వచ్చే ఆరునెలలు శ్రీలీలదే..!

టాలీవుడ్ లో ప్రస్తుతం ఎక్కడ చూసినా శ్రీలీల పేరే వినపడుతోంది. తెలుగులో చాలా బిజీ గా వరస సినిమాల్లో నటిస్తూ, క్రేజీ హీరోయిన్ గా మారిపోయింది. ఇప్పుడు ఏ మూవీ చూసినా శ్రీలీల పేరే వినపడుతోంది. స్టార్ హీరోల దగ్గర నుంచి చిన్న హీరోల వరకు అన్ని సినిమాల్లోనూ ఆమె నటిస్తోంది. ఆమె చేతిలో దాదాపు ఇప్పుడు పదికి పైగా సినిమాలు ఉండటం విశేషం. అందరూ హీరోలు తమ సినిమాల్లో శ్రీలీలే ఉండాలని డిమాండ్ చేస్తున్నారు.

దీంతో, ఆమె తన బిజీ షెడ్యూల్ తో అన్ని సినిమాల్లోనూ నటిస్తూ, అదరగొడుతోంది. కేవలం శ్రీలల కాల్షీట్స్ కారణంగానే ఆలస్యమౌతున్న సినిమాలు కూడా ఉన్నాయి. దీనిని బట్టి ఆమె డిమాండ్ ఎలా ఉందో స్పెషల్ గా చెప్పక్కర్లేదు.

ఈ డిమాండ్ ని శ్రీలీల క్యాష్ చేసుకోవాలని అనుకుంటోంది. మొన్నటి వరకు రూ.కోటి రెమ్యూనరేషన్ తీసుకున్న ఆమె, ఇప్పుడు రూ.2కోట్లు కావాలని డిమాండ్ చేస్తోందట. అయితే, అంత రెమ్యూనరేషన్ ఇవ్వడానికి కూడా నిర్మాతలు వెనకాడటం లేదు. ఇటీవల ఆమె నితిన్, వెంకీ కుడుముల సినిమాని కూడా ఒకే చేసిన విషయం తెలిసిందే. ఈ మూవీ నుంచే పారితోషకం పెంచేసింది.

ఈ మూవీతో కలిసి దాదాపు వచ్చే ఆరు నెలలు టాలీవుడ్ మొత్తం శ్రీలీల చుట్టూనే తిరుగుతుండటం విశేషం. ఆమె నటించిన దాదాపు అన్ని సినిమాలు వరసగా విడుదలకు రెడీ అవుతున్నాయి. ఏ మూవీ రిలీజ్ పోస్టర్, సాంగ్ రిలీజ్ ఇలా ఏది చూసినా శ్రీలీలే కనపడుతోంది. తాజాగా రామ్, బోయపాటి స్కంద మూవీ ఫస్ట్ సింగిల్ విడుదల చేయగా, దానిలోనూ శ్రీలీలే హైలెట్ గా కనపడుతోంది.

పంజా వైష్ణవ్ తేజ్‌తో ఆదికేశవ, రామ్ పోతినేని స్కంద, బాలకృష్ణతో భగవత్ కేసరి, నితిన్‌తో ఎక్స్‌ట్రార్డినరీ మ్యాన్, చివరగా మహేష్ బాబు, త్రివిక్రమ్ కాంబినేషన్‌లో వచ్చిన గుంటూరు కారం ఈ సినిమాలన్నింటిలో శ్రీలీల హీరోయిన్ కాగా, అన్నీ వచ్చే ఆరు నెలలో విడుదల కానున్నాయి. ఇంత స్టార్ డమ్ ఒకేసారి దక్కగా, దానిని ఈ క్రేజీ బ్యూటీ ఎంత కాలం నిలుపుకుంటుందో చూడాలి.

ఇదిలా ఉండగా, శ్రీలీలకు ఇటీవల అల్లు అర్జున్ పుష్ప2లో ఐటెం సాంగ్ ఆఫర్ కూడా వచ్చినట్లు ప్రచారం జరుగుతోంది. అయితే, శ్రీలల రిజెక్ట్ చేసినట్లు సమాచారం. ఆమె అద్భుతంగా డ్యాన్స్ వేస్తుందని ఈ ఆఫర్ చేశారట. కానీ, తనకు ఉన్న కమిట్మెంట్స్ కారణంగా ఇది రిజెక్ట్ చేసినట్లు తెలుస్తోంది.