ట్రంప్ 104% సుంకాలు.. భయపడేదే లేదంటున్న చైనా
ఈ సంవత్సరం చైనా స్థూల ఆర్థిక విధానాలు వివిధ అనిశ్చితులను పూర్తిగా పరిగణనలోకి తీసుకున్నాయని లీ కియాంగ్ చెప్పారు.;
అమెరికా అధ్యక్షుడు డొనాల్డ్ ట్రంప్ చైనా దిగుమతులపై విధించిన 104% సుంకాలను పూర్తిగా ఎదుర్కోవడానికి తాము సిద్ధంగా ఉన్నామని.. తగినంత విధానపరమైన సాధనాలు ఉన్నాయని చైనా ప్రధాని లీ కియాంగ్ అన్నారు. చైనా అధ్యక్షుడు షీ జిన్‌పింగ్ తర్వాత నంబర్ 2 నాయకుడు అయిన ప్రధాని లీ ఈ మేరకు సంచలన సవాల్ చేశారు. యూరోపియన్ కమిషన్ అధ్యక్షుడు ఉర్సులా వాన్ డెర్ లేయెన్‌తో జరిపిన సంభాషణలో ఈ వ్యాఖ్యలు చేశారు.
ఈ సంవత్సరం చైనా స్థూల ఆర్థిక విధానాలు వివిధ అనిశ్చితులను పూర్తిగా పరిగణనలోకి తీసుకున్నాయని లీ కియాంగ్ చెప్పారు. దేశం యొక్క ఆరోగ్యకరమైన, స్థిరమైన ఆర్థిక వృద్ధిని కొనసాగించడంపై బీజింగ్‌కు గట్టి నమ్మకం ఉందని ఆయన అన్నారు.
- డొనాల్డ్ ట్రంప్ సుంకాలను గురించి లీ కియాంగ్ ఏమి చెప్పారంటే?
అమెరికా వాణిజ్య భాగస్వాములందరిపై విధించిన శిక్షాత్మక చర్యను లీ కియాంగ్ ఏకపక్షవాదం, రక్షణవాదం , ఆర్థిక నిర్బంధానికి ఉదాహరణగా విమర్శించారు. చైనా దృఢమైన స్పందన కేవలం దాని స్వంత ప్రయోజనాలను కాపాడటమే కాకుండా అంతర్జాతీయ వాణిజ్య నియమాలను కూడా సమర్థించడమని ఆయన వాన్ డెర్ లేయెన్‌తో అన్నారు. "రక్షణవాదం ఎక్కడికీ దారితీయదు.. బహిరంగత , సహకారం అందరికీ సరైన మార్గం" అని ఆయన పేర్కొన్నారు.
చైనా ప్రధాని యూరోపియన్ యూనియన్‌ను బీజింగ్‌తో కమ్యూనికేషన్‌ను బలోపేతం చేయాలని.. వ్యూహాత్మక సహకారం.. వాణిజ్యంపై కొత్త రౌండ్ ఉన్నత స్థాయి చర్చలు జరపాలని కూడా కోరారు.
- డొనాల్డ్ ట్రంప్ సుంకాలను గురించి షీ జిన్‌పింగ్ ప్రభుత్వం ఏమి చెప్పింది?
అమెరికా "పరస్పర" పన్నులకు ప్రతీకారం తీర్చుకుంటామని షీ జిన్‌పింగ్ ప్రభుత్వం ప్రతిజ్ఞ చేసిన నేపథ్యంలో ఈ పరిణామాలు చోటుచేసుకున్నాయి.. అయితే డొనాల్డ్ ట్రంప్ "చైనా కూడా ఒప్పందం చేసుకోవాలని చాలా కోరుకుంటోంది" అని పేర్కొన్నారు. బీజింగ్ నుండి పిలుపు కోసం తాను ఎదురు చూస్తున్నానని అమెరికా అధ్యక్షుడు అన్నారు. ఆ తర్వాత వైట్ హౌస్ ప్రెస్ సెక్రటరీ కరోలిన్ లేవిట్ డొనాల్డ్ "చైనా నాయకత్వం సంప్రదిస్తే దయతో ఉంటారు" అని అన్నారు.
- ట్రంప్ సుంకల కారణంగా అమెరికా స్టాక్ మార్కెట్ పతనం
డొనాల్డ్ ట్రంప్ వాణిజ్య యుద్ధం యొక్క ప్రభావం తో పెట్టుబడిదారులు కంగారుపడుతున్నారు. అమెరికా స్టాక్ మార్కెట్లు మంగళవారం మరింత పతనమయ్యాయి. తొలుత 4.1% లాభంతో ప్రారంభమైనప్పటికీ S&P 500 సూచీ 3% నష్టపోయింది, ఆ తర్వాత 1.6%కి తగ్గింది. ఫిబ్రవరిలో నమోదైన రికార్డు స్థాయి కంటే ఈ సూచీ దాదాపు 19% దిగువన ఉంది. డౌ జోన్స్ ఇండస్ట్రియల్ యావరేజ్ 320 పాయింట్లు లేదా 0.8% నష్టపోయింది, అంతకుముందు 1,460 పాయింట్ల పెరుగుదలను కోల్పోయింది. అదే సమయంలో, నాస్‌డాక్ కాంపోజిట్ 2.1% పడిపోయింది.
మొత్తంగా అమెరికా ఎంత పన్నులు వేసినా తగ్గేదే లేదని.. తమ సాధనాలు తమకు ఉన్నాయని చైనా స్పష్టం చేసింది.