2025 సంక్రాంతి రేసులో ఇద్దరేనా?

సంక్రాంతి ఫెస్టివల్ సీజన్ లో సినిమాలు రిలీజ్ చేయడానికి స్టార్ హీరోలు అందరూ పోటీ పడుతూ ఉంటారు. ఈ ఏడాది సూపర్ స్టార్ మహేష్ బాబు “గుంటూరు కారం”తో సంక్రాంతి రేసులో ప్రేక్షకుల ముందుకొచ్చారు. అలాగే కింగ్ నాగార్జున “నా సామిరంగా” చిత్రాన్ని రిలీజ్ చేశారు. విక్టరీ వెంకటేష్ నుంచి “సైంధవ్” మూవీ థియేటర్స్ లోకి వచ్చింది. ఈ ముగ్గురు స్టార్స్ లో నాగార్జున మాత్రమే కమర్షియల్ సక్సెస్ అందుకున్నారు. అలాగే ఎలాంటి స్టార్ క్యాస్టింగ్ లేకుండా వచ్చిన “హనుమాన్” బ్లాక్ బస్టర్ హిట్ అయ్యింది.

ఇదిలా ఉంటే 2025 సంక్రాంతి రేసులో కూడా స్టార్ హీరోలు పోటీ పడటానికి రెడీ అయిపోయారు. మెగాస్టార్ చిరంజీవి “విశ్వంభర” సినిమాతో 2025 జనవరి 10న ప్రేక్షకుల ముందుకి రాబోతున్నారు. ఈ సినిమాపై భారీ అంచనాలు నెలకొని ఉన్నాయి. పాన్ ఇండియా రేంజ్ లో “విశ్వంభర” మూవీ రిలీజ్ అవుతోంది. మెగాస్టార్ కి పోటీగా విక్టరీ వెంకటేష్ కూడా సంక్రాంతి రేసులోకి వస్తున్నారు.

వెంకటేష్ అనిల్ రావిపూడి దర్శకత్వంలో ప్రస్తుతం మూవీ చేస్తున్నారు. దిల్ రాజు ఈ చిత్రాన్ని నిర్మిస్తున్నారు. “సంక్రాంతికి వస్తున్నాం” అనే టైటిల్ ని ఈ సినిమాకి ఇప్పటికే కన్ఫర్మ్ చేశారని తెలుస్తోంది. టైటిల్ కి తగ్గట్లుగానే సినిమాని కూడా సంక్రాంతి కానుకగానే రిలీజ్ చేయబోతున్నారు. మాస్ మహారాజ్ రవితేజ 75వ సినిమా సంక్రాంతికి రిలీజ్ కావాల్సి ఉంది. అయితే షూటింగ్ లో రవితేజ గాయపడటంతో ఓ 5 వారాల పాటు విశ్రాంతి తీసుకుంటున్నారు.

దీంతో ఈ మూవీ సంక్రాంతికి రిలీజ్ అయ్యే ఛాన్స్ లేదనే మాట వినిపిస్తోంది. కింగ్ నాగార్జున 2025 సంక్రాంతికి కొత్త సినిమాతో రావాలని అనుకున్నారు. అయితే ఆయన కొత్త సినిమా ఏదీ ఖరారు కాలేదు. ధనుష్, రజినీకాంత్ సినిమాలలో మాత్రమే నాగార్జున నటిస్తున్నారు. దీంతో సంక్రాంతి రేసులో నాగార్జున లేనట్లే అని చెప్పాలి. నందమూరి నటసింహం బాలకృష్ణ బాబీ దర్శకత్వంలో మూవీ చేస్తున్నారు. ఈ సినిమాని సంక్రాంతికి రిలీజ్ చేయాలని ప్లాన్ చేస్తున్నారు. అయితే ఈ మూవీ రిలీజ్ డేట్ పై త్వరలో క్లారిటీ వస్తుందని భావిస్తున్నారు.

ఒకవేళ బాలయ్య సంక్రాంతి రేసులో పోటీ పడితే ఈ ఫైట్ కచ్చితంగా ఇంటరెస్టింగ్ గా మారే ఛాన్స్ ఉంటుంది. ముగ్గురు సీనియర్స్ స్టార్స్ చాలా కాలం బాక్సాఫీస్ దగ్గర తలపడుతున్నట్లు అవుతుంది. గతంలో ఈ ముగ్గురు స్టార్ హీరోలుగా కొనసాగే సమయంలో ఒకరితో ఒకరు పోటీపడుతూ ఉండేవారు. గత ఏడాది బాలయ్య “వీరసింహా రెడ్డి”, మెగాస్టార్ “వాల్తేరు వీరయ్య”తో సంక్రాంతి రేసులో పోటీ పడ్డారు. ఈ రెండు సూపర్ హిట్ అయ్యాయి. అయితే ఈ సారి ముగ్గురు సీనియర్ స్టార్స్ మధ్య పోటీ ఉంటుందని సినీ విశ్లేషకులు భావిస్తున్నారు.