తప్పు తనదేనన్న సూపర్‌ స్టార్‌

2016లో వచ్చిన దంగల్ సినిమా తర్వాత అమీర్ ఖాన్‌ నటించిన ప్రతి సినిమా బాక్సాఫీస్ వద్ద బొక్కబోర్లా పడుతూ వస్తోంది. 2022 లో వచ్చిన లాల్‌ సింగ్ చద్దా సినిమా పై చాలా ఆశలు పెట్టుకుని అమీర్ ఖాన్ నటించడం జరిగింది. హాలీవుడ్‌ సూపర్‌ హిట్‌ చిత్రం ఫారెస్ట్‌ గంప్‌ కి రీమేక్ గా రూపొందిన లాల్‌ సింగ్‌ చద్దా సినిమా డిజాస్టర్ గా నిలిచింది. అమీర్ ఖాన్‌ ఆ సినిమా ఫలితం నుండి తేరుకోవడానికి చాలా సమయం పట్టిందని, అదే సమయంలో ఆయన వ్యక్తిగతంగా కూడా విడాకులు తీసుకోవడంతో ఇబ్బందులకు గురి అయినట్లు బాలీవుడ్ మీడియా సర్కిల్స్ లో ప్రచారం జరిగింది.

అమీర్ ఖాన్‌ లాల్ సింగ్ చద్దా సినిమా ఫ్లాప్‌ అవ్వడం పై స్పందించాడు. ఫారెస్ట్‌ గంప్ సినిమా నాకు చాలా ఇష్టమైన మూవీ. దాని రీమేక్‌ చేసేందుకు చాలా ఆసక్తిని కనబర్చాను. అందులోని నా నటన వల్ల సినిమా ఫ్లాప్‌ అయ్యిందని నేను భావిస్తున్నాను. నా నటన మరో రకంగా ఉండి ఉంటే కచ్చితంగా సినిమా ఫలితం మరో విధంగా ఉండేది అంటూ తాజాగా ఒక ఇంటర్వ్యూలో అమీర్ ఖాన్‌ చెప్పుకొచ్చాడు. లాల్ సింగ్ చద్దా సినిమా ఫ్లాప్‌ కి పూర్తి కారణం తానే అంటూ అమీర్ ఖాన్‌ ఒప్పుకోవడం మాత్రమే కాకుండా భవిష్యత్తులో అలాంటివి పునరావృతం కాకుండా చూసుకోవాల్సిన బాధ్యత నాదే అన్నట్లుగా చెప్పుకొచ్చాడు.

రియా చక్రవర్తి నిర్వహిస్తున్న పాడ్‌కాస్ట్‌ లో అమీర్ ఖాన్ పాల్గొని పలు విషయాలను షేర్‌ చేసుకున్నాడు. లాల్ సింగ్‌ చద్దా సినిమా ఫ్లాప్‌ తో పాటు తన వ్యక్తిగత విషయాలను కూడా ఆమెతో షేర్‌ చేసుకున్నాడు. అమీర్ ఖాన్‌ ను రియా చక్రవర్తి పెళ్లి వ్యవస్త గురించి ప్రశ్నించిన సమయంలో ఆయన స్పందిస్తూ... నేను రెండు సార్లు వివాహం లో విఫలం అయ్యాను. కనుక పెళ్లి విషయంలో నా సలహాలు తీసుకోవడం అనేది కరెక్ట్‌ కాదు అన్నాడు. నా మాజీ భార్యలతో ఇప్పటికి కూడా సన్నిహిత సంబంధాలు కొనసాగుతున్నాయి. వారు ఇప్పటికి కూడా నా కుటుంబ సభ్యులే అన్నాడు.

మూడో పెళ్లి చేసుకునే ఉద్దేశ్యం ఉందా అంటూ రియా చక్రవర్తి ప్రశ్నించిన సమయంలో అమీర్‌ ఖాన్ స్పందిస్తూ... ప్రస్తుతం నా వయసు 59 ఏళ్లు. నాకు మళ్లీ పెళ్లి అంటే కష్టం. ప్రస్తుతం నాకు కొన్ని బాధ్యతలు ఉన్నాయి, నా కుటుంబంతో, పిల్లలతో రీ కనెక్ట్‌ అయ్యేందుకు ప్రయత్నిస్తున్నాను. స్నేహితులు ఇంకా నాకు ఎంతో ఇష్టమైన వారితో సమయం గడిపేందుకు ఎక్కువ ఆసక్తి చూపిస్తూ ఉన్నాను. భవిష్యత్తులో కూడా పెళ్లి ఆలోచన లేదు అన్నట్లుగా అమీర్‌ ఖాన్‌ ఇంటర్వ్యూలో చెప్పుకొచ్చాడు. ప్రస్తుతం అమీర్‌ ఖాన్‌ పాడ్‌ కాస్ట్‌ ఇంటర్వ్యూ సోషల్‌ మీడియాలో వైరల్‌ అవుతోంది.