ఎంఎస్ ధోనీ విషయంలో సీఎస్కే సీఈవో కీలక ప్రకటన!

బోర్డ్ ఆఫ్ కంట్రోల్ ఫర్ క్రికెట్ ఇన్ ఇండియా (బీసీసీఐ) ఇటీవల రాబోయే ఇండియన్ ప్రీమియర్ లీగ్ (ఐపీఎల్) 2025 సీజన్ కోసం రిటెన్షన్ నియమాలని ఆవిష్కరించిన సంగతి తెలిసిందే. ఇందులో భాగంగా ఈ సారి రిటెన్షన్ పరిమితిని ఆరుగురు ఆటగాళ్లకు పెంచింది. ఇందులో ఒక రైట్ టు మ్యాచ్ (ఆర్టీఎం) ఆప్షన్ కూడా ఊంది.

ఈ సమయంలో అట్టిపెట్టుకున్న ఐదుగురు ఆటగాళ్ల కోసం రూ.75 కోట్లు ఖర్చు పెట్టాలి. ఈ నేపథ్యంలో ఫ్రాంఛైజీలు తమ రిటైన్ జాబితాను ఈ నెల 31లోపు సమర్పించాలి. అనంతరం.. నవంబరులో ఐపీఎల్ 2025 సీజన్ కు సంబంధించిన మెగా వేలం జరగనుంది.

ఇదే సమయంలో... ఐపీఎల్ సీజన్ 2025లో అన్ క్యాప్డ్ ప్లేయర్ రూల్ ను మరలా తీసుకొచ్చిన సంగతి తెలిసిందే. ఏ భారత ఆటగాడైనా ఐదేళ్ల పాటు అంతర్జాతీయ క్రికెట్ ఆడకపోయినా.. లేదా, బీసీసీఐ సెంట్రల్ కాంట్రక్ట్ కలిగి ఉండకపోయినా అతడిని అన్ క్యాప్డ్ ప్లేయర్ గా పరిగణిస్తారు.

ఈ సమయంలో.. ఎంఎస్ ధోనీ కోసమే ఈ రూల్ ను బీసీసీఐ తీసుకొచ్చిందనే ప్రచారం మొదలైంది. ఈ నిబంధన ప్రకారం ఎంఎస్ ధోనీని చెన్నై సూపర్ కింగ్స్ (సీఎస్కే) రూ.4 కోట్లకు రిటైన్ చేసుకుంటుందని నెట్టింట బలంగా ప్రచారం జరుగుతుంది. ఈ సమయంలో చెన్నై సూపర్ కింగ్స్ సీఈవో స్పందించారు.

అవును... అన్ క్యాప్డ్ ప్లేయర్ నిబంధన కింద ధోనీని సీఎస్కే రిటైన్ చేసుకుంటుందని నెట్టింట జరుగుతున్న ప్రచారంపై ఆ ఫ్రాంఛైజీ సీఈవో కాశీ విశ్వనాథన్ స్పందించారు. ఇందులో భాగంగా.. ఇప్పటివరకూ అయితే ధోనీ విషయంలో సీఎస్కే ఎలాంటి చర్చలూ జరపలేదని తెలిపారు.

ఇదే సమయంలో ఈ నిబంధన గురించి తమకు స్పష్టత లేదని.. ఈ నిబంధనను ధోనీ కోసం కూడా తాము ఉపయోగించకపోవచ్చని.. దీని గురించి ఇంకా ధోనీతో చర్చించలేదని.. ప్రస్తుతం ధోనీ అమెరికాలో ఉన్నాడని.. త్వరలో తాను యూఎస్ వెళ్లి ధోనీతో చర్చించాక దీనిపై క్లారిటీ రానుందని అన్నారు.

ఈ సందర్భంగా ఐపీఎల్ 2025లో మహీ ఆడతాడనే తాను ఆశిస్తున్నట్లు కాశీ విశ్వనాథన్ తెలిపారు. కాకపోతే... ఫైనల్ డెసిషన్ మాత్రం ధోనీదే అని చెప్పారు.

కాగా... లీగ్ మొదటి నుంచీ అన్ క్యాప్డ్ ప్లేయర్ నిబంధన ఉన్నప్పటికీ.. ఏ ఫ్రాంఛైజీ కూడా దీన్ని ఉపయోగించుకోలేదు! దీంతో.. 2021లో ఈ నిబంధనను రద్దు చేశారు. ఇప్పుడు మళ్లీ ఈ రూల్ ని తీసుకొచ్చారు. ఈ నిబంధన భారత ఆటగాళ్లకు మాత్రమే వర్తిస్తుంది. అయితే ఈ రూల్ తిరిగి తీసుకువచ్చింది.. ధోనీ కోసమే అనే ప్రచారం ఇప్పుడు హాట్ టాపిక్ గా మారింది.