52 ఏళ్లు .. 12 రోజులు .. వెయ్యి కిలోమీటర్లు

ఆమె వయసు 52 ఏళ్లు. అయితేనేం 12 రోజులలో ఏకంగా పరుగెత్తుతూ వెయ్యి కిలోమీటర్ల మైలురాయిని చేరుకుంది. అత్యంత వేగంగా ఈ ఫీట్ ను చేరుకున్న వ్యక్తిగా గిన్నీస్ బుక్ రికార్డులకు ఎక్కింది. ఈ ప్రయత్నంలో ఎండలను తట్టుకునేందుకు ఆమె కొన్ని రోజులు అర్ధరాత్రి కూడా పరుగెత్తిందట.

సింగపూర్‌కు చెందిన నటాలీడౌ(52) అనే మహిళ అసాధ్యాన్ని సుసాధ్యం చేసింది. కేవలం 12 రోజుల్లో వెయ్యి కిలోమీటర్ల దూరం పరుగెత్తింది. ఈ క్రమంలో ఏకంగా మూడు దేశాలను కూడా చుట్టేసింది. గత మే 25వ తేదీన థాయ్‌లాండ్‌లో పరుగును మొదలుపెట్టిన నటాలీ.. మలేషియా మీదుగా జూన్‌ 5న సింగపూర్‌ చేరుకుని ఈ అరుదైన ఘనతను దక్కించుకున్నది.

మహిళలు, బాలికల ఆరోగ్యం అనే అంశంపై అవగాహన కల్పించడంతోపాటు విరాళాల సేకరణ లక్ష్యంగా ‘ప్రాజెక్ట్‌ 1000’ పేరిట ఆమె ఈ పరుగును మొదలుపెట్టింది. ఆరోగ్యాన్ని పెంపొందించుకునేందుకు తన 30వ ఏట పరుగును ప్రారంభించిన నటాలీడౌ ప్రాజెక్ట్‌ 1000లో భాగంగా రోజుకి 84.2 కిలోమీటర్లు చొప్పున పరుగెత్తడం విశేషం. తాను నిర్దేశించుకున్న 1000 కిమీల లక్ష్యాన్ని ఆమె కేవలం 12 రోజుల్లో పూర్తి చేశారు.

ఈ క్రమంలో ఎండ, వాన, తుంటి గాయం, అనారోగ్యాన్ని కూడా ఆమె లెక్క చేయలేదు. ఎండల నుంచి తప్పించుకునేందుకు కొన్ని రోజులు అర్ధరాత్రి తర్వాత మొదలుపెట్టి తెల్లవారుజాము వరకు పరుగెత్తింది. ఏదేమైనా అనుకున్న లక్ష్యాన్ని సాధించిన నటాలీడౌ.. ‘ఫాస్టెస్ట్‌1000 కిమీ థాయ్‌లాండ్‌- సింగపూర్‌ అల్ర్టామారథాన్‌’ రికార్డును సొంతం చేసుకున్నారు. అంతేకాక గిన్నిస్‌ బుక్‌ ఆఫ్‌ వరల్డ్‌ రికార్డ్‌ నమోదు చేశారు. ఈ ప్రయత్నంలో తన పరుగుతో నటాలీడౌ క్రీడల ద్వారా మహిళలు, అమ్మాయిల్లో నాయకత్వ సామర్థ్యాన్ని పెంపొందించేందుకు కృషి చేసే ఓ సంస్థకు 50 వేల డాలర్లు(దాదాపు రూ.42లక్షలు) విరాళాలు సేకరించడం విశేషం.