శ్రీతేజ్ వద్దకు అల్లు అర్జున్ ఫ్యామిలీ!!

సంధ్య థియేటర్ లోని తొక్కిసలాట ఘటనలో తీవ్రంగా గాయపడిన బాలుడు శ్రీతేజ్ అప్పటి నుంచి కిమ్స్ ఆస్పత్రిలో చికిత్స పొందుతున్న సంగతి తెలిసిందే. మొన్నటివరకూ వెంటిలేటర్ పై ఉన్న శ్రీతేజ్ ఆరోగ్యం ఇప్పుడిప్పుడే కాస్త కుదుటిపడుతుందన్నట్లుగా సమాచారాలు తెరపైకి వస్తున్నాయి. ఈ సమయంలో అల్లు అర్జున్ ఫ్యామిలీ శ్రీతేజ్ ను పరామర్శించనున్నారని అంటున్నారు.

అవును... సంధ్య థియేటర్ లో జరిగిన తొక్కిసలాట ఘటనలో రేవతి అనే మహిళ మృతి చెందగా.. ఆమె కుమారుడు తొమ్మిదేళ్ల శ్రీతేజ్ కిమ్స్ లో చికిత్స పోందుతున్నారు. ఈ సమయంలో ఇప్పటికే పలువురు సినీ, రాజకీయ ప్రముఖులు శ్రీతేజ్ ను పరామర్శిస్తున్నారు. ఈ సమయంలో మంత్రి కోమటిరెడ్డి వెంకటరెడ్డి బాధిత కుటుంబానికి రూ.25 లక్షలు సాయం అందించారు.

మరోపక్క... పుష్ప-2 నిర్మాతలు బాలుడిని పరామర్శించి రూ.50 లక్షల చెక్ ను మంత్రి కోమటిరెడ్డి సమక్షంలో అందజేశారు. ఈ విషయాలపై స్పందించిన బాలుడి తండ్రి భాస్కర్... వీరితో పాటు అల్లు అర్జున్ రూ.10 లక్షల డీడీ అందించినట్లు తెలిపారు. ఇక దర్శకుడు సుకుమారు ఇప్పటికే పరామర్శించి వెళ్లినట్లు వెల్లడించారు.

ఈ క్రమంలో ఇటీవల అల్లు అర్జున్ తండ్రి అల్లు అరవింద్ వెళ్లి బాలుడిని పరామర్శించారు. అల్లు అర్జున్ రాకపోవడానికి కారణం న్యాయవాదుల సలహా అని తెలిపారు. ఈ నేపథ్యంలో అల్లు అర్జున్ కుటుంబ సభ్యులు శ్రీతేజ్ ను పరామర్శించే అవకాశాలు ఉన్నాయని అంటున్నారు. ఈ నేపథ్యంలో ఈ రోజు వారు కిమ్స్ కి వెళ్లబోతున్నారని తెలుస్తోంది.

ఇందులో భాగంగా... ఈ రోజు మధ్యాహ్నం తెలంగాణ ఫిల్మ్ డెవలప్ మెంట్ కార్పొరేషన్ ఛైర్మన్, నిర్మాత దిల్ రాజుతో పాటు దర్శకుడు సుకుమార్, అల్లు అరవింద్ తో పాటు మరికొంతమంది కుటుంబ సభ్యులు కిమ్స్ కు వెళ్లి శ్రీతేజ్ ను పరామర్శించే అవకాశాలున్నాయని అంటున్నారు. ఈ సందర్భంగా బాలుడి తండ్రి భాస్కర్ తో చర్చించనున్నట్లు తెలుస్తోంది.