అఖిల్ నిశ్చితార్థం క‌న్ఫామ్ చేసిన నాగార్జున‌

అక్కినేని ఫ్యామిలీ నుంచి బ్యాక్ టు బ్యాక్ శుభ‌వార్త‌లు అందుతున్నాయి. నాగార్జున‌ పెద్ద కుమారుడు నాగ‌చైత‌న్య తాను ప్రేమించిన శోభిత ధూళిపాల‌ను పెళ్లాడుతున్నాడు. ఇప్ప‌టికే ఈ జంట నిశ్చితార్థం అయింది. డిసెంబ‌ర్ 4న పెళ్లి. ఇంత‌లోనే ఇప్పుడు రెండో కుమారుడు అక్కినేని అఖిల్ నిశ్చితార్థానికి సంబంధించిన అధికారిక వార్త వెలువ‌డింది. కింగ్ నాగార్జున స్వ‌యంగా దీనిని ధృవీక‌రించారు.

ఎట్ట‌కేల‌కు అఖిల్ అక్కినేని పెళ్లి పీటలు ఎక్కబోతున్నాడు. నాగార్జున అక్కినేని అందించిన వివ‌రాల ప్ర‌కారం.. అక్కినేని చియాన్ అఖిల్ జైనాబ్ రావ్‌జీ ని పెళ్లాడ‌నున్నాడు. ఈరోజు నిశ్చితార్థాన్ని అధికారికంగా ప్రకటించారు. కాబోయే కోడ‌లిని అక్కినేని కుటుంబం ప్రేమగా కుటుంబంలోకి స్వాగతించింది.

ఇన్‌స్టాలో అఖిల్ తన అభిమానులతో ఈ ఆనందాన్ని షేర్ చేసుకున్నారు. ''నా సంతోషం ఎప్పటికీ దొరికింది. జైనాబ్ రావ్‌జీ తో నిశ్చితార్థం చేసుకున్నాను అని ప్రకటించడం సంతోషంగా ఉంది'' అని రాసారు. ఈ వార్త ఇంట‌ర్నెట్ లో దావాన‌లంలా మారింది. అశేషంగా ఉన్న‌ అక్కినేని అభిమానులు, తెలుగు ప్ర‌జ‌ల నుంచి అభినందనలు వెల్లువెత్తుతున్నాయి. డిసెంబరు 4న అన్నపూర్ణ స్టూడియోస్‌లో శోభితా ధూళిపాళను నాగ చైతన్య పెళ్లాడ‌నున్నారు. ఇంత‌లోనే ఈ ప్రకటన రావ‌డంతో ఫ్యాన్స్ కి డ‌బుల్ ధ‌మాకా శుభ‌వార్త అందింది.

అంతకుముందు 2017లో అఖిల్ అక్కినేని- జీవీకే సంస్థానం వార‌సురాలు శ్రీ‌యా భూపాల్ తమ పెళ్లిని రద్దు చేసుకుని అందరినీ ఆశ్చర్యపరిచారు. ఇటలీలో ప్లాన్ చేసిన వివాహం కొన్ని నెల‌ల ముందు అనూహ్యంగా రద్దయింది. ఆ త‌ర్వాత‌ అఖిల్ తన సినీ కెరీర్‌పై దృష్టి పెట్టగా, శ్రీయా భూపాల్ తన ఫ్యాషన్ లేబుల్ ప‌నిపై విదేశాల‌కు వెళ్లార‌ని క‌థ‌నాలొచ్చాయి.

అఖిల్ అక్కినేని కెరీర్ ప‌రంగా ఇంకా బౌన్స్ బ్యాక్ అవ్వాల్సి ఉంది. అఖిల్‌, మిస్టర్‌ మజ్ను, మోస్ట్‌ ఎలిజిబుల్‌ బ్యాచిలర్‌, ఏజెంట్ వంటి చిత్రాల్లో న‌టించాడు. అత‌డి హార్డ్ వ‌ర్క్ డెడికేష‌న్ కి గుర్తింపు ద‌క్కినా ఆశించిన బ్లాక్ బ‌స్ట‌ర్ ఇంకా ద‌క్క‌లేదు. అయితే ప‌రాజ‌యాల‌కు చింతించ‌క అతడు కెరీర్ గేమ్ ఛేంజ్ చేయాల‌ని చాలా హార్డ్ వ‌ర్క్ చేస్తున్నాడు. ఇప్ప‌టికే అత‌డు రెండు కొత్త చిత్రాలకు సంతకం చేసాడు. రెండూ వచ్చే ఏడాది ఆరంభంలో ప్రారంభం కానున్నాయి. యువి క్రియేష‌న్స్ లో 'ధీర' అనే చిత్రంలో న‌టిస్తున్నాడు. కొత్త దర్శకుడు అనిల్ దర్శకత్వం వహిస్తారు. 'వినరో భాగ్యము విష్ణు కథ' ఫేం మురళీ కిషోర్ అబ్బూరు దర్శకుడిగా అన్నపూర్ణ స్టూడియోస్ లో రెండవ ప్రాజెక్ట్ తెర‌కెక్క‌నుంది.