అకీరా సినిమా న‌టుడా? రాజ‌కీయ‌ నాయ‌కుడా?

అకీరా నంద‌న్ పేరిప్పుడు దేశ వ్యాప్తంగా మారుమ్రోగిపోతున్న సంగ‌తి తెలిసిందే. ఇప్ప‌టివ‌ర‌కూ మీడియా కెమెరా వెనుక ఉన్న అకీరాని ప‌వ‌న్ తానే స్వ‌యంగా ముందుకు తీసుకొచ్చారు. అటుపై ప్ర‌ధాన న‌రేంద్ర మోదీ అశీస్సులు, ముఖ్య‌మంత్రి నారా చంద్రబాబు నాయుడు ఆశీస్సులు ద‌గ్గ‌రుండి మ‌రీ ఇప్పించారు. ఈ ఆశీస్సుల వెనుక ఎన్నో కార‌ణాలు తెర‌పైకి వ‌చ్చాయి. ఏనాడు సినిమా సెట్స్ కి కూడా తీసుకెళ్లిన ప‌వ‌న్ అకీరాను నేరుగా పెద్ద పెద్ద రాజ‌కీయ నేత‌ల‌కే ప‌రిచ‌యం చేయ‌డంతో? వార‌సుడిని రాజ‌కీయాల్లోకి తీసుకొస్తున్నాడా? అన్న చ‌ర్చ సైతం సాగింది.

ప్ర‌స్తుతంఅకీరా వ‌య‌సు 20 అయినా వ‌చ్చే ఎన్నిక‌ల స‌మ‌యానికి 25 వ‌స్తాయి. అప్ప‌టికీ అన్ని ర‌కాలుగా ప‌రిణితి చెంది ఉంటాడు అన్న‌ది ఒక వెర్ష‌న్. ఇక మ‌రో వెర్ష‌న్ చూస్తే ప‌వ‌న్ ఇక‌పై పూర్తిగా రాజ‌కీయాల్లోనే బిజీ అయిపోతారు. క‌మిట్ అయిన సినిమాలు పూర్తి చేసిన త‌ర్వాత సినిమాలు చేసే అవ‌కాశం దాదాపు లేన‌ట్లే. రాష్ట్రం, దేశ సేవ అంటూ ప‌వ‌న్ పెద్ద ప్లాన్ వేసుకుని ముందుకు క‌దులుతున్నాడ‌ని అత‌ని మూవ్ మెంట్స్ ని బ‌ట్టి తెలుస్తోంది. అదే జ‌రిగితే ప‌వ‌న్ సినిమా అభిమానుల‌కు నిరుత్సాహం త‌ప్ప‌దు.

మ‌రి ఆ బాధ్య‌త‌ను తీర్చాల్సిన బాధ్య‌త కూడా ప‌వ‌న్ మీద‌నే ఉంది. అందుకే ప‌వ‌న్ రిటైర్మెంట్ ఏ క్ష‌ణ‌మైనా జ‌రిగే అవ‌కాశం ఉంది. ఈ నేప‌థ్యంలో అకీరాని న‌టుడిగా లైన్ లోకి తేవాల‌నే ఆలోచ‌న‌తోనే అత‌డిని ఇప్పుడు తెర‌పైకి తెస్తున్నాడ‌ని అంటున్నారు. సినిమాలో క‌ష్ట న‌ష్టాలు ప‌వ‌న్ క‌ళ్యాణ్ కి తెలుసు. అక్క‌డ స‌క్సెస్ మాత్ర‌మే నిల‌బెడుతుంది. ఎంత బ్యాక్ గ్రౌండ్ ఉన్నా? స‌క్సెస్ లేక‌పోతే నిల‌బ‌డ‌టం క‌ష్ట‌మైన ప‌నే. కోట్ల రూపాయ‌ల వ్యాపారంలో స‌క్సెస్ లేక‌పోతే వార‌సుడికి కూడా అవ‌కాశాలుండ‌వు అన‌డానికి ఎన్నో ఉదాహ‌ర‌ణ‌లున్నాయి.

పైగా తెలుగు సినిమా అంటే పాన్ ఇండియా మార్కెట్ లో దూసుకుపోతున్న త‌రుణం. ఇవ‌న్నీ దృష్టిలో ఉంచుకునే ప‌వ‌న్ క‌ళ్యాణ్‌...కుమారుడు అకీరానంద‌న్ ఈ మ‌ధ్య కాలంలో త‌న వెంట తిప్పుకున్నాడు? అని మేధా వ‌ర్గం భావిస్తోంది. ప్ర‌ధాని మోదీ ఆశీస్సులు అందుకుంటే? పాన్ ఇండియాలో ప్ర‌త్యేక‌మైన గౌర‌వం, గుర్తింపు ద‌క్కుతాయి. అది సినిమా మార్కెట్ ని ఎన్ క్యాష్ చేసుకోవ‌డానికి అవ‌కాశం ఉంటుంద‌ని భావిస్తున్నారు. మ‌రి ఇదంతా నిజ‌మైతే? అకీరా తెరంగేట్రానికి ఎంతో స‌మ‌యం ప‌ట్ట‌దు. ఏదీ ఏమైనా అకీరాని మీడియా ముందుకు తేవ‌డం అన్న‌ది రెండు ర‌కాలుగానూ క‌లిసొచ్చేదే అన్న‌ది వాస్త‌వం.