జైలర్ తెలుగు కలెక్షన్స్.. భోళా కంటే ఎక్కువే..

కోలీవుడ్ సూపర్ స్టార్ రజినీకాంత్ మొత్తానికి చాలా కాలం తర్వాత అదిరిపోయేలా బాక్స్ ఆఫీస్ వద్ద సరికొత్త సెన్సేషన్ అయితే క్రియేట్ చేస్తున్నాడు. నెల్సన్ దిలీప్ కుమార్ దర్శకత్వంలో తెరపైకి వచ్చిన జైలర్ సినిమా మొదటి రోజే మంచి పాజిటివ్ టాక్ సొంతం చేసుకుంది. ఇక ఈ సినిమా రెండవ రోజు నుంచి కూడా కలెక్షన్స్ ఏమాత్రం తగ్గకుండా సరికొత్త రికార్డులను అయితే క్రియేట్ చేస్తోంది.

జైలర్ సినిమా తెలుగులో అసలు సక్సెస్ అవుతుందా లేదా అనే అనుమానాలు చాలానే వచ్చాయి. కానీ ఊహించని విధంగా మూడు రోజుల్లోనే టార్గెట్ ను పూర్తి చేసి తెలుగు బయ్యర్లను లాభాల్లోకి తీసుకువచ్చింది. ఇక మరోవైపు భోళా శంకర్ సినిమా ప్రభావం ఎంతో కొంత పడుతుంది అనే అనుమానాలు కూడా వచ్చాయి. కానీ ఆ సినిమాకు దారుణమైన టాక్ రావడంతో శనివారం రోజు జైలర్ సినిమాకి రెండు తెలుగు రాష్ట్రాల్లో ఎక్కువ స్థాయిలో కలెక్షన్స్ రావడం ఆశ్చర్యాన్ని కలిగించింది.

ఇక ఈ సినిమా మొత్తంగా ఏ స్థాయిలో కలెక్షన్స్ అందుకుంది అనే వివరాల్లోకి వెళితే, జైలర్ ఆంధ్రప్రదేశ్ తెలంగాణలో మొదటి రోజు 7 కోట్ల రేంజ్ షేర్ కలక్షన్స్ అందుకుంది. ఇక రెండవ రోజు కాస్త కలెక్షన్స్ తగ్గగా 2.65 కోట్లు మాత్రమే వచ్చాయి. ఇక మూడవరోజు ఆ నెంబర్లు మరింత పెరిగాయి. దీంతో 4.15 కోట్లు షేర్ రాబట్టింది. అంటే భోళా శంకర్ శనివారం రోజు మూడు కోట్ల రేంజ్ లో షేర్ కలెక్షన్స్ అందుకోగా జైలర్ సినిమా అంతకంటే ఎక్కువ స్థాయిలో రాబట్టడం విశేషం.

ఇక ఈ సినిమా మూడు రోజుల్లో ఆంధ్రప్రదేశ్ తెలంగాణలో ఇప్పటివరకు 13.81 కోట్లు షేర్, 23. 65 కోట్లు గ్రాస్ కలెక్షన్స్ అయితే అందుకుంది. రెండు తెలుగు రాష్ట్రాల్లో జైలర్ సినిమా కేవలం 12 కోట్ల రేంజ్ లోనే బిజినెస్ చేయగా ఇప్పటికే ఆ టార్గెట్ ను పూర్తిచేసుకుని 80 లక్షల ప్రాఫిట్ తో కొనసాగుతోంది.

ఇక ప్రపంచవ్యాప్తంగా వచ్చిన గ్రాస్ చూసుకుంటే తమిళనాడులో 59 కోట్లు, రెండు తెలుగు రాష్ట్రాల్లో 24 కోట్లు, కర్ణాటకలో 22.75 కోట్లు, కేరళలో 16.10 కోట్లు, రెస్ట్ ఆఫ్ ఇండియాలో 4.25 కోట్లు, ఓవర్సీస్ లో 87.44 కోట్లు వచ్చాయి. ప్రపంచ వ్యాప్తంగా వచ్చిన గ్రాస్ కలెక్షన్స్ 214.15 కోట్లు. ఇక షేర్ కలెక్షన్స్ 105.10 కోట్లు.

ఓవరాల్ గా చూసుకుంటే ప్రపంచవ్యాప్తంగా జైలర్ 122.50 కోట్ల రేంజ్ లో బిజినెస్ అయితే చేసింది. ఇక ఈ సినిమా బాక్సాఫీస్ వద్ద మొత్తంగా 124 కోట్లు అందుకోవాలి అంటే వచ్చిన కలెక్షన్స్ బట్టి ఇంకా 19 కోట్ల వరకు షేర్ అందుకోవాల్సిన అవసరం ఉంది. ఇక ఆదివారం రోజు ఈజీగా ఈ టార్గెట్ ను ఫినిష్ చేస్తుంది అని అనిపిస్తోంది.