20 ఏళ్ల తర్వాత జత కట్టబోతున్న రొమాంటిక్ జోడీ
ఇన్నాళ్ల తర్వాత అక్షయ్ కుమార్ మరియు రవీనా టాండన్ లు కలిసి నటిస్తున్న నేపథ్యం లో టిప్ టిప్ బర్సా పానీ పాట అభిమానులు ఆనందం వ్యక్తం చేస్తున్నారు.
By: Tupaki Desk | 25 Aug 2023 2:30 AM GMT
బాలీవుడ్‌ లో స్టార్‌ హీరోగా దూసుకు పోతున్న అక్షయ్ కుమార్ ఏడాదికి మూడు నాలుగు సినిమాలు చేస్తూ ఉన్నాడు. వచ్చే ఏడాదికి గాను మూడు ప్రాజెక్ట్‌ లను ఇప్పటికే ఫైనల్‌ చేశాడు. అందులో హౌస్ ఫుల్‌ 5 ఒకటి కాగా మరోటి వెల్ కమ్‌ 3. విభిన్నమైన కామెడీ ఎంటర్ టైనర్‌ గా రూపొందబోతున్న వెల్ కమ్‌ 3 సినిమాలో సీనియర్ హీరోయిన్ రవీనా టాండన్ నటించబోతుంది.
సాధారణంగా అయితే పెద్దగా పట్టించుకోవాల్సిన అవసరం లేదు. కానీ అక్షయ్ కుమార్ మరియు రవీనా టాండన్ లు మాజీ ప్రేమికులు, ఇద్దరు కూడా పెళ్లి కి సిద్ధం అయ్యారు. అంతే కాకుండా వీరి వివాహ నిశ్చితార్థం అయిందని కూడా వార్తలు వచ్చాయి. కానీ కొన్ని కారణాల వల్ల నిశ్చితార్థం తర్వాత పెళ్లి క్యాన్సిల్‌ అయింది.
అంతకు ముందు వరుసగా సినిమాలు చేసి రొమాంటిక్ జోడీగా పేరు దక్కించుకున్నారు. ముఖ్యంగా మెహ్రా లోని టిప్ టిప్ బర్సా పానీ పాట ఏ స్థాయి విజయాన్ని సొంతం చేసుకుందో ప్రత్యేకంగా చెప్పనక్కర్లేదు. ఇప్పటికి కూడా యూట్యూబ్‌ లో ఆ పాట తెగ వ్యూస్ ను దక్కించుకుంటూ సోషల్‌ మీడియా లో సందడి చేస్తూ ఉంది.
రొమాంటిక్ జోడీగా మంచి పేరున్న అక్షయ్ కుమార్, రవీనా టాండన్ చివరి సారిగా ఆన్‌ : మెన్‌ ఎట్‌ వర్క్ అనే సినిమాలో నటించారు. ఆ సినిమా విడుదల అయి దాదాపుగా ఇరవై ఏళ్లు అవుతుంది. అప్పటి నుండి ఇప్పటి వరకు కూడా అక్షయ్ కుమార్ మరియు రవీనా టాండన్ లు కలిసి నటించిందే లేదు.
ఇన్నాళ్ల తర్వాత అక్షయ్ కుమార్ మరియు రవీనా టాండన్ లు కలిసి నటిస్తున్న నేపథ్యం లో టిప్ టిప్ బర్సా పానీ పాట అభిమానులు ఆనందం వ్యక్తం చేస్తున్నారు. బ్యాక్ టు బ్యాక్ సినిమాలతో సందడి చేస్తున్న అక్షయ్ కుమార్ బడే మియాన్ చోటే మియాన్ సినిమా లోనూ నటిస్తున్న విషయం తెల్సిందే.
