పుష్ప‌ రూల్స్ పాటించ‌లేద‌ని అగ్ర‌హీరో సీరియ‌స్

2024 ఆగ‌స్టు 15 డేట్ లాక్ చేసిన పుష్ప రాజ్ పై సింగం దేవ‌గన్ సీరియ‌స్ గా ఉన్నాడా? అంటే అవున‌నే తెలుస్తోంది. తాజా స‌మాచారం మేర‌కు.. స్వాతంత్య్ర దినోత్స‌వం కానుక‌గా కాప్ డ్రామా 'సింగం ఎగైన్' (సింగం 3)ని రిలీజ్ చేయాల‌ని భావించిన అజ‌య్ దేవ‌గ‌న్ మూడు నెల‌ల ముందే ఈ డేట్ ని లాక్ చేసుకున్నాడు. ఇప్ప‌టివ‌ర‌కూ ఆ తేదీన వేరే ఏ ఇత‌ర సినిమా పోటీకి దిగ‌డం లేద‌ని న‌మ్మ‌కంగా ఉన్నాడు.

కానీ ఇంత‌లోనే స‌డెన్ గా ఐకాన్ స్టార్ అల్లు అర్జున్ న‌టిస్తున్న 'పుష్ప 2' రిలీజ్ తేదీని ప్ర‌క‌టించి మేక‌ర్స్ షాకిచ్చారు. 2024 ఆగ‌స్టు 15న ప్ర‌పంచ‌వ్యాప్తంగా తెలుగు-త‌మిళం-హిందీ వెర్ష‌న్ల‌ను అత్యంత భారీగా విడుద‌ల చేసేందుకు 'పుష్ప 2' టీమ్ రెడీ అవుతోంది. అయితే ఈ ఆకస్మిక ప్ర‌క‌ట‌న అజ‌య్ దేవ‌గ‌న్ ని తీవ్రంగా నిరాశ‌ప‌రిచింద‌ని హిందీ మీడియాలో క‌థ‌నాలొస్తున్నాయి.

పుష్ప టీమ్ రూల్స్ బ్రేక్ చేసింది. తాము ముందే రిలీజ్ తేదీని లాక్ చేసినా అదే డేట్ కి రావాల‌న్న పుష్ప‌2 నిర్ణ‌యాన్ని అత‌డు స‌హించ‌లేక‌పోతున్నాడ‌ని స‌మాచారం. ఇలా రెండు పెద్ద సినిమాలు ఒక‌దానితో ఒక‌టి ఢీకొట్ట‌డం ఆత్మ‌హ‌త్యా స‌దృశమే అవుతుంద‌ని కూడా అజ‌య్ దేవ‌గ‌న్ భావిస్తున్నారట‌. వ‌సూళ్ల షేరింగు విష‌యంలో అత‌డు సంతృప్తి చెంద‌లేడ‌ని కూడా స‌మాచారం. అయితే పుష్ప‌2 పాన్ ఇండియా రిలీజ్ కావ‌డంతో అన్ని భాష‌ల్లోను ఎలాంటి స‌మ‌స్య‌లు లేకుండా విడుద‌ల చేయాల‌ని టీమ్ ప్లాన్ చేస్తోంది. ఒక భాష‌లో రిలీజ్ స‌మ‌స్య‌ను దృష్టిలో పెట్టుకుంటే, ఇత‌ర భాష‌ల్లో రిలీజ్ లు ఇబ్బంది ప‌డాల్సి ఉంటుంది. అందువ‌ల్ల షెడ్యూల్ చేసిన డేట్ కే విడుద‌ల చేయాల్సి ఉంటుంది.

సింగం వాయిదా ప‌డే ఛాన్స్ తాజా ప‌రిణామంతో ముందే ప్ర‌క‌టించిన తేదీ కాకుండా మ‌రో కొత్త డేట్ ని వెతికే ప‌నిలో 'సింగం ఎగైన్' టీమ్ ఉంద‌ని కూడా గుస‌గుస‌లు వినిపిస్తున్నాయి. పుష్ప చిత్రం హిందీ బెల్ట్ లో గ్రాండ్ స‌క్సెస్ అయింది. పుష్ప‌రాజ్ ఫీవ‌ర్ ఉత్త‌రాదిన చాలా ఎక్కువ‌గా ఉంద‌ని స‌ర్వేలు చెబుతున్నాయి. అందువ‌ల్ల పుష్ప 2 పై భారీ అంచ‌నాలున్నాయి. ఈ చిత్రం 2024 ఆగ‌స్టులో భారీ హైప్ తో విడుద‌ల కానుంది. అందువ‌ల్ల అంత క్రేజ్ ఉన్న సినిమాతో పోటీప‌డేందుకు దేవ‌గ‌న్ బృందం ఆస‌క్తిగా లేద‌ని తాము మ‌రో కొత్త తేదీని వెతుక్కోవ‌డం స‌మంజ‌స‌మ‌ని కూడా భావిస్తున్నార‌ని క‌థ‌నాలొస్తున్నాయి.

అలాగ‌ని దేవ‌గ‌న్ - రోహిత్ శెట్టి కాంబినేష‌న్ మూవీ సింగం 2ని త‌క్కువ అంచ‌నా వేయ‌డానికి లేదు. ఈ జోడీ ఇప్ప‌టికే బ్లాక్ బ‌స్ట‌ర్లు కొట్టారు. ఇప్పుడు మ‌రో బ్లాక్ బ‌స్ట‌ర్ పై క‌న్నేశారు. సింగం ఎగైన్ లో దేవ‌గ‌న్ తో పాటు అక్ష‌య్ కుమార్, దీపిక ప‌దుకొనే, ర‌ణ‌వీర్ సింగ్, టైగ‌ర్ ష్రాఫ్ వంటి వారు అతిథి పాత్ర‌ల్లో మెరుస్తార‌ని కూడా టాక్ ఉంది. అలాగే అర్జున్ క‌పూర్ విల‌న్ గా న‌టించే ఛాన్సుంద‌ని కూడా టాక్ వినిపిస్తోంది. అందుకే ఈ సినిమా కూడా భారీ క్రేజ్ తో విడుద‌ల‌వుతుంద‌న‌డంలో సందేహం లేదు.