అమెరికాలో 'లిటిల్ రెడ్ బుక్' హల్ చల్!

అగ్రరాజ్యం అమెరికాలో టిక్ ట్యాక్ బ్యాన్ అనే విషయం ఇప్పుడు నెట్టింట తీవ్ర చర్చనీయాంశంగా మారిన సంగతి తెలిసిందే. ఇదే జరిగితే సుమారు 17 కోట్ల మంది యూజర్లు ఇకపై అమెరికాలో ఈ టిక్ టాక్ యాప్ ను యాక్సిస్ చేయలేరని అంటున్నారు. ఈ సమయంలో టిక్ టాక్ స్థానంలో మరో యాప్ సందడి మొదలైందని చెబుతున్నారు. అదే.. లిటిల్ రెడ్ బుక్!

అవును... కొన్నేళ్ల క్రితం టిక్ టాక్ ను భారత్ నిషేధించిన సంగతి తెలిసిందే. భద్రతా కారణాల దృష్ట్యా నాడు భారత ప్రభుత్వం ఆ నిర్ణయం తీసుకుంది. ఈ సమయంలో తాజాగా అమెరికా కూడా ఆ దిశగా ముందుకు వెళ్తుందని అంటున్నారు. ట్రంప్ ప్రమాణస్వీకారానికి ఒక రోజు ముందు.. ఈ నెల 19న టిక్ టాక్ పై నిషేధం అమల్లోకి రానుందని అంటున్నారు.

ఈ నేపథ్యంలో మిలియన్ల కొద్దీ అమెరికన్ వినియోగదారులు టిక్ టాక్ ప్రత్యామ్నాయా ఆప్షన్ల కోసం వెతకడం ప్రారంభించారని అంటున్నారు. ఈ సమయంలో చైనాకు చెందిన మరో యాప్ డౌన్ లోడ్ లు అమెరికాలో భారీగా పెరిగాయని తాజా నివేదికలు చెబుతున్నాయి. దీని పేరు ‘జియాహోంగ్షు’ కాగా.. దీన్ని ‘లిటిల్ రెడ్ బుక్’ అని కూడా పిలుస్తారు.

ఈ యాప్ ఇటీవల ఆపిల్ యాప్ స్టోర్ డౌన్ లోడ్ చార్ట్ లో అగ్రస్థానంలో నిలిచిందని.. అగ్రరాజ్యంలో టిక్ టాక్ కు దీన్ని ప్రత్యామ్నాయంగా చూస్తున్నారని.. ఈ నేపథ్యంలోనే ఈ యాప్ అతి తక్కువ సమయంలో అమెరికాలో బాగా పాపులర్ అవుతుందని చెబుతున్నారు. ఈ యాప్ ను చైనాలో ఇప్పటికే సుమారు 300 మిలియన్ల మంది డౌన్ లోడ్ చేసుకొన్నారు.

టిక్ టాక్ ను మస్క్ కొనుగోలు చేస్తారా?:

గత కొన్ని రోజులుగా టిక్ టాక్ నిషేధం వార్తలు హల్ చల్ చేస్తున్న వేళ.. ఈ టిక్ టాక్ ను ఎలాన్ మస్క్ కు అమ్మాలని చైనీస్ కంపెనీ చూస్తుందనే చర్చా తెరపైకి వచ్చింది. అయితే... టిక్ టాక్ ప్రతినిధి మాత్రం మస్క్ కు టిక్ టాక్ అమెరికా బిజినెస్ ను విక్రయించే ఆలోచన లేదని చెబుతున్నారు.