'భార్య వేరే వ్యక్తిని ప్రేమించడం అక్రమ సంబంధం కాదు'!.. హైకోర్టు కీలక వ్యాఖ్యలు!

కుటుంబ కోర్టు ఆదేశాన్ని సవాల్ చేస్తూ ఓ వ్యక్తి దాఖలు చేసిన పిటిషన్ ని విచారిస్తున్న హైకోర్టు ఆసక్తికర వ్యాఖ్యలు చేసింది. ఇందులో భాగంగా... భర్త కాకుండా వేరే వ్యక్తితో భార్యకు శారీరక సంబంధం లేకుండా ప్రేమ, అనురాగం మాత్రమే ఉంటే దాన్ని అక్రమ సంబంధంగా పరిగణించలేమని మధ్యప్రదేశ్ హైకోర్టు పేర్కొంది.

అవును... తన భార్య మరో వ్యక్తిని ప్రేమిస్తున్నందున ఆమెకు భరణం పొందే హక్కు లేదని ఓ భర్త తాజాగా వాదించాడు. దీంతో.. అక్రమ సంబంధం తప్పనిసరి అంటే లైంగిక కలయిక అని.. భార్యకు శరీరక సంబంధాలు లేకుండా వేరే వ్యక్తి పట్ల ప్రేమ, అప్యాయత ఉన్నప్పటికీ అది ఆమె అక్రమ సంబంధం పెట్టుకున్నట్లు కాదని హైకోర్టు చెప్పిందని బార్ అండ్ బెంచ్ వెల్లడించింది.

ఇదే సమయంలో... బీ.ఎన్.ఎస్.ఎస్. లోని సెక్షన్ 144 (5), క్రిమినల్ ప్రొసీజర్ కోడ్ లోని సెక్షన్ 125 (4) లను ప్రస్థావిస్తూ.. భార్యకు అక్రమ సంబంధం ఉందని రుజువైతే ఆమెకు భరణం నిరాకరించబడుతుందని స్పష్టంగా ఉంది.. అయితే, ఆమె శారీరక సంబంధానికి సంబంధించిన ఆధారాలు లేకుండా ఆమెకు సంబంధం ఉందనే అరోపణలు నిలబడవని కోర్టు స్పష్టం చేసింది!

ఇదే సమయంలో.. తాను వార్డ్ బాయ్ గా పనిచేస్తున్నానని, నెలకు రూ.8,000 జీతం పొందుతున్నట్లు చెప్పుకున్న భర్త... హిందూ వివాహ చట్టంలోని సెక్షన్ 24 ప్రకారం తన భార్య రూ.4,000 అందుకుంటోందని.. ఈ సమయంలో సీఆర్పీసీ సెక్షన్ 125 కింద అదనంగా రూ.4,000 ఇవ్వడం అతిశయోక్తి అని వాదించాడు.

అయితే... ఈ వాదనలో ఎటువంటి అర్హత లేదని కోర్టు గుర్తించి కుటుంబ కోర్టు నిర్ణయాన్ని సమర్థించింది. ఇదే సమయంలో.. ఆర్థిక ఇబ్బందులను సమర్థిస్తూ సదరు భర్త సమర్పించిన శాలరీ సర్టిఫికెట్ ను కూడా పరిశీలించి.. ఇది జారీ చేసిన స్థలం, తేదీ వంటి కీలక వివరాలు లేవని పేర్కొంది. భర్త పిటిషన్ ను ధర్మాసనం కొట్టివేసింది.