నా బిడ్డకు తండ్రి ఎలాన్ మస్క్... నెంబర్ 13?

ఇంతకాలం కుబేరుడిగా ప్రపంచానికి పరిచయం అయిన ఎలాన్ మస్క్.. గత ఏడాది జరిగిన అమెరికా అధ్యక్ష ఎన్నికల అనంతరం తనలోని మరో కోణాన్ని ఆవిష్కరించారు.. ఇప్పుడు ట్రంప్ 2.0లో డొజ్ సారథిగా కీలక భూమిక పోషిస్తున్నారు. ఈ సమయంలో ఓ ఆసక్తికర విషయం తెరపైకి వచ్చింది. తన బిడ్డకు మస్క్ తండ్రి అని ఓ రచయిత్రి పోస్ట్ పెట్టారు.

అవును... ఎలాన్ మస్క్ కు సంబంధించి రచయిత్రి ఆష్లీ సెయింట్ క్లెయిర్ ఓ సంచలన పోస్ట్ పెట్టారు. ఇందులో భాగంగా తన బిడ్డకు తండ్రి ఎలాన్ మస్క్ అని సోషల్ మీడియా వేదికగా ఆమె వెల్లడించారు. తమ బిడ్డ గోప్యత, భద్రత దృష్ట్యా ఈ విషయాన్ని తాను ఇంతకుముందు బహిర్గతం చేయలేదని ఆమె తాజాగా పేర్కొన్నారు.

ఈ సందర్భంగా స్పందించిన ఆమె.. తాను ఐదు నెలల క్రితం ఒక బిడ్డకు జన్మనిచ్చానని.. ఆ చిన్నారికి తండ్రి ఎలాన్ మస్క్ అని.. కొన్ని మీడియా సంస్థలు ఈ విషయాన్ని బయటపెట్టాలని ప్రయత్నించాయని.. అందుకే తానే ఈ విషయాన్ని వెల్లడిస్తున్నానని.. తమ సంతానం సురక్షిత వాతావరణంలో జీవించాలని తాను కోరుకుంటున్నానని అమె వెల్లడించారు.

తమ బిడ్డ గోప్యత, భద్రత దృష్ట్యా ఇంతకముందు తాను ఈ విషయాన్ని బహిర్గతం చేయలేదని.. ఈ సందర్భంగా తమ గోప్యతకు ఎవరూ భంగం కలిగించొద్దని విజ్ఞప్తి చేస్తున్నట్లు ఆమె తన పోస్టులో కోరారు. అయితే... ఈ వ్యవహారంపై ఎలాన్ మస్క్ నుంచి ఇంకా ఎలాంటి స్పందనా రాలేదు!

కాగా... ఎలాన్ మస్క్ కు ఇప్పటికే 12 మంది సంతానం అనే సంగతి తెలిసిందే. మస్క్ మొదటి భార్య జస్టిన్ కు జన్మించిన తొలిబిడ్డ అనారోగ్య కారణాలతో 10 వారాలకే మృతి చెందగా.. తర్వాత ఆ జంట ఐవీఎఫ్ విధానం ద్వారా ఐదుగురు పిల్లలకు జన్మనిచ్చింది. వీరిద్దరూ 2008లో విడిపోయారు.

ఆ తర్వాత బ్రిటన్ నటి తాలులాహ్ రిలేను మస్క్ వివాహమాడారు. అయితే వారికి సంతానం లేదు! ఈ క్రమంలో.. కెనడియన్ గాయని గ్రిమ్స్ తో సంబంధం నడిపారు టెస్లా సీఈఓ! అయితే.. వారికి ముగ్గురు సంతానం కలిగారు. ఈ క్రమంలో... న్యూరాలింక్ లో పనిచేస్తోన్న ఎగ్జిక్యూటివ్ తోనూ మరో ముగ్గురు పిల్లలకు జన్మనిచ్చారు ఎలాన్ మస్క్!