భారతదేశంలోని అతి పొడవైన బస్సు మార్గానికి బ్రేక్.. ఏమైందంటే?

పొడవైన బస్సు మార్గాలు భారతదేశంలోని రవాణా వ్యవస్థకు ప్రాముఖ్యతను తీసుకువస్తున్నాయి. ప్రయాణికులకు ఈ మార్గాలు అనువుగా ఉండటంతో పాటు, వారి ప్రయాణ అనుభవాన్ని మరింత సులభతరం చేస్తాయి. భారతదేశంలో అతి పొడవైన బస్సు ప్రయాణ మార్గం జోధ్‌పూర్ నుండి బెంగళూరు వరకు కొనసాగుతుంది. ఈ ప్రయాణం దాదాపు 2,000 కిలోమీటర్ల దూరాన్ని కవర్ చేస్తుంది, దీని కోసం 36 నుండి 50 గంటల సమయం పడుతుంది. అదే విధంగా, ముంబై-కోల్‌కతా మార్గం 1,900 కిలోమీటర్ల పొడవుతో 33 గంటల ప్రయాణ సమయాన్ని కలిగి ఉంది. బెంగళూరు-జైపూర్ మార్గం సుమారు 2,000 కిలోమీటర్ల దూరాన్ని కలిగి ఉండగా, ప్రయాణ సమయం 34 గంటలు ఉంటుంది. ఇక ముంబై-ఢిల్లీ మార్గం 1,400 కిలోమీటర్ల దూరాన్ని కవర్ చేస్తుంది, దీని కోసం సుమారు 24 గంటలు పడుతుంది.

భారతదేశంలో ఎక్కువ మంది ప్రజలు రోజువారీ రవాణా అవసరాల కోసం బస్సులను ఉపయోగిస్తారు. మెట్రో, ద్విచక్ర వాహనాలు, కార్ల వంటి ప్రయాణ సౌకర్యాలు పెరుగుతున్నప్పటికీ, చాలా మంది ఇప్పటికీ బస్సులో ప్రయాణించడానికే ప్రాధాన్యత ఇస్తున్నారు. అదనంగా, కొత్త ప్రదేశాలను సందర్శించేందుకు బస్సు ప్రయాణాన్ని ఎంతోమంది ఇష్టపడతారు. తక్షణ టిక్కెట్ల లభ్యత, సీట్ల అందుబాటు వంటి సౌకర్యాలు కూడా బస్సు ప్రయాణాన్ని ఆకర్షణీయంగా మారుస్తాయి.రోడ్డు రవాణా మంత్రిత్వ శాఖ (MoRTH) నివేదికల ప్రకారం, భారతదేశంలో దాదాపు 85% మంది ప్రజలు రహదారి మార్గంలో ప్రయాణిస్తున్నారు. ఈ సందర్భంలో, దేశంలోని కొన్ని ప్రధాన బస్సు మార్గాలు గురించి వివరంగా తెలుసుకోవడం అవసరం.

-ఈ బస్సు రూట్ కు ఇప్పుడు వివాదంతో బ్రేక్

మహారాష్ట్ర, కర్ణాటక రాష్ట్రాల మధ్య భాషా వివాదం మరోసారి ఉధృతమైంది. ఈ వివాదం మరాఠీ, కన్నడ మద్దతుదారుల మధ్య ఘర్షణలకు దారి తీసింది. వివిధ ప్రాంతాల్లో జరిగిన ఘటనల కారణంగా బస్సు సేవలు తీవ్రంగా ప్రభావితమయ్యాయి. ఇటీవల కర్ణాటకలో మహారాష్ట్ర డ్రైవర్‌పై, మహారాష్ట్రలో కర్ణాటక డ్రైవర్‌పై దాడులు చోటుచేసుకున్నాయి. ఈ పరిణామాలతో రెండు రాష్ట్రాల సరిహద్దుల్లో రవాణా సౌకర్యాలు దెబ్బతిన్నాయి, ప్రజలు తీవ్ర ఇబ్బందులను ఎదుర్కొంటున్నారు.

ఈ భాషా వివాదంలో రెండు రాష్ట్రాలు కూడా వెనక్కి తగ్గడానికై ఆసక్తి చూపడం లేదు. మహారాష్ట్ర రవాణా మంత్రి ప్రతాప్ సర్నాయక్ మాట్లాడుతూ, ప్రయాణికులు, సిబ్బంది భద్రత దృష్ట్యా కర్ణాటకకు బస్సు సేవలను రద్దు చేసినట్లు తెలిపారు. మరోవైపు, వాయువ్య కర్ణాటక రోడ్డు రవాణా సంస్థ అధికారి మహారాష్ట్రకు వెళ్లే బస్సుల సంఖ్యను తగ్గించినట్లు ప్రకటించారు. ఈ వివాదంతో పాటు, భారతదేశంలోని అతి పొడవైన బస్సు ప్రయాణాలకు తాత్కాలికంగా బ్రేక్ పడుతోంది.