అఖండ‌2 సెట్స్‌లోకి బాల‌య్యకు ఘ‌న స‌త్కారం.. వీడియో వైర‌ల్

కేంద్ర ప్ర‌భుత్వం నంద‌మూరి బాల‌కృష్ణ‌ను పద్మ‌భూష‌ణ్ పుర‌స్కారంతో గౌర‌వించిన విష‌యం తెలిసిందే. అభిమానులు ముద్దుగా పిలుచుకునే బాల‌య్య కాస్తా ఇప్పుడు ప‌ద్మ‌భూష‌ణ్ బాల‌కృష్ణ అయ్యారు. బాల‌య్య‌ ప్ర‌స్తుతం బోయ‌పాటి శ్రీనుతో అఖండ‌2 తాండ‌వం చేస్తున్న విష‌యం తెలిసిందే. ఈ నేప‌థ్యంలో సోమ‌వారం బాల‌య్య అఖండ‌2 సెట్స్ లోకి అడుగుపెట్టాడు.

ప‌ద్మ‌భూష‌ణ్ వ‌చ్చిన సంద‌ర్భంగా చిత్ర యూనిట్ బాల‌కృష్ణ సెట్స్ లోకి రాగానే పూలు చ‌ల్లి, ఘ‌న స్వాగ‌తం ప‌లికారు. డైరెక్ట‌ర్ బోయ‌పాటి శ్రీను, నిర్మాత‌లు రామ్ ఆచంట‌, గోపీచంద్ ఆచంట బాల‌య్య‌ను ఘ‌నంగా స‌త్క‌రించి, కేక్ క‌ట్ చేయించి శుభాకాంక్ష‌లు తెలిపారు. ఈ వీడియోని అఖండ‌2 మేక‌ర్స్ నెట్టింట షేర్ చేయ‌గా అది సోష‌ల్ మీడియాలో వైర‌ల్ అవుతోంది. దీంతో నంద‌మూరి ఫ్యాన్స్ అఖండ‌2 సినిమా షూటింగ్ మొద‌ల‌వ‌డంపై హ‌ర్షం వ్య‌క్తం చేస్తున్నారు.

రామోజీ ఫిల్మ్ సిటీలో వేసిన ప్ర‌త్యేక సెట్స్ లో బాల‌య్య‌పై కీల‌క స‌న్నివేశాల‌ను ఈ షెడ్యూల్ లో తెర‌కెక్కించ‌నున్నార‌ట‌. మ‌రీ ముఖ్యంగా అఘోరా సీన్ తో సినిమా షూటింగ్ ను మొద‌లుపెట్టిన‌ట్టు స‌మాచారం. అఖండలో న‌టించిన ప్ర‌గ్యా జైస్వాల్ తో పాటూ అఖండ‌2లో సంయుక్త మీన‌న్ కూడా కీల‌క పాత్ర‌లో క‌నిపించ‌బోతుంది.

అఖండ‌2లో బాలీవుడ్ స్టార్ సంజ‌య్ ద‌త్ నెగిటివ్ రోల్ లో న‌టించ‌నున్నాడ‌ని వార్తలు వినిపిస్తున్నాయి. త‌మ‌న్ సంగీతం అందించ‌నున్న ఈ సినిమాను బాల‌య్య రెండో కూతురు తేజ‌స్విని స‌మ‌ర్పించ‌నుండ‌గా 14 రీల్స్ బ్యాన‌ర్ నిర్మించ‌నుంది. ఇప్ప‌టికే హ్యాట్రిక్ హిట్స్ అందుకున్న జోష్ లో బోయ‌పాటి ఈ సినిమాను మ‌రింత గ్రాండ్ గా తెర‌కెక్కించ‌నున్న‌ట్టు తెలుస్తోంది.

ద‌స‌రా కానుక‌గా సెప్టెంబ‌రు 25న అఖండ‌2 తాండ‌వంను రిలీజ్ చేయ‌నున్న‌ట్లు మేక‌ర్స్ ఇప్ప‌టికే అనౌన్స్ చేసిన విష‌యం తెలిసిందే. ఇదిలా ఉంటే బాల‌య్య రీసెంట్ గా సంక్రాంతికి డాకు మ‌హారాజ్ సినిమాతో ప్రేక్ష‌కుల ముందుకు వ‌చ్చి మంచి హిట్ అందుకున్నాడు. డాకు మ‌హారాజ్ రూ.160 కోట్ల గ్రాస్ వ‌సూలు చేయ‌గా, ఈసారి అఖండ‌2తో రికార్డులు నెల‌కొల్పాల‌ని చూస్తున్నాడు బాల‌య్య‌.