మరో భారీ ఘనతను సొంతం చేసుకోనున్న భారత్.. అదేమంటే?

ఒకటి తర్వాత మరొకటి అన్న రీతిలో విజయాల్ని సొంతం చేసుకుంటూ ముందుకు వెళుతున్న భారత్.. మరో ఏడాదిలో భారీ ఘనతను సొంతం చేసుకోనుంది. 2026 నాటికి ప్రపంచంలో జపాన్ ను అధిగమించి నాలుగో అతి పెద్ద ఆర్థిక వ్యవస్థగా అవతరించనుంది. ఈ అంచనాను వాళ్లు వీళ్లు కాకుండా పరిశ్రమల సంఘం.. పీహెచ్ డీసీపీఐ అంచనా వేయటమే దీనికికారణం. మార్చితో ముగిసే ప్రస్తుత ఆర్థిక సంవత్సరంలో దేశ ఏకానమీ 6.8 శాతంగా నమోదు కానుందని తేల్చింది. ఈ అంచనా భారత రిజర్వు బ్యాంక్.. ప్రభుత్వ అంచనాలకు మించి ఉండటం ఆసక్తికరంగా మారింది.

ఈ ఏప్రిల్ నుంచి కొత్త ఆర్థిక సంవత్సరం మొదలు కానున్న సంగతి తెలిసిందే. ఈ ఆర్థిక సంవత్సరంలో (2025 ఏప్రిల్ 1 నుంచి 2026 మార్చి 31వరకు) వ్రద్ధి రేటు 7.7 శాతంగా ఉంటుందన్న అంచనా వేశారు. అమెరికా.. చైనా.. జర్మనీ.. జపాన్ ల తర్వాత భారత్ ఐదో అతి పెద్ద ఆర్థిక వ్యవస్థగా కొనసాగుతోంది. ఇది కాస్తా.. తర్వాతి ఏడాదికి జపాన్ ను అధిగమించే పరిస్థితికి వస్తుందని చెబుతున్నారు.

ఫిబ్రవరి ఒకటో తేదీన కేంద్ర ఆర్థిక మంత్రి నిర్మలా సీతారామన్ లోక్ సభలో 2025-26 వార్షిక బడ్జెట్ ను సమర్పించనున్నారు. ఈ నేపథ్యంలో పీహెచ్ డీ చాంబర్ ఆఫ్ కామర్స్ అండ్ ఇండస్ట్రీ అధ్యక్షుడు హేమంత్ జైన్ కీలక ప్రకటన చేశారు. ఈ ప్రకటనలో పలు ఆసక్తికర అంశాల్ని ప్రస్తావించారు. ప్రస్తుతం రూ.15 లక్షలకు పైనే ఉన్న ఆదాయానికి 30 శాతం పన్ను రేటు వర్తిస్తోంది. అయితే.. ఈ స్థాయి పన్ను రేటును రూ.40 లక్షలకు పైన ఉన్న వారికి మాత్రమే వర్తింపచేయాలి. ఆదాయ పన్ను మినహాయింపు పరిమితిని రూ.10 లక్షలకు పెంచాలంటూ పలు అంశాల్ని ప్రస్తావించారు. ఈ పన్ను మినహాయింపు మీద మధ్యతరగతి జీవులు భారీగా ఆశలు పెట్టుకున్నారు. మరి..నిర్మలమ్మ ఏం చేస్తారో చూడాలి.