జైలర్.. తెలుగు బాక్సాఫీస్ టార్గెట్ ఎంతంటే?

సూపర్ స్టార్ రజినీకాంత్ హీరోగా నెల్సన్ దిలీప్ దర్శకత్వంలో తెరకెక్కి ప్రేక్షకుల ముందుకి రాబోతున్న చిత్రం జైలర్. భారీ బడ్జెట్ తో సన్ పిక్చర్స్ ఈ చిత్రాన్ని నిర్మించింది. మూవీలో రమ్యకృష్ణ సూపర్ స్టార్ రజినీకాంత్ భార్యగా నటిస్తోంది. తమన్నా కీలక పాత్రలో కనిపించబోతోంది. సునీల్ ఈ చిత్రంలో విలన్ గా నటిస్తున్నాడు. ఇలా తెలుగు ప్రేక్షకులకి చేరువ అయిన స్టార్ క్యాస్టింగ్ జైలర్ సినిమాలో ఉన్నారు.

భారీ అంచనాల మధ్య ఈ చిత్రం రిలీజ్ అవుతోంది. సూపర్ స్టార్ రజినీకాంత్ మూవీ అంటేనే ఓ రకమైన క్రేజ్ ఉంటుంది. కేవలం తమిళనాడులోనే కాకుండా తెలుగునాట రజినికి విపరీతమైన ఫ్యాన్ ఫాలోయింగ్ ఉంది. అందుకు తగ్గట్లుగానే అతని సినిమాలు బిజినెస్ జరుగుతూ ఉంటాయి. జైలర్ ఏకంగా పాన్ ఇండియా అప్పీల్ తో వస్తోంది. ఈ నేపథ్యంలో ఈ చిత్రం పెద్ద టార్గెట్ లతోనే ప్రేక్షకుల ముందుకి రాబోతోంది.

ఆగష్టు 10న ప్రపంచ వ్యాప్తంగా ఈ చిత్రం రిలీజ్ అవుతోంది. మెగాస్టార్ చిరంజీవి భోళా శంకర్ ఆగష్టు 11న రిలీజ్ కానుంది. ఇద్దరు స్టార్స్ సిల్వర్ స్క్రీన్ పై ఇప్పుడు పోటీ పడబోతున్నారు. అయితే తెలుగులో మెగాస్టార్ కి ఎక్కువ మైలేజ్ ఉంటుందని ప్రత్యేకంగా చెప్పాల్సిన పని లేదు. జైలర్ తెలుగు రిలీజ్ రైట్స్ కేవలం 15 కోట్లకి అమ్మేశారు. నిజానికి రోబో తర్వాత సూపర్ స్టార్ కి తెలుగులో ఇప్పటి వరకు సాలిడ్ హిట్ పడలేదు.

అతని సినిమాలు, కాలా, కబాలి తమిళంలో హిట్ అయిన తెలుగులో మాత్రం ఆదరణ నోచుకోలేదు. చివరిగా వచ్చిన అన్నాత్తై మూవీ అయితే డిజాస్టర్ అయ్యింది. ఈ కారణాల వలన జైలర్ సినిమాకి పోటీ తగ్గినట్లు తెలుస్తోంది. నెల్సన్ దిలీప్ దర్శకత్వంలో చివరిగా బీస్ట్ మూవీ వచ్చింది. ఈ చిత్రం ఆశించిన స్థాయిలో సక్సెస్ ని తెలుగులో అందుకోలేదు. అది కూడా బిజినెస్ తగ్గడానికి ఒక కారణం అనే మాట వినిపిస్తోంది.

ఏది ఏమైనా రజినీకాంత్ ని ఆడియన్స్ ఒక యాక్షన్ హీరో రేంజ్ లోనే ఊహించుకుంటారు. అలాంటి కథలతో వస్తేనే సక్సెస్ అందుకోగలరు. కమల్ హాసన్ చాలా ఏళ్ల తర్వాత విక్రమ్ సినిమాతో తెలుగులో హిట్ కొట్టారు. మరి రజినీకాంత్ కూడా ఈ జైలర్ తో అలాంటి బ్లాక్ బస్టర్ ని తన ఖాతాలో వేసుకుంటారేమో చూడాలి.