ఆరంతస్తుల భవనం గోడ మనిషి పై పడితే... షాకింగ్ వీడియో!

క్రమబద్దీకరణ లేని నిర్మాణాలు కలిగించే ప్రమాదాలు, మిగిల్చే విషాదాలు గురించిన చర్చ తాజాగా దేశ రాజధానిలో జరిగిన ఘటన మరోసారి పెద్ద ఎత్తున తెరపైకి వచ్చింది. ఇందులో భాగంగా.. ఇటీవల ఢిల్లీలో దుమ్ము తుఫాను సమయంలో ఓ ఆరంతస్తుల భవనానికి సంబంధించిన గోడ పై నుంచి పడి ఓ వ్యక్తి మృతి చెందిన ఘటనకు సంబంధించిన వీడియో తెరపైకి వచ్చి వైరల్ గా మారింది.

అవును... శుక్రవారం దేశ రాజధానిని దుమ్ము తుఫాను చుట్టుముట్టిన సంగతి తెలిసిందే. ఆ సమయంలో స్థానిక మధు విహార్ లో గోడ కూలిన ఘటనలో ఓ వ్యక్తి మృతి చెందగా.. ఇద్దరు గాయపడ్డారు. దీనికి సంబంధించిన వీడియో వైరల్ గా మారింది. తాజాగా వెలుగులోకి వచ్చిన వీడియోలో.. నడుచుకుంటూ వెళ్తోన్న ఓ వ్యక్తిపై ఉన్నపలంగా శిథిలాలు పడిపోయాయి. దీంతో.. అతడు నెలపై పడిపోవడం కనిపించింది.

ఈ సందర్భంగా స్పందించిన తూర్పు ఢిల్లీ ఏడీసీపీ వినీత్ కుమార్... రాత్రి 7 గంటల ప్రాంతంలో తమకు పీసీఆర్ కాల్ వచ్చిందని.. తాము ఘటనా స్థలానికి చేరుకున్నప్పుడు ఆరంతస్తుల భవనం నిర్మాణం జరుగుతోందని.. ఆ భవనం గోడ కూలిపోయిందని తెలిసిందని అన్నారు. ఈ ఘటనలో ఒకరు మరణించగా.. ఇద్దరు గాయపడ్డారని.. ఆ ఇద్దరినీ స్థానిక ఆస్పత్రికి తరలించినట్లు తెలిపారు.

మరోపక్క కరోల్ బాగ్ లో దుమ్ము తుఫాను కారణంగా బాల్కనీ కూలి 13 ఏళ్ల బాలుడు గాయపడ్డాడు. ఈ సందర్భంగా స్పందించిన పోలీసులు.. నిర్మాణంలో ఉన్న నాలుగు అంతస్తుల భవనంలోని మూడవ అంతస్తులోని బాల్కనీ బలమైన గాలుల కారణంగా కూలిపోయిందని.. ఇటీవలే ఈ నిర్మాణం పూర్తయ్యిందని.. ఆ సమయంలో ప్రమాదవశాత్తు అటుగా వెళ్తున్న బాలుడిపై పడిందని తెలిపారు.

కాగా... శుక్రవారం ఢిల్లీలో బలమైన దుమ్ము తుఫాను, ఇద్దురుగాలులు, వర్షం కుదిపేశాయి! దీని కారణంగా ఢిల్లీ-ఎన్.సీ.పీ.ఆర్.లోని అనేక ప్రాంతాల్లో చెట్లు నేలకూలాయి. పలు విమానాల రాకపోకలకు అంతరాయం కలిగింది. ఈ సమయంలో సాయంత్రం వేళ దేశ రాజధానిలో అకస్మాత్తుగా మార్పు కనిపించి.. టెంపరేచర్ 10 డిగ్రీల సెల్సియస్ తగ్గిందని వాతావరణ కార్యాలయం తెలిపింది.