తిరుమల లడ్డూ కౌంటర్ లో అగ్ని ప్రమాదం... అసలేమైంది?

తిరుపతిలో ఇటీవల వైకుంఠ ద్వార దర్శనం టోకెన్ల కౌంటర్ల వద్ద జరిగిన తొక్కిసలాట ఘటన తీవ్ర చర్చనీయాంశంగా మారిన సంగతి తెలిసిందే. ఆ ఘటనలో ఆరుగురు మృతి చెందడం.. పదుల సంఖ్యలో భక్తులు గాయపడటం తీవ్ర కలకలం రేపింది. ఆ ఘటన ఇంకా మరువక ముందే మరో కీలక ఘటన జరిగింది. దీంతో... తిరుమలలో ఏమి జరుగుతుంది? అనే చర్చ తెరపైకి వచ్చిందని అంటున్నారు.

అవును... తిరుమలలో అగ్ని ప్రమాదం సంభవించింది. తిరుమల లడ్డూ కౌంటర్ లో సోమవారం స్వల్పంగా మంటలు చెలరేగాయి. ఈ మేరకు 47వ లడ్డూ కౌంటర్ వద్ద షార్ట్ సర్క్యూట్ కారణంగా మంటలు ఎగసిపడ్డాయి. ఇలా లడ్డూ ప్రసాదాలు పంపిణీ చేసే కౌంటర్స్ వద్ద ఒక్కసారిగా మంటలు చెలరేగడ్దంతో భక్తులు భయాందోళనకు గురయ్యారు.

ఈ నేపథ్యంలో... 47వ లడ్డూ కౌంటర్ లో ఉన్న కంప్యూటర్ కు సంబంధించిన అన్ ఇంటరప్టెడ్ పవర్ సప్లై (యూపీఎస్) లో కరెంట్ షార్ట్ సర్క్యూట్ జరిగి మంటలు చెలరేగినట్లు చెబుతున్నారు. ఇలా ఒక్కసారిగా మంటలు చెలరేగడంతో ఆ కౌంటర్ పొగతో నిండుకుంది. దీంతో.. వెంటనే అప్రమత్తమైన సిబ్బంది.. మంటలు ఆర్పివేశారు. దీంతో.. పెద్ద ప్రమాదమే తప్పిందని చెబుతున్నారు.

మహాకుంభమేళాలో తిరుమల శ్రీవారి నమూనా ఆలయం!:

ఉత్తరప్రదేశ్ లోని ప్రయాగ్ రాజ్ మహాకుంభమేళాలో తిరుమల తిరుపతి దేవస్థానానికి సంబంధించి శ్రీవారి నమూనా ఆలయం ఏర్పాటు చేసింది. నాగ వాసుకి ఆలయ సమీపంలోని సెక్టార్-6 వద్ద ఈ నమూనా ఆలయాన్ని ఏర్పాటు చేశారు. హిందూ ధర్మ ప్రచారంలో భాగంగా.. టీటీడీ ఈ ఏర్పాటు చేసింది. ఈ సందర్భంగా కుంభమేళాకు వచ్చె భక్తులు శ్రీవారి ఆలయాన్ని సందర్శించేలా ఏర్పాట్లు చేశారు.