యాక్షన్ సన్నివేశంలో సూర్యకు స్వ‌ల్ప‌ గాయం

త‌మిళ స్టార్ హీరో సూర్య త‌ల‌కు గాయ‌మైంద‌ని స‌మాచారం. అత‌డు ప్ర‌స్తుతం 'సూర్య 44'(వ‌ర్కింగ్ టైటిల్) చిత్రంలో న‌టిస్తున్నాడు. యాక్షన్ సన్నివేశం చిత్రీకరిస్తుండగా తలకు స్వల్ప గాయమైంద‌ని చెన్నై మీడియా వ‌ర్గాలు ధృవీక‌రించాయి. ఈ సంఘటన తర్వాత చిత్రీక‌ర‌ణ‌ కొద్దిసేపు ఆగిపోయింది. ఈరోజు నిర్మాత రాజశేఖర్ పాండియన్ సూర్య‌ ఆరోగ్యం గురించి అభిమానులకు భరోసా ఇస్తూ సోషల్ మీడియాలో వివ‌రాలు అందించారు.

X ఖాతాలో నిర్మాత ఇలా రాసారు. ''ప్రియమైన #అన్‌బ‌నా ఫ్యాన్స్.. ఇది కేవలం చిన్న గాయం. దయచేసి చింతించకండి. సూర్య అన్న మీ అందరి ప్రేమ , ప్రార్థనలతో సంపూర్ణంగా బాగున్నాడు'' అని రాసారు. దీనిని బ‌ట్టి సూర్య గాయం అంత తీవ్ర‌మైన‌ది కాద‌ని స్ప‌ష్ఠ‌త వ‌చ్చింది. ఊటీలోని ఓ క్లినిక్ లో చికిత్స పొందిన తరువాత, వైద్యులు కోలుకోవడానికి కొన్ని రోజులు సెలవు తీసుకోవాలని సిఫార్సు చేశారు. దీంతో ఈ ప్రాజెక్ట్‌ షూటింగ్‌ని తాత్కాలికంగా నిలిపివేశారు. సూర్య 44 రెండవ షెడ్యూల్ ఈ నెల ఆరంభంలో ఊటీలో ప్రారంభమైంది. ఈ సంఘటన జరిగే వరకు అంతా సజావుగా సాగింది. కార్తీక్ సుబ్బరాజ్ దర్శకత్వంలో రూపొందుతున్న ఈ సినిమా ఫస్ట్-లుక్ పోస్టర్ ఇటీవ‌లే విడుద‌ల కాగా అద్భుత స్పంద‌న వ‌చ్చింది. యాధృచ్ఛికంగా ఒక‌ కారు ప్రమాద సన్నివేశాన్ని పోస్ట‌ర్‌లో ఆవిష్క‌రించారు.

మ‌రోవైపు సూర్య తన పాన్-ఇండియా చిత్రం కంగువ విడుదల ప్ర‌చారానికి కూడా సిద్ధమవుతున్నాడు. ఈ ఇంటెన్స్ పీరియాడికల్ డ్రామాను సిరుత్తై శివ తెర‌కెక్కించారు. దాదాపు రూ. 300 కోట్ల బడ్జెట్‌తో రూపొందుతున్న భారీ ఫాంటసీ యాక్షన్ ఫిల్మ్‌గా చెబుతున్నారు. స్టూడియో గ్రీన్ సంస్థ ఈ చిత్రాన్ని నిర్మిస్తోంది. యానిమ‌ల్ ఫేం బాబీ డియోల్ ఇందులో ప్ర‌తినాయ‌కుడిగా న‌టిస్తున్నాడు. సౌత్ లో ఇది అత‌డికి మొదటి చిత్రం. దిశా పటాని, నటరాజన్ సుబ్రమణ్యం, కోవై సరళ, ఆనందరాజ్, మరిముత్తు, దీపా వెంకట్, జగపతి బాబు, యోగి బాబు, రెడిన్ కింగ్స్లీ, రవి రాఘవేంద్ర, కెఎస్ రవికుమార్ త‌దిత‌రులు న‌టిస్తున్నారు.