#గుస‌గుస‌.. 'బచ్చన్' లేకుండా ఐశ్వర్య రాయ్ పేరు

ఇటీవ‌లి కాలంలో ఐశ్వ‌ర్యారాయ్- అభిషేక్ బ‌చ్చ‌న్ జంట‌ విడాకుల గురించి మీడియాలో వ‌రుస‌ క‌థ‌నాలు వ‌స్తున్న సంగ‌తి తెలిసిందే. ప‌లు ఈవెంట్లలో ఐశ్వ‌ర్యారాయ్ ఒంట‌రిగా క‌నిపించారు. త‌న భ‌ర్త లేకుండా కేవ‌లం కుమార్తెతో క‌లిసి వేదిక‌కు విచ్చేసారు. ఇటీవ‌ల అనంత్ అంబానీ పెళ్లి వేడుక‌లోను ఒంట‌రిగా క‌నిపించ‌డంతో రూమ‌ర్లు పుట్టుకొచ్చాయి. అయితే ఈ రూమ‌ర్ల‌ను ఐశ్వ‌ర్యారాయ్ కానీ, అభిషేక్ బ‌చ్చ‌న్ కానీ ఖండించ‌లేదు.. అలాగ‌ని `అవును` అని కూడా ధృవీక‌రించ‌లేదు. ఇటీవ‌ల బిగ్ బి అమితాబ్ బ‌చ్చ‌న్ సోష‌ల్ మీడియాల్లో రాసిన సుదీర్ఘ నోట్ లో త‌మ కుటుంబంపై జ‌రుగుతున్న ప్ర‌చారంపై ఆవేద‌న‌ను వ్య‌క్తం చేసారు. అలాగే ఊహాజ‌నిత క‌థ‌నాల‌పై అభిషేక్ బ‌చ్చ‌న్ సైతం కోపాన్ని ప్ర‌ద‌ర్శించారు.

ఇప్పుడు దుబాయ్ లో జ‌రిగిన ప్ర‌తిష్ఠాత్మ‌క‌ ఈవెంట్‌లో `ఐశ్వ‌ర్యారాయ్` అని పేరును స్క్రీన్ పై డిస్ ప్లే చేయ‌డం.. ఇందులో ఇంటిపేరైన `బ‌చ్చ‌న్` కనిపించక‌పోవ‌డంతో అభిషేక్ బచ్చన్ నుండి విడాకుల పుకార్లకు ఇది మ‌రింత‌గా ఆజ్యం పోసింది. దుబాయ్ ఈవెంట్లో ప్రొజెక్ట్ చేసిన స్క్రీన్‌పై `బ‌చ్చ‌న్`ని ఎందుకు తొల‌గించారు? ఇది ఐశ్వర్య రాయ్ కి తెలియ‌కుండానే జ‌రిగిందా? అంటూ రెడ్డిట‌ర్లు లాజిక్ వెతుకుతున్నారు.

దుబాయ్‌లో జరిగిన గ్లోబల్ ఉమెన్స్ ఫోరమ్ వేడుక‌లో దీనిని రెడ్డిట‌ర్లు క‌నుగొన్నారు. వేడుక‌లో ఐశ్వ‌ర్యారాయ్ బ‌చ్చ‌న్ ఉన్నారు. స్త్రీల ఆత్మాభిమానం గురించి ఐష్ ఈ వేడుక‌లో మాట్లాడారు. గ్లోబల్ ఐకాన్ ఐశ్వ‌ర్యారాయ్ స్పాట్‌లైట్‌లో ఉన్న ఈవెంట్ నుండి ఒక వీడియో ఇంటర్నెట్‌లో చక్కర్లు కొడుతోంది. ఓవైపు ఐష్ మాట్లాడుతున్న వీడియో క‌దులుతుండ‌గానే, పేరులో బ‌చ్చ‌న్ క‌నిపించ‌క‌పోవ‌డం ఆశ్చ‌ర్య‌ప‌రిచింది. ఐశ్వర్య రాయ్-ఇంటర్నేషనల్ స్టార్ అని స్క్రీన్ పై రాసి ఉంది. ప్ర‌స్తుతం ఈ స్క్రీన్ షాట్ కూడా అంత‌ర్జాలంలో వైర‌ల్ గా మారుతోంది.