ఈసీకి బీఆర్ఎస్.. కాంగ్రెస్ లు ఇచ్చిన ఫిర్యాదుల్లో ఏముంది?

తెలంగాణలో జరుగుతున్న అసెంబ్లీ ఎన్నికల వేడి అంతకంతకూ రాజుకుంటోంది. నామినేషన్ల ప్రక్రియ ఒక కొలిక్కి వచ్చి.. రిజెక్టు చేసే వారి జాబితాలు విడుదలవుతున్న వేళలో.. అధికార బీఆర్ఎస్.. విపక్ష కాంగ్రెస్ లు ఒకరిపై ఒకరు ఎన్నికల సంఘానికి పోటాపోటీగా ఫిర్యాదులు చేసుకుంటున్నారు. ఈ సందర్భంగా ఒకరిపై ఒకరు కంప్లైంట్లు చేసుకుంటూ.. చర్యలు తీసుకోవాలంటూ డిమాండ్ చేస్తున్నారు.

ఇంతకూ ఈ రెండు పార్టీలు చేస్తున్న ఫిర్యాదులేంటి? వారు కోరుకుంటున్నదేంటి? వారి వాదనలు ఏమిటి? అన్నది ఆసక్తికరంగా మారింది. సోమవారం బీఆర్ఎస్.. కాంగ్రెస్ పార్టీలకు చెందిన ముఖ్యులు ఎన్నికల సంఘం అధికారుల్ని కలిసి తమ అభ్యంతరాల్ని తెలియజేశారు. ఈ రెండు పార్టీల అభ్యంతరాలు ఏమిటి? వారి ఫిర్యాదుల్లో ఏముంది? అన్న విషయాల్లోకి వెళితే..

బీఆర్ఎస్ వాదన కం ఫిర్యాదులు ఇవే..

- పచ్చగా ఉండే తెలంగాణను హింసాత్మకంగా చేసేందుకు ఎన్నికల ముందే కాంగ్రెస్ పార్టీ కుట్రలు పన్నుతోంది. టీపీసీసీ చీఫ్ రేవంత్ రెడ్డి.. హింసను ప్రేరేపించేలా వ్యాఖ్యలు చేస్తున్నారు. క్యాడర్ ను రెచ్చగొట్టేలా వ్యాఖ్యలు చేస్తున్నారు.

- దుబ్బాక.. అచ్చంపేట ఘటనలు చూసినా.. దుబ్బాక ఎమ్మెల్యే అభ్యర్థి ప్రభాకర్ రెడ్డి పరిస్థితి ఇప్పటికి సీరియస్ గానే ఉంది. ఎమ్మెల్యేలు.. ఎమ్మెల్యే అభ్యర్థులపై దాడులు జరిగితే రేవంత్.. కనీసం మానవత్వం లేకుండా మాట్లాడుతున్నారు.

- పదేళ్లుగా బీఆర్ఎస్ ప్రభుత్వంలో ఎక్కడైనా ఇలాంటి ఘటనలు జరిగాయా? ఇప్పుడు జరుగుతున్న ఘటనలు ఎవరి వల్ల జరుగుతున్నాయో తెలుసుకోవాలి.

- రేవంత్ కు టీడీపీ తల్లి పార్టీ అయితే.. కాంగ్రెస్ అత్తపార్టీ అంటున్నారు. కాంగ్రెస్ పార్టీకి టీడీపీకి అంతర్గత ఒప్పందం కుదిరింది. స్టార్ క్యాంపెయినర్ గా ఉన్న రేవంత్ భాష మారాలి. టీపీసీసీ చీఫ్ రేవంత్ ను ఎన్నికల ప్రచారం నుంచి తొలగించాలి.

- కాంగ్రెస్ పార్టీ వారు మీడియా సర్టిఫికేషన్ మానిటరింగ్ కమిటీకి చూపించిన ప్రకటనలు ఒకటి.. బయట ప్రచారానికి వినియోగిస్తున్నవి వేరేగా ఉన్నాయి.

ఎన్నికల సంఘానికి కాంగ్రెస్ చేసిన ఫిర్యాదులివే..

- జోగులాంబ గద్వాల్ జిల్లా అలంపూర్ బీఆర్ఎస్ అభ్యర్థి అఫిడవిట్ పై అభ్యంతరం వ్యక్తం చేశారు. ప్రభుత్వ ఉద్యోగానికి రాజీనామా విషయంలో స్పష్టత లేదన్నది కాంగ్రెస్ ఆరోపణ. దీంతో పాటు ఇతర అంశాలు ఉన్నాయి.

- యాడ్స్ పై బీఆర్ఎస్ చేసిన ఆరోపణలపై స్పందిస్తూ.. సీఆవో ఆఫీస్ నుంచి కాంగ్రెస్ పార్టీ విడుదల చేసిన నాలుగు వీడియోల్ని నిలిపివేయాలని నోటీసులు వచ్చాయి. మేం ప్రచారం చేసే ప్రతి యాడ్ కు అనుమతి తీసుకున్నాం.

- యాడ్స్ ను ఆపటానికి మాకు నేరుగా నోటీసులు ఇవ్వకుండా టీవీ చానళ్లకు నోటీసులు ఎందుకు ఇస్తున్నారు?

- రాష్ట్ర వ్యాప్తంగా కొంతమంది పోలీసులు మా అభ్యర్థులను..కార్యకర్తలపైనా బెదిరింపులకు దిగుతున్నారు. రాష్ట్రంలో పోలీసులు బీఆర్ఎస్ కు అనుకూలంగా పని చేస్తున్నారు.

- మేం ఎంసీఎంసీకి ఇచ్చిన యాడ్స్.. టీవీలకు ఇచ్చిన యాడ్స్ ఒకటే. కావాలంటే.. రెండింటిని ఒకేచోట పెట్టి చూస్తే సరిపోతుంది.

- యాడ్స్ పై టీవీ చానళ్లకు ఇచ్చిన నోటీసులపై ఎన్నికల సంఘం రివ్యూ చేయాలి.