విడాకుల ఊహాగానాల మధ్య భార్య‌తో హార్దిక్ విదేశీ యాత్ర?
ఇదిలా ఉంటే హార్దిక్ విదేశాలకు రహస్యంగా విహారయాత్రకు వెళ్లాడని, న్యూయార్క్‌లో నేరుగా టీమ్‌ను కలుస్తాడని సమాచారం.
T20 ప్రపంచ కప్ 2024 కోసం భారతదేశం సిద్ధమవుతోంది. అయితే జట్టు కీలక ఆటగాళ్ళలో ఒకరైన హార్దిక్ పాండ్యా చుట్టూ కొంత మెలో డ్రామా న‌డుస్తోంది. టీమిండియా న్యూయార్క్‌కు బయలుదేరినప్పుడు అతడు జట్టుతో చేరలేదు. అతడి వ్యక్తిగత జీవితంలో ముఖ్యంగా అతని భార్య నటాసా స్టాంకోవిక్‌తో సంబంధంలో ఏం జరుగుతుందో అర్థం కావ‌డం లేదు. ఆ ఇద్ద‌రూ విడిపోతున్నార‌ని పుకార్లు షికార్ చేస్తున్నాయి. దానిని అతడు ఖండించ‌నూ లేదు. అలాగ‌ని క‌లిసి ఉన్నామ‌ని చెప్ప‌నూ లేదు.
ఇదిలా ఉంటే హార్దిక్ విదేశాలకు రహస్యంగా విహారయాత్రకు వెళ్లాడని, న్యూయార్క్‌లో నేరుగా టీమ్‌ను కలుస్తాడని సమాచారం. ఈ ఊహించని ట్విస్ట్ టోర్నమెంట్‌లో భారత జట్టు ప్రయాణానికి కొంత మిస్టరీని జోడించింది. హార్దిక్ పాండ్యా విష‌యంలో నిజంగా ఏం జరుగుతుందో తెలుసుకోవాల‌నే ఆసక్తి అభిమానులకు ఉంది.
క్రిక్‌బజ్‌లోని ఒక క‌థ‌నం ప్రకారం.. ముంబై ఇండియన్స్ IPL 2024లో ఓట‌మితో ముగింపును ఎదుర్కొన్న తర్వాత హార్థిక్ కెప్టెన్సీ విష‌యంలో అభిమానుల్లో చాలా అసంతృప్తి బ‌య‌ట‌ప‌డింది. IPL 2024 ప్రారంభమయ్యే ముందు, హార్దిక్ నిరంత‌రం హెడ్‌లైన్స్‌లో నిలిచాడు. ముంబై ఇండియన్స్ జట్టు రోహిత్ శర్మకు బదులుగా అతడిని కెప్టెన్‌గా చేసి అందరినీ ఆశ్చర్యపరిచింది. కానీ అభిమానులు ఈ విష‌యంలో సంతోషంగా లేరు. హార్దిక్ మైదానంలోకి వచ్చినప్పుడల్లా వారు తమ అయిష్టాన్ని క‌న‌బ‌రిచారు. ముంబై ఇండియన్స్ జట్టు చుట్టూ ఉన్న ప్రతికూలత కారణంగా పోటీలో ఉన్న 10 జట్లలో ర్యాంకింగ్స్ లో అట్ట‌డుగున నిలిచారు. సాధారణంగా బ్యాటింగ్, బౌలింగ్ రెండింటిలోనూ రాణిస్తున్న హార్దిక్ ఈసారి అంతగా రాణించలేకపోయాడు.
``హార్దిక్ ఆట పరంగా ఊహించని కొన్ని వ్యక్తిగత సవాళ్లను ఎదుర్కొంటున్నాడు.. ఈ అనుభవం అతడికి విలువైన పాఠం కావచ్చు.. ముఖ్యంగా నాయకత్వ అభివృద్ధి పరంగా.. ప్రస్తుతానికి కొన్ని విషయాలు కష్టంగా ఉన్నప్పటికీ అవి చివరికి మెరుగుపడతాయి. అతడు బలమైన నాయకుడిగా మారడంలో సహాయపడతాయి`` అని ముంబై ఇండియన్స్ కోచ్ మార్క్ బౌచర్ మే 17న తమ చివరి మ్యాచ్ తర్వాత విలేకరుల స‌మావేశంలో వ్యాఖ్యానించారు. జూన్ 1 నుంచి 29 వరకు జరిగే టీ20 ప్రపంచకప్‌కు హార్దిక్ వైస్ కెప్టెన్‌గా వ్యవహరించనున్నారు.
హార్దిక్ పాండ్యా -నటాసా స్టాంకోవిచ్ మే 2020లో వివాహం చేసుకున్నారు. అదే సంవత్సరంలో కుమారుడు అగస్త్యకు స్వాగతం పలికారు. టీ20 లీగ్‌లో తీవ్రమైన మ్యాచ్‌లతో అలసిపోయినట్లు భావించిన హార్థిక్ విశ్రాంతి తీసుకోవాలనుకున్నాడు. అందుకే, దేశం బయట అన్య ప్రదేశానికి దాదాపు వారం రోజుల పాటు వెకేషన్‌కు వెళ్లాలని ప్లాన్ చేశాడు. అది కూడా త‌న భార్య న‌టాషాతో విహార‌యాత్ర‌లో ఉన్నాడ‌ని గుస‌గుస‌లు వినిపిస్తున్నాయి. అయితే ఈ జంట విహారానికి సంబంధించిన ఫోటోలు కానీ వీడియోలు కానీ ఏవీ ఇంకా బ‌య‌ట‌కు రాలేదు. అతడు మొదటి ప్రాక్టీస్ సెషన్ కోసం న్యూయార్క్‌లో టీమిండియాతో కలవాల్సి ఉంది.