షాకింగ్... క్వాలిటీ టెస్ట్ ఫెయిలైన పారాసిటమాల్!

చాలా మందికి పారాసిటమాల్ అనేది అత్యంత రెగ్యులర్ ట్యాబ్లెట్ అనే చెప్పాలి. కాస్త జ్వరం వచ్చినా, తలబాదగా అనిపించినా, బాడీ పెయిన్స్ వచ్చినా, జలుబుగా అనిపించినా... వెంటనే పారాసిటమాల్ ట్యాబ్లెట్ వేసేసుకుంటుంటారు చాలా మంది! అయితే తాజాగా ఓ షాకింగ్ విషయం తెరపైకి వచ్చింది. పారాసిటమాల్ క్వాలిటీ టెస్ట్ లో ఫెయిలైంది!

అవును... కాల్షియం, విటమిన్ డీ 3 సప్లిమెంట్స్, యాంటీ డయాబెటిస్ మాత్రలు, అధిక రక్తపోటు మందులు సహా 50 కంటే ఎక్కువ మందులు భారతదేశ డ్రగ్స్ రెగ్యులేటర్ నాణ్యత పరీక్షలో విఫలమయినట్లు తెలుస్తోంది. కర్నాటక యాంటీబయాటిక్స్ & ఫార్మాస్యూటికల్స్ లిమిటెడ్ నుంచి పారాసెటమాల్ మాత్రలు కూడా న్యాణ్యత సమస్యలు ఎదుర్కొందని అంటున్నారు!

తాజాగా సెంట్రల్ డ్రగ్స్ స్టాండర్డ్స్ కంట్రోల్ ఆర్గనైజేషన్ (సీ.డీ.ఎస్.సీ.ఓ).. 53 ఔషదాలను "నాట్ ఆఫ్ స్టాండర్డ్ క్వాలిటీ (ఎన్.ఎస్.క్యూ) హెచ్చరిక"గా ప్రకటించింది.

ఇందులో... విటమిన్ సి, డి 3 మాత్రలు షెల్కాల్, విటమిన్ సీ సాఫ్ట్ జెల్స్, విటమిన్ బీ కాంప్లెక్స్, పారాసెటమాల్ ట్యాబ్లెట్స్ ఐపీ 500 ఎంజీ, యాంటీ యాసిడ్ పాన్-డి, యాంటీ డయాబెటిక్ డ్రగ్ గ్లిమొపిరైడ్ మొదలైన.. అత్యధికంగా అమ్ముడవుతున్న 53 మందులు డ్రగ్ రెగ్యులేటర్ ద్వారా నాణ్యత తనిఖిల్లో విఫలమయ్యాయని అంటున్నారు.

ఈ మందులను హిందుస్థాన్ యాంటీబయాటిక్స్ లిమిటెడ్, హెటెరో డ్రగ్స్, అల్కేం లేబొరేటరీస్, కర్ణాటక యాంటీబయాటిక్స్ & ఫార్మాస్యూటికల్స్ లిమిటెడ్, ప్యూర్ & క్యూర్ హెల్త్ కేర్, మెగ్ లైఫ్ సైన్సెస్ తయారు చేస్తున్నాయని అంటున్నారు. కడుపు ఇన్ఫెక్షన్ చికిత్సకు వాడే మెట్రోనిడాజో కూడా నాణ్యత పరీక్షల్లో విఫలమైనట్లు చెబుతున్నారు.

ఇదే సమయమో... టోరెంట్ ఫార్మాస్యూటికల్స్ ద్వారా పంపిణీ చేయబడిన, ఉత్తరాఖండ్ కు చెందిన ప్యూర్ & క్యూర్ హెల్త్ కేర్ ద్వారా తయారుచేయబడిన షెల్కాల్ కూడా పరీక్షణల్లో ఫెయిల్ అయిన వాటిలో ఒకటిగా ఉంది. కోల్ కతా డ్రగ్స్ టెస్టింగ్ ల్యాబ్ ఆల్కెం హెల్త్ సైన్స్ యాంటీబయాటిక్స్ క్లావం 625, పాన్ డీలను నకిలీగా పరిగణించినట్లు చెబుతున్నారు.