టికెట్ దక్కినా.. ఎమ్మెల్యేల్లో టెన్షన్!

అన్ని పార్టీల కంటే ముందుగానే 115 స్థానాల్లో అభ్యర్థులను ప్రకటించి అధికార బీఆర్ఎస్ ఎన్నికల సమర శంఖం పూరించింది. కొన్ని చోట్ల టికెట్లు దక్కని అభ్యర్థుల నుంచి అసమ్మతి ఎదురవుతున్నా బుజ్జగిస్తూ బీఆర్ఎస్ సాగుతోంది. టికెట్లు ఆశించి భంగపడ్డ నేతల్లో నిరాశ ఉండటం సహజమే. కానీ టికెట్ దక్కిన ఎమ్మెల్యేల్లోనూ ఇప్పుడు టెన్షన్ కనిపిస్తుండటం చర్చనీయాంశంగా మారింది. టికెట్ దక్కిందనే ఉత్సాహంతో ఎన్నికల కోసం ఏర్పాట్లు చేసుకోవాల్సింది పోయి కొంతమంది ఎమ్మెల్యేలు ఆందోళన చెందుతున్నట్లు తెలిసింది. ఎన్నికల సమయం నాటికి తమ టికెట్ ఉంటుందో ఊడుతుందో అనేదే వీళ్ల భయానికి కారణమని చెప్పాలి.

బీఆర్ఎస్ అధినేత, సీఎం కేసీఆర్ వ్యూహాత్మకంగానే 115 స్థానాలకు అభ్యర్థులను ప్రకటించారనే అభిప్రాయాలు వ్యక్తమవుతున్నాయి. అధిక సంఖ్యలో సిట్టింగ్ లకు మళ్లీ అవకాశం ఇచ్చారు. దీంతో టికెట్ దక్కిందానే భరోసాతో వీళ్లు ఇతర పార్టీల వైపు చూడరన్నది ఇక్కడ కేసీఆర్ ఆలోచనగా కనిపిస్తోంది. కానీ వీళ్లలో చాలా మందిపై ప్రజల్లో వ్యతిరేకత ఉంది. ఈ విషయం కూడా కేసీఆర్కు తెలుసు. కానీ ఇప్పుడు టికెట్ ఇవ్వకుండా పక్కనపెడితే.. ప్రత్యర్థి పార్టీల్లోకి జంప్ అయి బీఆర్ఎస్కు వ్యతిరేకంగా ఎన్నికల్లో పోటీపడే ప్రమాదముంది. ఈ విషయాన్ని అంచనా వేసే కేసీఆర్ సిట్టింగ్లకు మరోసారి ప్రాధాన్యత ఇచ్చారని చెబుతున్నారు.

కానీ ఎన్నికల సమయం నాటికి ముందుగా ప్రకటించిన అభ్యర్థుల జాబితాలో కచ్చితంగా మార్పులుంటాయనేది బీఆర్ఎస్ వర్గాలే చెబుతున్న మాట. మరోవైపు ప్రత్యర్థి పార్టీలు కూడా ఇదే అంటున్నాయి. తాజాగా బీఆర్ఎస్ వర్కింగ్ ప్రెసిడింట్, మంత్రి కేటీఆర్ కూడా ఇదే విషయాన్ని వెల్లడించారు. అభ్యర్థుల జాబితాలో ఒకటో రెండో మార్పులు ఉంటాయని చెప్పారు. కానీ 30 కంటే ఎక్కువ స్థానాల్లోనే అభ్యర్థులను మార్చే అవకాశం ఉన్నట్లు ప్రచారం సాగుతోంది. ఇప్పుడిదే కొంతమంది టికెట్లు లభించిన ఎమ్మెల్యేల్లో టెన్షన్కు కారణమవుతోంది. చివరి వరకు ఏం జరుగుతుందో తెలియక ఆందోళన చెందుతున్నారు. ముందే పార్టీ మారితే నష్టం జరుగుతుందేమోనని ఆలోచిస్తున్నారు. కానీ చివరి వరకూ వేచి చూస్తే ఇతర పార్టీలు అభ్యర్థులను ప్రకటించేస్తాయి. దీంతో ఏం చేయాలో తెలియక టెన్షన్ కు గురవుతున్నారని టాక్.