కేసీఆర్‌ కు గిఫ్ట్ పంపిన ష‌ర్మిళ... ప్యాకింగ్ కి యూజ్ అవుతుందని

తెలంగాణలో రసవత్తరంగా సాగిన ఎన్నికలు ముగిసాయి. ఎన్నో ఎత్తులు, మరెన్నో పైఎత్తులు. ఎన్నో వ్యూహాలు, మరెన్నో కౌంటర్లు. కొన్ని పార్టీల త్యాగాలు, మరికొందరి లోపాయకారీ ఒప్పందాలు... వెరసి అత్యంత రంజుగా సాగాయి తెలంగాణ అసెంబ్లీ ఎన్నికలు. వీటికి సంబంధించిన ఫలితాలు మరికొన్ని గంటల్లో రాబోతున్నాయి. ఈ సమయంలో కేసీఆర్ కు ఒక గిఫ్ట్ పంపుతున్నారు షర్మిళ!

అవును... తెలంగాణ అసెంబ్లీ ఎన్నికలు పూర్తయిన అనంతరం విడుదలైన ఎగ్జిట్ పోల్స్ ఫలితాలు కాంగ్రెస్ పార్టీలో కొత్త ఉత్సాహాన్ని తెచ్చిపెట్టాయి. గెలుపు ఆల్ మోస్ట్ కన్ ఫాం అని ఆ పార్టీ శ్రేణులు ఇప్పటికే సంబరాలు మొదలుపెట్టేశాయని తెలుస్తుంది. ఈ సమయంలో ప్రెస్ మీట్ పెట్టిన వైఎస్ షర్మిళ... "బై బై కేసీఆర్" అని రాసి ఒక బాక్సును రెడీ చేశారు. ఇది కేసీఆర్ కు తాను ఇస్తున్న గిఫ్ట్ అని అన్నారు.

కేసీఆర్ ఇక ఇంటికి వెళ్లే స‌మ‌యం వ‌చ్చిందని.. ప్యాక్ చేసుకునేందుకు అట్ట పెట్టెను పంపుతున్నట్టు ఆమె చెప్పుకొచ్చారు. అనంతరం కేసీఈర్ గతంలో చేసిన ఎమ్మెల్యేళ్ల కనుగోళ్లు అంశంపై స్పందించారు. ఇందులో భాగంగా 2014, 2018 ఎన్నికల ఫలితాల అనంతరం ఇతరపార్టీల్లో గెలిచిన మొత్తం 45 మంది ప్రజాప్రతినిధులను తన పార్టీలో చేర్చుకున్నారని తెలిపారు.

ఇందులో భాగంగా ప్రజలు మరో గుర్తుపై ఎన్నుకున్న 40 మంది ఎమ్మెల్యేలు, 4 గురు ఎమ్మెల్సీలు, ఒక ఎంపీని కేసీఆ ర్ తన పార్టీలో చేర్చుకున్నారని గుర్తుచేశారు షర్మిళ! ఈ సమయంలో రేప‌టి తీర్పును సీఎం కేసీఆర్ త‌న పాల‌న‌కు తీర్పుగా భావించి గౌర‌వించాల‌ని తెలిపిన షర్మిళ... ఇత‌ర పార్టీల ఎమ్మెల్యేల‌ను కొని మ‌ళ్లీ అధికారంలోకి రావాల‌ని ప్ర‌య‌త్నించొద్ద‌ని తెలిపారు.

ఇదే సమయంలో ఎన్నికల్లో పోటీ చేయకపోవడంపైనా షర్మిళ స్పందించారు. ఇందులో భాగంగా కేసీఆర్‌ ను ఓడించేందుకు కాంగ్రెస్‌ కు మ‌ద్దతు ఇచ్చిన‌ట్టు తెలిపారు. ఈ సందర్భంగా ఎగ్జిట్ పోల్స్ ఫలితాలపై స్పందిస్తూ... అవే నిజమైన ఫలితాలుగా రావాలనేది తెలంగాణ ప్రజల ఆకాంక్ష అని ఆమె అన్నారు. ఈ సందర్భంగా కేసీఆర్ పైనా.. బీఆరెస్స్ - బీజేపీ లపైనా షర్మిళ కీలక వ్యాఖ్యలు చేశారు.

ఇందులో భాగంగా... కేసీఆర్ రాక్షస పాల‌న‌కు రేప‌టితో ముగింపు ల‌భిస్తుంద‌ని ష‌ర్మిల తెలిపారు. ఇంత‌కాలం బీజేపీ, బీఆరెస్స్ పార్టీలు క‌లిసే ఉన్నాయ‌ని.. కేసీఆర్ అవినీతిపై కేంద్రంలో అధికారంలో ఉన్న బీజేపీ ప్రభుత్వం ఎలాంటి చ‌ర్యలు తీసుకోలేదని అన్నారు. మరోపక్క... కాళేశ్వరం ప్రాజెక్ట్‌ ను కేసీఆర్ ఏటీఎంగా వాడుకుంటున్నాడ‌ని జ‌ల‌వ‌న‌రుల‌శాఖ మంత్రే ఆరోపించారని గుర్తుచేశారు!

అదేవిధంగా... కేసీఆర్ ఏ స్కీం చేసినా, స్కామే అని ప్రధాని మోడీ ఆరోపించార‌ని ష‌ర్మిల తెలిపారు. ఈ సమయంలో బీఆరెస్స్ - బీజేపీ మ‌ధ్య లోపాయికారి ఒప్పందం లేక‌పోతే.. ఆ రెండు పార్టీలు ఒక‌దానికొక‌టి మ‌ద్దతు ఇచ్చుకోకూడదని షర్మిళ సూచించారు.