జమ్మలమడుగులో జగడం..వైసీపీకి ఆదినారాయణ రెడ్డి వార్నింగ్!

మాజీ సీఎం జగన్ సొంత ఇలాకా కడపలో కూడా గత ఎన్నికల్లో వైైసీపీకి ఎదురుగాలి వీచిన సంగతి తెలిసిందే. జగన్ మినహా సీనియర్, జూనియర్ నేతలలో చాలా మంది ఓటమిపాలయ్యారు. ఈ క్రమంలోనే పులివెందుల సహా కడపలో టీడీపీ, బీజేపీ బలపడడ్డాయి. దీంతో, వైసీపీ-టీడీపీ, బీజేపీ నేతల మధ్య మాటల తూటాలు పేలుతున్నాయి. ముఖ్యంగా వైఎస్ ఫ్యామిలీకి కొరకరాని కొయ్యగా ఉన్న జమ్మలమడుగు ఎమ్మెల్యే ఆదినారాయణ రెడ్డి...వైసీపీ నేతలపై విమర్శలతో విరుచుకుపడుతున్నారు. ఈ క్రమంలోనే ఆదినారాయణ రెడ్డి వర్సెస్ వైసీపీ ఎమ్మెల్సీ రామ సుబ్బారెడ్డి అన్న రీతిలో మాటల యుద్ధం పీక్ స్టేజికి చేరింది.

దీంతో, ఎప్పుడు ఏం జరుగుతుందో అన్న ఆందోళనతో ఇరు పార్టీలకు చెందిన కార్యకర్తలు ఉన్నారు. ఎవరికి వారు వెనక్కి తగ్గే సమస్యే లేదంటూ మాటల తూటాలు పేలుస్తుండడంతో జమ్మలమడుగులో హై టెన్షన్ వాతావరణం ఏర్పడింది. రామసుబ్బారెడ్డి కుటుంబానికి, ఆదినారాయణ రెడ్డి కుటుంబానికి నాలుగు దశాబ్దాలుగా నడుస్తున్న ఫ్యాక్షన్ వార్ కాస్తా ఇపుడు పొలిటికల్ వార్ గా మారింది. దాడులకు ప్రతిదాడులు తప్పవని రామసుబ్బారెడ్డి చేసిన కామెంట్లు కాక రేపాయి. ఒకరు వైడ్ బాల్ అయితే , మరొకరు నోబాల్ అంటూ వైసీపీ నేతలపై ఆదినారాయణ రెడ్డి ఆ కామెంట్లకు కౌంటర్ ఇచ్చారు.

సూపర్ సిక్స్ పథకాలలంటూ ప్రజలను మభ్యపెట్టి అధికారంలోకి వచ్చారని, గండికోట, రాజోలు ప్రజలకు ఇచ్చిన హామీలు ఇంకా నెరవేర్చలేదని రామ సుబ్బారెడ్డి అన్నారు. సిక్స్ కొట్టడానికి ఆదినారాయణ రెడ్డికి బ్యాట్ లేస్తుందా అంటూ రామసుబ్బారెడ్డి చేసిన వ్యాఖ్యలు వివాదానికి దారి తీశాయి. ఒకటి కాదు చాలా సిక్సర్లు కొడతానని, తాను ఫుట్బాల్ కూడా ఆడతానని కౌంటర్ ఇచ్చారు ఆదినారాయణ రెడ్డి. తాను తన్నే బంతి వైసీపీ నాయకుల మూతులు పగలగొడుతుందని ఎద్దేవా చేశారు. నోటికొచ్చినట్లు మాట్లాడితే అడ్డంగా నరుకుతామంటూ వైసీపీ నేతలకు ఆదినారాయణ రెడ్డి డెడ్లీ వార్నింగ్ ఇచ్చారు.