ఆలియాతో గల్లీబోయ్ వేషాలు చూడ‌త‌ర‌మా?

ముంబై ధారావి గ‌ల్లీ నుంచి అంత‌ర్జాతీయ స్థాయికి ఎదిగిన ర్యాప‌ర్ క‌థ‌తో తెర‌కెక్కిన 'గ‌ల్లీబోయ్' అవార్డులు రివార్డులు సాధించ‌డ‌మే గాక సంచ‌ల‌న విజ‌యం సాధించిన సంగ‌తి తెలిసిందే. ఇందులో ర‌ణ‌వీర్ సింగ్ - ఆలియా భ‌ట్ జంట న‌ట‌న‌ కు ప్ర‌శంస‌లు కురిసాయి. గ‌ల్లీ బోయ్ తో ప్రేమ‌లో ప‌డే గ‌ల్లీ ముస్లిమ్ గాళ్ పాత్ర‌లో ఆలియా న‌టించింది. సినిమా ఆద్యంతం ర్యాప్ నేప‌థ్యం.. ప్రేమ‌క‌థ ఎంతో అబ్బుర‌ప‌రుస్తాయి. జోయా అక్త‌ర్ తెర‌కెక్కించిన 'గ‌ల్లీబోయ్' జాతీయ అవార్డుల ను కొల్ల‌గొట్టింది.

కొంత గ్యాప్ త‌ర్వాత ఇప్పుడు మ‌రోసారి ర‌ణ‌వీర్ - ఆలియా జంట తెర‌ పై ప్రేమికులుగా క‌నిపించ‌నున్నారు. ఈసారి కూడా మ‌రో ఆహ్లాద‌క‌ర‌మైన ప్రేమ‌క‌థా చిత్రం తో అభిమానుల ముందుకు రానున్నారు. ఈ చిత్రానికి క‌ర‌ణ్ జోహార్ ద‌ర్శ‌కుడు. ఆయ‌నే నిర్మాత‌. 2023 మోస్ట్ అవైటెడ్ చిత్రాల్లో ఒక‌టిగా గుర్తింపు ఉన్న ఈ సినిమా టైటిల్ -రాకీ ఔర్ రాణి కి ప్రేమ్ కహానీ. ఇప్ప‌టికే క‌ర‌ణ్ ప్ర‌చారంలో వేగం పెంచారు. దేశవ్యాప్తంగా ఉన్న ప్రేక్షకులతో కనెక్ట్ కావడానికి న‌టీన‌టులు స‌హా క‌ర‌ణ్ సుడిగాలి పర్యటనలు చేస్తున్నారు.

భారీ అంచనాలున్న ఈ చిత్రం జులై 28న ప్రేక్షకుల ముందుకు రాబోతుండగా అభిమానుల్లో సినీవర్గాల్లో సందడి నెలకొంది. ఈ సినిమా ప్ర‌మోష‌న్స్ లో భాగంగా ర‌ణ‌వీర్ - ఆలియా జంట ఫోటోషూట్లు అంతే వేగంగా వైర‌ల్ అవుతున్నాయి. ఈ జంట తాజా డిజైన‌ర్ లుక్ అభిమానుల‌ ను అబ్బుర‌ప‌రుస్తోంది. ముత్యాలు వ‌జ్రాల అల్లిక‌తో డిజైన‌ర్ ఫ్రాక్ లో ఆలియా న‌వ్వులు చిందిస్తూ ఎంతో అందంగా క‌నిపించ‌గా మ్యాచింగ్ డ్రెస్ తో ర‌ణ‌వీర్ అంతే పెప్పీగా క‌నిపించాడు. ప్ర‌స్తుతం ఈ ఫోటోలు అంత‌ర్జాలం లో వైర‌ల్ గా మారాయి.

ఇటీవ‌ల వినూత్న ప్రచార వ్యూహంలో భాగంగా రణ్‌వీర్ - అలియా స‌హా చిత్ర దర్శకుడు కరణ్ జోహార్ ఇండియాస్ ఇంటర్నేషనల్ మూవ్ మెంట్ టు యూనైట్ నేషన్స్ (I.I.M.U.N's) బ్యాక్ టు స్కూల్ సిరీస్ లో పాల్గొన్నారు. స్టార్ లు భారతదేశం లోని 100 కంటే ఎక్కువ నగరాల నుండి 50000 మంది పైగా విద్యార్థులతో ఇంటరాక్ట్ అయ్యారు. వారి తాజా చిత్రం గురించి చాలా సంగ‌తుల‌ ను షేర్ చేసారు.

రణవీర్- అలియా - కరణ్ తాజా ప‌ర్య‌ట‌న‌లో భాగంగా 'నెవర్ హ్యావ్ ఐ ఎవర్' అనే వినోదభరితమైన గేమ్ లో పాలుపంచుకున్నారు. ఆట సమయంలో ముగ్గురూ కొన్ని ఆసక్తికరమైన విషయాలు వెల్లడించారు. నెవర్ హ్యావ్ ఐ ఎవర్ గేమ్ లో భాగంగా ''ఎప్పుడైనా తమ గురువు(టీచ‌ర్‌)పై క్రష్ కలిగి ఉన్నారా?'' అనే ప్రశ్న వారికి ఎదురైంది. అలియా భట్ - కరణ్ జోహార్ వెంట‌నే అలాంటిదేమీ లేద‌ని బదులిచ్చారు. ఆ ఇరువురూ తమ టీచర్లలో ఎవరినీ ప్రేమించలేద‌ని స్ప‌ష్ఠం చేసారు.

అయితే రణవీర్ సింగ్ స్పందన అందరినీ ఆశ్చ‌ర్య‌ప‌రిచింది. అత‌డి స‌మాధానం ప్రేక్షకుల ముఖాల్లో చిరునవ్వును తెచ్చింది. రణవీర్ 1వ తరగతి లో తన టీచర్ ని ప్రేమించాన‌ని అన్నాడు. త‌న‌ టీచ‌ర్ ని ప్రేమించాన‌ని అత‌డు నిజాయితీగా ఒప్పుకున్నాడు. అతను బాంద్రా లోని లెర్నర్స్ అకాడమీ నుండి మిస్ మెల్రోస్ మెక్ గిల్ అనే ఉపాధ్యాయురాలి పేరును కూడా వెల్లడించాడు. ఆ టీచ‌ర్ ఇప్పటికీ తన హృదయం లో ప్రత్యేక స్థానాన్ని కలిగి ఉందని అన్నాడు. రణవీర్ మాట‌ల‌ కు అక్క‌డ ఉన్న‌వారంతా ప‌గ‌ల‌బ‌డి న‌వ్వారు. చ‌ప్ప‌ట్లో కేరింత‌లు కొట్టారు. అతని నిజాయితీ అంద‌రినీ ఆక‌ర్షించింది. రాకీ ఔర్ రాణి కియ్ ప్రేమ్ కహానీ లో రణవీర్ సింగ్, అలియా భట్, ధర్మేంద్ర, జయ బచ్చన్ - షబానా అజ్మీ ప్ర‌ధాన‌పాత్రల్లో నటించారు.