తమిళనాడు వెళ్తున్న నారా లోకేష్... కీలక కారణం!

రానున్న ఎన్నికల్లో ఎలాగైనా మంగళగిరి నియోజకవర్గంలో గెలిచి తీరాలని కంకణం కట్టుకున్న టీడీపీ కీలక నేత నారా లోకేష్... అవిరామంగా ప్రచార కార్యక్రమాలు నిర్వహిస్తోన్న సంగతి తెలిసిందే. ఇందులో భాగంగా ప్రతీరోజూ బిజీబిజీగా ఉంటూ స్థానిక కార్యకర్తలతో మమేకం అవుతూ ముందుకు సాగుతున్నారు. ఈ సమయంలో అనూహ్యంగా లోకేష్ తమిళనాడు వెళ్లబోతున్నారని తెలుస్తోంది.

అవును... ఎన్నికలు సమీపిస్తున్న వేళ ఏపీలో రాజకీయాలు తీవ్రంగా వేడెక్కుతున్నాయి. ప్రతీ నాయకుడూ నియోజకవర్గాన్ని వదిలి బయటకు వెళ్లే సాహసం చేయడం లేదు. ఈ సమయంలో... లోకేష్ తమిళనాడుకు వెళ్లడానికి సిద్ధంగా ఉన్నారని తెలుస్తుంది. అయితే ఇది టీడీపీ ఎన్నికల ప్రచారం కోసం కాదు సుమా... బీజేపీ ప్రచారం కోసం అంట!

ఇందులో భాగంగా... కోయంబత్తూరు పార్లమెంటరీ సెగ్మెంట్‌ లో బీజేపీ తమిళనాడు అధ్యక్షుడు అన్నామలై తరపున ప్రచారం చేసేందుకు నారా లోకేష్ సిద్ధమయ్యారని తెలుస్తోంది. బీజేపీ అగ్రనేతలతో పాటు.. బీజేపీ తమిళనాడు అధ్యక్షుడు అన్నామలైతో లోకేష్ మంచి సంబంధాలను కొనసాగిస్తున్నారని, ఇందులో భాగంగానే ఆయన కోసం ప్రచారం చేయాలని చినబాబు నిర్ణయించుకున్నారని తెలుస్తోంది.

దీంతో... లోకేష్ తమిళనాడులో ప్రచారం చేయడం వల్ల ఉపయోగం ఏముటుంది అనుకునేవారికి అక్కడి బీజేపీ నేతలు సమాధానం చెబుతున్నారని అంటున్నారు. కూటమిలో టీడీపీ భాగస్వామిగా ఉన్న నేపథ్యంలో... కోయంబత్తూరులో లోకేష్ సేవలను వినియోగించుకోవాలని, ఫలితంగా అద్భుతమైన ఫలితాలు సాధించాలని తమిళనాడు బీజేపీ నిర్ణయించుకున్నట్లు తెలుస్తోంది.

ఈ నేపథ్యంలో... తెలుగు వారు ఎక్కువగా ఉండే ప్రాంతాలతో పాటు, తన్నామలై నియోజకవర్గ పరిధిలోని పలు ప్రాంతాల్లో చినాబాబు ర్యాలీలు, ప్రసంగాలు ఉండబోతున్నాయని చెబుతున్నారు. మరి తమిళనాడులో సైతం చినబాబు హవా ఎలా కొనసాగబోతోంది.. ఎలాంటి ఫలితాలు ఇవ్వబోతోంది అనేది వేచి చూడాలి!!