కుమార్తె ప్రైవేటు వీడియోలు బయటకు... వీడు తండ్రేనా..?

ఇటీవల కాలంలో ఆడపిల్లల పాలిట కుటుంబ సభ్యులు, కన్నవారు, బంధువులే కాలయములుగా మారుతున్న సంఘటనలు ఎన్నో వెలుగు చూస్తున్నాయి. కంచే చేనే మేసినట్లుగా.. కాపాడాల్సిన వారే వారి జీవితాలను నాశనం చేస్తున్నారు. పైగా పరువు హత్యలు పేరున జరుగుతున్న దారుణాలు మరికొన్ని. ఈ క్రమంలో తాజాగా కూతురు జీవితాన్ని నాశనం చేసిన తండ్రి వ్యవహారం తాజాగా వెలుగులోకి వచ్చింది.

అవును... తాను చెప్పిన మాట వినడం లేదని ఓ తండ్రి రాక్షసుడిగా మారిపోయాడు! ఆమెకు మంచి భవిష్యత్తు ఇవ్వాల్సిన అతడు.. ఆమె జీవితం అర్ధాంతరంగా ముగిసిపోయే పరిస్థితి కల్పించాడు. దీంతో... తన కుమర్తె జీవితాన్ని నాశనం చేస్తున్నాడంటూ తల్లి పోలీసులను ఆశ్రయించడంతో ఈ విషయం వెలుగులోకి వచ్చింది. ఈ ఘటన కర్నాటకలో జరిగింది!

వివరాళ్లోకి వెళ్తే... కర్ణాటకలోని ఉడిపికి చెందిన ఓ వ్యక్తి కుమార్తె (18) సమీప బంధువైన ఓ కుర్రాడిని ఇష్టపడింది. అయితే వీరి ప్రేమ వ్యవహారం యువతి తండ్రికి తెలిసిందే. వీరి ప్రేమకు అతడు అంగీకారం తెలపలేదు. తనకు ఇష్టం లేదని చెబుతూ రోజూ కుమార్తెను వేధింపులకు గురిచేసేవాడు. ఈ సమయంలో అడ్డొచ్చిన తల్లినీ చితక బాదేవాడు.

ఇదే క్రమంలో ఒక రోజు తన కుమర్తె ప్రేమించిన యువకుడిని ఇంటికి పిలిపించి మరీ చేయిచేసుకున్నాడు. ఆ సమయంలోనే అతడి మొబైల్ ఫోన్ లో ఉన్న యువతి వ్యక్తిగత వీడియోలను బలవంతంగా తీసుకున్నాడు. అలా అని వాటిని డిలీట్ చేయలేదు సరికదా... ఏకంగా ఆ వీడియోలను సోషల్ మీడియాలో షేర్ చేసేశాడు.

దీంతో ఆ అమ్మాయి వీడియోలు ఒక్కసారిగా నెట్టింట వైరల్ గా మారాయి! దీంతో ఆ అవమానం తాళలేక ఆ యువతి ఆత్మహత్యకు పాల్పడింది. అయితే సకాలంలో స్పందించిన బంధువులు ఆమెను ఆసుపత్రికి తరలించడంతో ప్రాణాలతో బయటపడింది. ఈ నేపథ్యంలోనే ఇక అతడి వేధింపులు భరించలేక పోలీసులకు ఫిర్యాదు చేసింది ఆ యువతి తల్లి. దీంతో... కేసు నమోదు చేసుకున్న పోలీసులు విచారణ చేపట్టారు.