ని యూవీ అన్నాడు. తన బయోపిక్‌కి ఏ నటుడైతే సరైన ఎంపిక? అని అడిగినప్పుడు యువ‌రాజ్ పైవిధంగా స్పందించాడు. నేను ఇటీవల యానిమల్‌ని చూశాను. నా బయోపిక్‌కి రణబీర్ కపూర్ సరిగ్గా సరిపోతాడని నేను భావిస్తున్నాను. కానీ చివరికి అది దర్శకుడి చేతిలో ఉంటుంది. నేను ఖచ్చితంగా దానిపై పని చేస్తున్నాను..త్వరలో కొన్ని శుభవార్తలను అందిస్తాను అని యువ‌రాజ్ అన్నారు.

రణబీర్ కపూర్ చివ‌రిగా న‌టించిన 'యానిమల్' కేవలం 17 రోజుల్లో రూ. 500 కోట్ల క్లబ్‌లోకి ప్రవేశించింది. ఇప్ప‌టికి ప్రపంచవ్యాప్తంగా బాక్సాఫీస్ కలెక్షన్ పరంగా 900 కోట్ల మార్కును దాటింది. ర‌ణ‌బీర్ ఇంత‌కుముందు సంజ‌య్ ద‌త్ బ‌యోపిక్ లో అద్భుతంగా న‌టించాడు. ఒక‌వేళ యూవి బ‌యోపిక్ లో న‌టించాల్సి వ‌స్తే ఇది బ‌యోపిక్ కేట‌గిరీలో అత‌డికి రెండో అవ‌కాశంగా భావించాలి.