సక్సెస్ పార్టీ ఇచ్చిన భాగ్యం

సంక్రాంతి కానుకగా వచ్చిన 'సంక్రాంతికి వస్తున్నాం' సినిమా భారీ విజయాన్ని సొంతం చేసుకుంది. వెంకటేష్ హీరోగా అనిల్ రావిపూడి దర్శకత్వంలో దిల్‌ రాజు, శిరీష్ నిర్మించిన ఈ సినిమాలో హీరోయిన్స్‌గా ఐశ్వర్య రాజేష్‌, మీనాక్షి చౌదరిలు నటించారు. ఈ సినిమా విజయంలో ఐశ్వర్య రాజేష్ పోషించిన భాగ్యం పాత్ర కీలకంగా నిలిచింది అనడంలో సందేహం లేదు. వెంకటేష్ భార్యగా నటించిన ఐశ్వర్య రాజేష్‌ తెలుగు లెజెండ్రీ స్టార్‌ హీరోయిన్‌ సౌందర్యను మరపించింది అంటూ విమర్శకులతో ప్రశంసలు దక్కించుకుంది. సోషల్‌ మీడియాలో ఐశ్వర్య రాజేష్ పాత్ర గురించి ఏ స్థాయిలో చర్చ జరుగుతుందో మనం చూస్తూనే ఉన్నాం.

మొదటి పది రోజుల లోపే రూ.100 కోట్ల షేర్ రాబట్టి రికార్డ్‌లు బ్రేక్‌ చేసిన సంక్రాంతికి వస్తున్నాం సినిమా లాంగ్‌ రన్‌లో రూ.300 కోట్ల నెంబర్‌పై కన్ను వేసింది. రికార్డ్‌ బ్రేకింగ్‌ వసూళ్లు సొంతం చేసుకున్న సినిమాగా నిలిచింది. కేవలం తెలుగులో మాత్రమే విడుదల అయ్యి అత్యధిక వసూళ్లు సాధించిన సినిమాగా ఈ సినిమా ఇప్పటికే నిలిచింది. ఇటీవల సినిమా సక్సెస్‌ నేపథ్యంలో భీమవరంలో భారీ వేడుక జరిపారు. సినిమా విడుదలకు రెండు వారాల ముందు నుంచి చిత్ర యూనిట్‌ సభ్యులు ఓ రేంజ్‌లో ప్రమోషన్స్‌ నిర్వహించారు. ప్రమోషన్స్‌లో ఇద్దరు హీరోయిన్స్ కచ్చితంగా కనిపిస్తూ వచ్చారు.

సినిమాలోనే కాకుండా ఐశ్వర్య రాజేష్‌, మీనాక్షి చౌదరిలు ప్రమోషన్ కార్యక్రమాల్లో చాలా యాక్టివ్‌గా కనిపించి సర్‌ప్రైజ్‌ చేశారు. ఫ్యామిలీ ఆడియన్స్ అంతా థియేటర్‌కి క్యూ కట్టే విధంగా సినిమాని ఐశ్వర్య రాజేష్‌, మీనాక్షి ఇతర యూనిట్‌ సభ్యులు చేశారు అనడంలో ఎలాంటి సందేహం లేదు. ఐశ్వర్య రాజేష్‌ కెరీర్ బెస్ట్‌ హిట్‌ను సొంతం చేసుకుంది. ఈ నేపథ్యంలో ఈమె యూనిట్‌ సభ్యులకు, స్నేహితులకు, ఇండస్ట్రీ వర్గాల వారికి పార్టీ ఇచ్చింది. చెన్నైలోని తన ఇంట్లో ఇచ్చిన పార్టీలో దర్శకుడు అనిల్‌ రావిపూడి, నిర్మాత శిరీష్ తో పాటు తమిళ్ స్టార్‌ నటుడు విజయ్‌ సేతుపతి సైతం పాల్గొన్నారు. చెన్నైలో ఇటీవల జరిగిన ఈ పార్టీకి సంబంధించిన ఫోటోలు సోషల్‌ మీడియాలో వైరల్‌ అవుతున్నాయి.

తెలుగులో పలు సినిమాల్లో నటించిన ఐశ్వర్య రాజేష్ ఇప్పటి వరకు కమర్షియల్‌ బ్రేక్ దక్కించుకోలేక పోయింది. తమిళంలోనూ ఈమె నటించిన సినిమాలకు మంచి పేరు వచ్చింది. నటిగా మంచి మార్కులు దక్కాయి. కానీ ఇప్పటి వరకు అక్కడ సైతం ఈ స్థాయి విజయాన్ని సొంతం చేసుకోలేదు. అందుకే ఐశ్వర్య రాజేష్ సంక్రాంతికి వస్తున్నాం సినిమాను భారీ ఎత్తున సెలబ్రేట్‌ చేసుకుంది. ముందు ముందు టాలీవుడ్‌లో ఐశ్వర్య రాజేష్ మరిన్ని ఫ్యామిలీ హీరోయిన్‌ ఓరియంటెడ్‌ సినిమాలు చేసే అవకాశాలు ఉన్నాయి. ఐశ్వర్య రాజేష్ ఇచ్చిన సక్సెస్ పార్టీలో ప్రముఖ దర్శకుడు వంశీ పైడిపల్లి పాల్గొనడం విశేషం.