కూలినా.. పతనమైనా.. తగ్గేదేలే అంటున్న ట్రంప్

ప్రపంచ మార్కెట్లు కుప్పకూలుతున్నప్పటికీ, టారిఫ్‌లను నిలిపివేసే ఆలోచన లేదని అమెరికా అధ్యక్షుడు డొనాల్డ్ ట్రంప్ స్పష్టం చేశారు. ప్రపంచ వాణిజ్య లోటును పరిష్కరించడానికి ఈ చర్యలు అవసరమని ఆయన సమర్థించుకున్నారు. కొన్నిసార్లు అనారోగ్యాన్ని నయం చేయడానికి చేదుగా ఉన్నా మందులు వేసుకోవాల్సి ఉంటుందని ఆయన వ్యాఖ్యానించారు.

ట్రంప్ తన విధానంలో ఎటువంటి మార్పు ఉండదని తేల్చి చెప్పారు. అయితే వాణిజ్య సమస్యలపై చర్చించడానికి సిద్ధంగా ఉన్నామని తెలిపారు. ఇప్పటికే పలు దేశాధినేతలతో ఆయన చర్చలు జరిపారు. భారత్ కూడా అమెరికాతో ఈ విషయంలో సంప్రదింపులు జరుపుతోంది.

గత వారం ట్రంప్ ప్రకటించిన టారిఫ్‌ల కారణంగా ప్రపంచ మార్కెట్లలో తీవ్రమైన ఒత్తిడి నెలకొంది. ఆర్థిక మాంద్యం వస్తుందనే భయాలు కూడా పెరిగాయి. ఈ నేపథ్యంలో ట్రంప్ చేసిన వ్యాఖ్యలు మరింత ప్రాధాన్యత సంతరించుకున్నాయి. "ప్రపంచ మార్కెట్లు పతనమవ్వాలని నేను కోరుకోలేదు. కానీ కొన్నిసార్లు సమస్య పరిష్కారం కోసం మందులు తీసుకోవాల్సి ఉంటుంది. చాలా మంది నేతలతో మాట్లాడాను. వాణిజ్య లోటు పరిష్కారమయ్యే వరకు టారిఫ్‌లపై చర్చించే ప్రసక్తి లేదు" అని ట్రంప్ స్పష్టం చేశారు. చైనా, యూరోపియన్ యూనియన్‌లతో ఉన్న భారీ వాణిజ్య లోటుకు టారిఫ్‌లే సరైన పరిష్కారమని ఆయన అభిప్రాయపడ్డారు.

తన చర్యల వల్ల అమెరికాలోకి బిలియన్ డాలర్ల పెట్టుబడులు వస్తున్నాయని ట్రంప్ పేర్కొన్నారు. గతంలో బైడెన్ పాలన సరిగా లేకపోవడం వల్లే ఇతర దేశాల మిగులు పెరిగిపోయిందని ఆయన విమర్శించారు. టారిఫ్‌ల విషయంలో భారత్‌తో సహా 50 దేశాలు అమెరికాతో చర్చలు జరుపుతున్నాయని సమాచారం.

- కుప్పకూలిన ఆసియా మార్కెట్లు

ట్రంప్ టారిఫ్‌ల ప్రభావం ఈ వారం కూడా మార్కెట్లపై కొనసాగుతోంది. సోమవారం ఆసియా మార్కెట్లు భారీ నష్టాలతో ప్రారంభమయ్యాయి. జపాన్ యొక్క నిక్కీ సూచీ ఒక దశలో 8 శాతం వరకు పతనమైంది. ప్రస్తుతం 6 శాతం నష్టంతో ట్రేడవుతోంది. తైవాన్ సూచీ 9.61 శాతం, దక్షిణ కొరియా కోస్పి 4.14 శాతం, చైనా షాంఘై సూచీ 6.5 శాతం, ఆస్ట్రేలియా ఏఎస్‌ఎక్స్‌ సూచీ 3.82 శాతం నష్టపోయాయి.

అమెరికా ఫ్యూచర్ స్టాక్స్ కూడా నష్టాల్లో ఉన్నాయి. డోజోన్స్ 2.2 శాతం క్షీణించింది. దీనితో సోమవారం అమెరికా మార్కెట్లు కూడా భారీగా పతనమయ్యే అవకాశం ఉంది. ఇక భారత గిఫ్ట్ నిఫ్టీ 900 పాయింట్లకు పైగా పడిపోయింది. దీనివల్ల దేశీయ స్టాక్ మార్కెట్లు కూడా భారీ నష్టాలను చవిచూసే అవకాశం ఉంది.

ట్రంప్ యొక్క దృఢమైన వైఖరి ప్రపంచ ఆర్థిక వ్యవస్థపై ఎలాంటి ప్రభావం చూపుతుందో వేచి చూడాలి. అయితే ప్రస్తుత పరిస్థితులు మాత్రం ఆందోళనకరంగానే ఉన్నాయి.